Mǎ̤riko 3 - Kawyaw RC

Kòyò cǔgosi

¹ Ye̤shǔ ginṳsǒ ta̤sabahǐkû dě bǎnu tò̤glònu, kòyò cǔgosi ǒ tapwa̤.

² A to ta mṳni̤dǔ akhû̌akhî, Pharisè̌phû̌ toǒǒnu a sò̌yṳ kè̌lǎ Běcǎ Ye̤shǔ ata̤sǔ dě a ǒpo̤kè̌ nû̌ûta mṳni̤dǔ htǒonumî̌ a ma̤bǎ bǎ kòyò cǔgosi htǒotapwa̤ pě ya, mî̌ tò̤ ya hǐnu.

³ Dě Ye̤shǔ hî̌ kòyò cǔgosi tokhonu tapwa̤, “Hè dě alo̤mo̤.”

⁴ Htodě a gwè asî, “Pa ta̤sû̌ta̤tòwò hî̌ pa ta bǎ Yṳ̌daphû̌ a mṳni̤dǔ akhanumî̌, pa tobǎ ma̤jè kòyò ya? mè̤tò̤mî̌ pa tobǎ ma̤pò̤ma̤sha kòyò ya? Pa tobǎ ma̤lû̌htò̌ge kòyò tapwa̤pwa̤ ayola htûpwa̤ ya? Mè̤tò̤mî̌ pa tobǎ ma̤si kòyò ya?” Pwǎ̤ta asî dò̌tûklû̌bò pwǎ.

⁵ A bǎshajî̌ Ye̤shǔ a sò̌phlǒ, ma̤tè̤hî̌dě asî nò̌kudubò pṳ̂̌꤮ tapwa̤, ta̤gwèbǎǐ kònu a ǒ dî̌kî̌꤮ tò̤ akhû̌akhî, Ye̤shǔ kè̌ asî dě a sò̌phlǒdû̌ tûlû̌shû̌ dě a hî̌ kòyò cǔgosi tokho htǒotapwa̤, “Yṳ̂htò̌ na cǔgonu,” dě a yṳ̂htò̌ acǔgo, dě acǔgo wǒgebò sǒ.

⁶ Pharisè̌phû̌ toǒ hǎhtò̌cû̌ tephekè dě taplǎpa asî cû̌ǒplǒ ta kòyò htě a gûkû̌ Khwǐherǒ akònu toǒ dě asî cû̌ ǒhtuhî̌bǎplǒ kè̌khînû̌û ta tobǎ ma̤si Ye̤shǔ hî̌tènu awi̤akè̌.

Kòyò saprṳ̂ gû Ye̤shǔ akò

⁷ Ye̤shǔ ta akhophijaû̌ toǒ hǎhtò̌cû̌ tephekè Galilî̌a shikoǒdû̌ dě kòyò dě Galilî̌agakûnu toǒ gûkû̌plṳ̂꤮ asîkò. Toǒǒ numî̌ dě Yṳ̌dagakû,

⁸ Toǒǒ numî̌ dě Ye̤rǔshèlèwî̤, toǒǒ numî̌ dě Idǔmè̤̌ga ta dě Jòda shilo̤ bò̌kho taga, toǒǒ numî̌ a ǒ te̤we̤lṳ̂ lǒkho bǎ Turǔwî̤ ta Sidowî̤nu toǒ gûkû̌bò asî kò. Kòyò lǒ̤꤮ bò htǒotoǒ numî̌ kòyò htě a gana̤de bǎbò Ye̤shǔ ma̤ ta̤cǒklî̌kî̌yanu toǒ dě a gûcû̌kû̌pwǎ asîkò.

⁹ Ye̤shǔ hî̌ akhophijaû̌ toǒ ta ma̤pûhǐ kòyò saprṳ̂saphǎ htǒo hè tîdî̌tûshû̌ pû nû̌ûtò̤ ayanu, a noma̤wǒnǎ asî sǒkhli tabǎ.

¹⁰ Ye̤shǔ cû̌ hî̌tǒ̤ akhophijaû̌ hǐnu ma̤tè̤hî̌dě a ma̤hǎmǎ plṳ̂ kòyòshǐkòyòsha toǒ hǒ, dě kòyò htě ashǐashape toǒnu, a tîdî̌hèto nû̌û ǒ dě aglè̌ hè tè̌bǎbò nû̌û akhû̌akhî, a noma̤pwǎ kò hǐnu.

¹¹ Nǎ ma̤bǎ kòyò htǒotoǒnu, a kè̌shǐ Ye̤shǔ bò̌khòtè꤮ bǎbǎ, a lòkhǔpo̤ Ye̤shǔ a lo̤mo̤ dě a yi̤kǒ lǒkho, “Na mî̌ Cǒmara aphû̌khû tapwa̤,” a hî̌ lǒkho hǐnu.

¹² Dě a sǎhtǎ khînǎnu toǒ ta, “He mî̌ ûpènu pwe̤ǐlṳ pûma̤ kò dǐpwǎ̤꤮ ma̤ nî̌꤮.”

Ye̤shǔ wû̌lǎ akhophijaû̌ shǐsò̌gini̤

¹³ Htodě Ye̤shǔ htò̌ kholokhû̌ dě a kaǎhè kòyò htě ato nû̌ûsò̌phlǒnu toǒ dě asî hè lǒkho nû̌ûǒ.

¹⁴ Ye̤shǔ wû̌lǎkaǎ akhophijaû̌ shǐsò̌gini̤ dě a hî̌ asî, “He wû̌lǎ sî ta sî tobǎ ǒkû̌dǒ ta he htohǒtò̤ he nohǎhtò̌cû̌ sî pě dě sî bǎ cû̌ dǒhtû̌ǐ kòyò ta Cǒmara ale̤ayo̤ pě. Dě a kaǎ asî htǒo shǐsò̌gini̤ ami̤ ta pwa̤nophû̌.

¹⁵ Htohǒtò̤ he ǐ sî ta̤sîrîshû̌sho dě sî bǎ wṳ̂hǎhtò̌pè̤kè khînǎnu toǒ pě.”

¹⁶ Ye̤shǔ wû̌lǎ akhophijaû̌ shǐsò̌gini̤ htǒotoǒ numî̌ kwè̌꤮ ûpè hî̌ dě, Shîmǒ̤nè̤ (htě Ye̤shǔ kaǎsatèplè̌ nû̌ûmi̤ ta Petru)

¹⁷ Sebedè̌o aphû̌makhû Jǎgomo̤ ta apṳ Jowǎ̤ni̤, dě Ye̤shǔ kaǎsatèplè̌ asîmi̤ ta Bò̌neragè̌. Amûasǎ mî̌ tî̌lî̌ a phû̌makhû toǒ.

¹⁸ Adrěa, Phǐlǐpo, Batolomě̤o, Matěo, To̤mǎ̤jo, Alphěo aphû̌khû Jǎgomo̤, Tadè̌, Shîmǒ̤nè̤ htě a mo̤ǐ ashiaganu tapwa̤,

¹⁹ Ta Yṳ̌da Isakarǐo htě a shaǎlò̤kè Ye̤shǔnu tapwa̤.

Ye̤shǔ ta Belǎsebulǎ

²⁰ Htǒotaplǎdě Ye̤shǔ ge dě hǐ. Kòyò hè ǒplṳ̂ǒphǎ kû̌bò gesǒ nû̌ûdě asî ǎlǎolǎjòpe shǎǎ tò̤.

²¹ Bǎ a pṳwè̤mo̤pha gana̤de ta̤ma̤ana̤ hǐnu akha, asî hǎhtò̌cû̌ dě a glè cû̌ cǐge nû̌û ma̤tè̤hî̌dě asî hî̌ nû̌ûyo̤ ta “A sǒsǒ ta a kicǐ,” asî hî̌ nû̌û hǐnu.

²² Htodě pwa̤sû̌ǐ ta̤sû̌ta̤tòwò asara ǒ Ye̤rǔshèlèwî̤ toǒ hè dě a hî̌ lǒkho, “Khînǎkhîno Belǎsebulǎ ǒ dě Ye̤shǔ akû, dě a nî̤bǎ khînǎ hǐkǒdû̌nu toǒ a sîrîpo̤phǎ dě a wṳ̂hǎhtò̌bò̌ pwǎ khînǎnu toǒ pwǎ.”

²³ Dě Ye̤shǔ kaǎhè asî a ǒ dě a hî̌ asî ta yo̤sǎkhěkhǒ toǒ hè̌o, “Khînǎmo̤pha hǐkǒdû̌ cû̌ wṳ̂htò̌bò̌jò gesǒ khînǎmo̤pha hǐkǒdû̌ hî̌tè?

²⁴ Shigaphû̌ ta shigaphû̌ dè shěpe̤ kè̌khînû̌û hî̌dě ashiaga ǒměǒgle ǒhtujò sělěpe nû̌û tò̤ dě a lòte̤jakè pě.

²⁵ Hǐphû̌phòphû̌ dèto̤klî̌ kè̌khînû̌û hî̌nu hǐphû̌phòphû̌ htǒo ǒhtujò sělěpe nû̌û tò̤.

²⁶ Hǐnudě khînǎmo̤pha hǐkǒdû̌ dè shě gesǒtû̌ ana̤ hî̌dě a sîrîshû̌sho toǒnu, a ǒměǒglejò tò̤. A sîrîshû̌sho toǒ glè ǒpe tò̤.

²⁷ Pwǎ̤ta bǎ kòyò tapwa̤ cû̌nṳ khînǎmo̤pha hǐkǒdû̌ htě asǒsǒta kòyòshû̌kòyòsho tapwa̤ ahǐkû akhanu, a dè nṳcokloměwǐ nû̌û tò̤ hî̌nu, a nṳ phî̌sigwijò nû̌ûta̤kî̌ta̤kû̌ dǐkhò̌꤮ tò̤. A cokloměhto nû̌û pědě a phî̌sigwinṳjò nǒpwǎ nû̌û ta̤kî̌ta̤kû̌.

²⁸ He hî̌ mè̤mè̤̌ sî, kòyòhǎkhû̌phû̌ lǒ̤bò a ta̤sǔ toǒ ta a hî̌bǎ pi̤jishǐcǒ lǒ̤bò Cǒmara toǒnu, Cǒmara bòlû̌kè lǒkho asî ta̤sǔ pě.

²⁹ Pò̤̌ta kòyò htě a pi̤jishǐcǒ Běcǎ sǎcahtǐnu Cǒmara bòlû̌bò̌pe nû̌ûta̤sǔ dî̌kî̌꤮ tò̤. Ata̤sǔ htǒonu a ǒmějò tûjûpwa̤ talakhǎ pě.”

³⁰ Ye̤shǔ cû̌hî̌tǒ̤ hǐnu ma̤tè̤hî̌dě, “Khînǎkhîno ǒ nû̌ûkû,” asî hî̌ hǐnu.

Ye̤shǔ amo̤ ta apṳwè̤ toǒ

³¹ Ye̤shǔ amo̤ ta a pṳmakhû toǒ hè ihtǒ ǒ bǎ hǐdòkû̌ dě asî nocû̌kaǎ kò ta Ye̤shǔ.

³² Dě kòyò saprṳ̂saho hǎnòò̌ te̤we̤ plṳ̂phǎbò ta Ye̤shǔ. Kò hî̌ Ye̤shǔ, “Kè̌mò̌ děnu, namo̤ ta na pṳmakhû na pṳmamǔ toǒ ǒbò bǎ hǐdòkû̌nu dě a gwèlǎ lǒkho na.”

³³ Dě a hî̌shǔ asî, “Hemo̤ ta he pṳmakhû toǒmî̌ ûpè?”

³⁴ A kè̌ te̤we̤lṳ̂ kòyò hǎnòò̌plǒ te̤we̤ nû̌ûnu toǒ dě a hî̌, “Kè̌ htǒo, kòyò htě a ǒ bǎo numî̌ hemo̤ ta hepṳmakhû toǒ hǒ.

³⁵ Kòyò htě a ma̤to pwǐ Cǒmara a ta̤sò̌yṳnu toǒmî̌ amî̌ hepṳmakhû hepṳmamǔ toǒ ta hemo̤ hǒ,” a hî̌ hǐnu.