Psalm 6 - BIBLE MUTAL

Sie Pre In Suk Kasru In Pacl Koluk

[Psalm lal David]

¹ O LEUM GOD, nik kom kutongyu in mulat lom, Ku kaiyu in kasrkusrak lom.

² O LEUM GOD, pakomutuk tuh nga arulana totola. Ase ku nu sik tuh nga munaslana,

³ Ac ngunik arulana foroti. O LEUM GOD, kom ac tupan putaka?

⁴ LEUM GOD, fahsru ac moliyula; Loangeyula liki misa, ke lungkulang lom.

⁵ In facl sin mwet misa wangin esamyom. Wangin mwet ac kaksakin kom ingo.

⁶ Nga totola ke sripen asor luk; Fong nukewa mwe oan kiuk sroksrok ke sroninmutuk, Ac ilul luk uh sroksroki ke tung luk.

⁷ Nga koflana ngetnget wo; Mutuk fafwak Ke tungiyen orekma lun mwet lokoalok luk.

⁸ Fahsr likiyu, kowos mwet orekma koluk! LEUM GOD El lohng pusren tung luk;

⁹ El lipsre pusren kwafe luk, Ac El ac fah topuk pre luk.

¹⁰ Mwet lokoalok luk elos ac fah pulakin mwekin lulap ke kutangyukla elos; Elos fah sa na in akfohsyeyukyak ac lillilla.