Htû̌sò̌htò̌ 6 - Kawyaw RC

Bǎ ta̤pò̤ta̤sha hèbǎ akha, kwihtò̌ ta̤ma̤jè dě Cǒmara tûjûpwa̤ aǒ

Khwǐdǎ̤wi̤ ata̤sò̌po̤ htû̌sò̌ǐ. Ta̤sò̌po̤ htǒomî̌ pwa̤sò̌po̤ ta̤ toǒ ahǐkǒdû̌ dě ta̤lṳhtò̌hokû tapwa̤ aya. Bǎ sò̌po̤ ta̤sò̌po̤ htǒoakhanu, bǎ dǒ yǎta ta̤ǔta̤po̤ htě apli̤ǒ toǒ.

¹ Kǒ Cǒmara tûjûpwa̤, sò̌phlǒdû̌ dě sǎhtǎ pûma̤ he ma̤. Bǎ na sò̌phlǒhtò̌ he akha phlě pûma̤ he ma̤.

² Kǒ Cǒmara tûjûpwa̤, alòdǒlòde mè̤mè̤̌ he akhû̌akhî, gwèbǎǐ he. Kǒ Běcǎ, a sha hekhwǐhekhû̌, ma̤bǎ pû he nî̌.

³ He ǐsha mè̤mè̤̌. Kǒ Cǒmara tûjûpwa̤ na glè̌ cǐhtûyî̤po̤ khîkha htû̌꤮ bò̌khò tè?

⁴ Kǒ Cǒmara tûjûpwa̤, ma̤lû̌htò̌gemò̌ he. Nata̤mo̤ǐnu ahǎbòjò tò̤ akhû̌akhî, ma̤lû̌htò̌ge mò̌ he.

⁵ Kò cû̌to̤ dě lṳnǎkhwǎdonu toǒ, tapwǎ̤꤮ kò gènè̤to̤pe na tò̤. Kò ǒ dě lṳga htǒo kò htû̌sò̌ǐpe nǒ na dǐpwǎ̤꤮ tò̤.

⁶ He kookasha dě a lòdǒlòde mè̤mè̤̌ he. pṳ̂̌na̤na̤꤮ hemi̤sǎshilò̤ dû̌bǐbò he hǔgò. pṳ̂̌ hǎhǎ꤮ he hǎ dě a cǒcǎpǎbò he la̤da.

⁷ Dě pwa̤sò̌khě he ma̤hǎ plṳ̂꤮ he akhû̌akhî, hemi̤sǎphě yǒbò, a sûprṳ̂bò hǒ.

⁸ Cǒmara tûjûpwa̤ gana̤de heta̤hǎta̤wo akhû̌akhî hǒ, kǒ kòyò htě a ma̤ ta̤phû̌mò̤shî̌hto, cû̌tepheyî̤kè ta he.

⁹ Cǒmara tûjûpwa̤ gana̤de heta̤kwigwèbǎǐ hǒ. Cǒmara tûjûpwa̤ yṳǎphî̌shǔ he ta̤kwicaba hǒ.

¹⁰ Lǒ̤꤮ bò pwa̤sò̌khě he toǒ glè ǐsha sòwò̤bò. Asî htû̌tiwǐgekhî, taplǎpa ami̤sǎ pî̌tî̌kè pě.