Hebrǔ 6 - Kawyaw RC

¹ Hǐnudě pa bè̌ǒkèbò pa ta̤sû̌ǐtòwòǐ bǎ kò Khrî̌stu awi̤akè̌ a kòshî̌kòtṳnu toǒ dě pa cû̌ hè kû̌po̤ kò alo̤mo̤ dě sû̌ǐsî̌ya kû̌po̤ kò ta kòyò dû̌pwa̤aya a ta̤sû̌ǐ htǒotoǒ hò̌꤮. Kò sû̌ǐhèhè sû̌ǐgege bǎ pa ta ta̤sû̌ǐtòwòǐ a kòshî̌kòtṳ dě a hî̌, sî bǎ wîkè ta̤ma̤ htě abwǐ ǒtò̤nu toǒ, dě sî bǎ yṳǎ Cǒmara, ta̤sû̌ǐ pwǐhè̌o toǒnu, pa glè sî̌ya hèyî̤pesǒ alo̤mo̤ tò̤, pa cû̌ hè kû̌po̤ kò dě alo̤mo̤ hò̌꤮.

² Ta̤ploshi awi̤akè̌, bè̌htò̌ cǔde dě kòlo̤ toǒ, ta̤si htûpwa̤ge, ta̤cèrò tûjûpwa̤ awi̤akè̌ htǒotoǒnu, pa lo̤bǎ sû̌ǐsî̌ya sělěpe pana̤ tò̤.

³ Cǒmara dè plûcû̌ sělě pa hî̌dě pa kè̌lǎ sî̌yahè plǒpo̤ nû̌û ta̤sû̌ǐtòwòǐ htě adû̌ayǒ toǒ dě alo̤mo̤ tokho pě.

⁴ Kòyò htě a wîkè ata̤yṳ toǒnu, asî shò̌lò̤gejòpe asò̌ dǐkhò̌꤮ tò̤. Dě nukha, asî sî̌yahto Cǒmara a ta̤te̤ta̤mǎ toǒ hǒ. Asî kè̌shǐ sî̌yahèbǎhto Cǒmara asû dě a nî̤bǎplǒkû̌hto Běcǎ sǎcahtǐ ta kòyò ahǔwa̤ hǒ.

⁵ Cǒmara ale̤ayo̤nu, awǒ mè̤mè̤̌ numî̌ asî sî̌yahèhto hǒ. Asî kè̌shǐhèbǎkû̌hto Cǒmara a ta̤po̤ta̤phǎ shû̌sho dě a ǒlṳhtò̌ bǎ kò htû̌꤮ anǒkòpě tuhtunu toǒ hǒ.

⁶ Asî dè kè̌shǐhèbǎhto ta̤htǒotoǒ dě a dè htû̌tiwǐ cû̌khǒkè ta Cǒmara hî̌nu, a shò̌lò̤sû̌shò̌lò̤sò̌ gejòpe asò̌ dǐkhò̌꤮ tò̤. Htǒonumî̌ asǒsǒta asî htǎwa̤sigesǒ Cǒmara aphû̌khû nò̌dòhtǔlo̤ dě a ma̤ sòwò̤kè Běcǎ Ye̤shǔ kòyò tṳ̂prṳ̂taphǎ alo̤mo̤ hǒ.

⁷ Pwa̤yṳǎphû̌ htě alò̤ta hǎkhû̌ dě a cî̌o sala̤la̤ khwè̌shi dě a nosǎhtò̌wî̤ sǎhtò̌wǒ bǎ pwa̤ma̤ǎhǔkla ma̤ǎlè̤phû̌ aya toǒnu, Cǒmara howi̤ asî pě.

⁸ Pwǎ̤tadě hǎkhû̌htǒo a dè nodǒhtò̌ pwǎ ta̤shî̌shǒmṳ ta jojijopò̤mṳ toǒpwǎ hî̌numî̌, abwǐ ǒ dǐcǎ꤮ tò̤. Yî̤hǒtò̤nu Cǒmara cèrò asî dě a shû̌gèkè asî ta mî̌ pě.

⁹ Pwǎ̤tadě khobǒsû̌ sî꤮, pa hî̌ pwǐhè̌o pwǎ̤tadě pa yṳǎpwǎ sî. Pa yṳǎ mè̤mè̤̌ ta sî ma̤pwǎ ta̤wǒ toǒ pě. Ta̤wǒ htǒotoǒnu, a hè dě sî nî̤bǎ ta̤ma̤lû̌htò̌ge htǒonu a ǒ pwǎ.

¹⁰ Cǒmara mî̌ a ma̤pwǎ ta̤cǒta̤tè̤. Ta̤ma̤wǒ htě sî ma̤hto toǒnu a shope̤ tò̤. Ta̤mo̤ǐ htě sî dǔlṳhto yǎya ta sî ma̤jè akòyò toǒ dě sî ma̤jè sělěpe asî htǒonu a shope̤pe tò̤.

¹¹ Pa ta̤sò̌yṳ mî̌ pwǐhè̌o: ma̤pûhǐ ta̤wǒ htě sî sò̌phlǒhtû ǒpo̤kè̌shuǐ toǒ lǒhtò̌behtò̌ bǎ sî ayanu, pa sò̌yṳ ta sî pṳ̂̌꤮ tapwa̤ glè sò̌phlǒsho ma̤to̤ lǒkho agutṳ pwǐ sî ma̤hto htǒonu.

¹² Pa sò̌yṳ nohtû sî kòyò cè̌klè tò̤. Mî̌tanu pa sò̌yṳ nosǒsǒkû̌ sî pwǐ kòyò htě a yṳǎ dě a khòsò̌do ta̤ khònò̤ htǒo toǒnu pwǎ. Dě kòyò htǒotoǒ ma̤hǐnu akhû̌akhî, asî nî̤bǎ lǒkho Cǒmara a ta̤olò̤nu toǒ pě.

Cǒmara a ta̤olò̤ mî̌ a te̤mǎ

¹³ Bǎ Cǒmara olò̤ ata̤hî̌bǎ tûmû ta Abraham akhanu, a bèhto ayo̤ ta a glè ma̤ pwǐ a olò̤nu. Kòyò htě adû̌khlo nû̌ûnu a ǒ dǐpwǎ̤꤮ tò̤ akhû̌akhî, bǎ a bèlò̤ ayo̤ akha, a htò tû̌pwǎ ami̤.

¹⁴ Cǒmara hî̌ yǎ, “He olò̤ na ta he glè howi̤ na, he noǒplṳ̂ǒphǎ nakhlinalè toǒ pě,” a hî̌ nû̌û hǐnu.

¹⁵ Abraham ǒpo̤ khòsò̌doǐ, dě anǒkònu a nî̤bǎ Cǒmara olò̤ nû̌ûyo̤nu tûmû.

¹⁶ Bǎ kòyò tapwa̤pwa̤ sò̌yṳ ǐsî̌ya bǎ kò ta a ta̤hî̌bǎ htǒonumî̌ a topwǎ akhanu, a bè a ta̤hî̌bǎ htǒonu ta kòyò htě a ǒ ta apo̤aphǎ shû̌sho tapwa̤pwa̤ ami̤. Ma̤tè̤hî̌dě, a dè bè hǐnu hî̌dě, a ma̤ ǒkǔkè ta̤ma̤nî̤ nû̌û.

¹⁷ Kòyò htě a nî̤bǎ Cǒmara a ta̤olò̤ toǒnu, Cǒmara sò̌yṳ nosî̌ya te̤mǎ asî ta pwǐ Cǒmara olò̤hto asînu, a ma̤ lǒbe hǐnu pě, a htû̌lè̌ tèplè̌kî̌yape tò̤ akhû̌akhî, dě a ta̤olò̤ akûnu, a bè nṳpa ayo̤ bǎnu.

¹⁸ Hǐnudě Cǒmara ǐbò pa a ta̤olò̤ ta a ta̤bèlò̤ ayo̤htǒo ginǐ̤cǎbò hǒ. Cǒmara lòhojòtò̤ akhû̌akhî, htǒoginǐ̤cǎnu a htû̌lè̌tèplè̌ kî̌yajò tò̤tò̤. Pa khlè̌ tûdû to̤hǔbǐ Cǒmara a ǒ toǒnu, Cǒmara htû̌lè̌tèplè̌ kî̌yajòpe a ta̤olò̤ tò̤ akhû̌akhî, pa sò̌phlǒmo̤ sò̌phlǒshû̌htò̌ mè̤mè̤̌. Dě pa sò̌phlǒmo̤ sò̌phlǒshû̌ akhû̌akhî, ta̤kè̌shuǐ htě Cǒmara ǐ pahtǒonu, pa pṳ̂měǐ sělě to̤bò̌ agutṳ hǒ.

¹⁹ Pa ta̤kè̌shuǐ htǒonu alò̤ta lo̤dû̌ htě a cǐmě ǒkǔ sǒkhlidû̌ ta pa ta̤htûpwa̤ aya htǒotamanu hǒ. Pwǐ pwa̤lṳhtò̌ hǐkǒdû̌gutṳ̌nu tapwa̤ nṳcû̌ tûlû̌bò̌ ta hǔgòpwî̌ bědû̌ htě kò codǐdòbǐ yǎta ta̤lṳhtò̌hokûnu tṳpṳ, dě pwǐ a nṳto̤ dě ta̤gûla̤ cahtǐakû htǒonu, pa ta̤kè̌shuǐ htǒo a měgle, a te̤mǎ, dě a sûnṳ to̤kû̌ pa dě Cǒmara alo̤mo̤ hǐnuhǒ.

²⁰ Ye̤shǔ cû̌nṳwǐ bǎ pagûla̤ dě alo̤mo̤ hǒ. A htû bǎ pa pwa̤lṳhtò̌ta̤ hǐkǒdû̌gutṳ̌ htě a ǒ khòyî̤ tûjûpwa̤ htǒonuhǒ. A htǒonu alò̤ta pwa̤lṳhtò̌ta̤ Malakhǐsèdè̌ dě nukha tapwa̤ hǒ.