Psalm 5 - BIBLE MUTAL

Sie Pre Ma Siyuk Ke Karinginyuk

[Psalm lal David]

¹ Porongo kas luk, O LEUM GOD, Ac lohng sasao luk.

² Lohng pusren tung luk ke nga pang nu sum, O God luk ac tokosra luk! Nga pre nu sum, O LEUM GOD.

³ Kom lohng pusrek ke lotutang, Ke faht uh takak nga oru pre luk Ac soano top lom.

⁴ Kom tia sie God su insewowo ke ma koluk, Ac kom tia lela mwet koluk in muta yurum.

⁵ Kom tia lela mwet enum in kaskas in tu ye motom, Ac kom srunga mwet koluk nukewa.

⁶ Kom kunausla mwet nukewa su kaskas kikiap Ac kom kwase mwet akmas ac mwet sulallal.

⁷ Tuh ke sripen lungse yohk lom Nga ku in utyak nu in lohm sum. Nga ku in alu in Tempul mutal sum Ac epasr nu sum ke nga sunakin kom.

⁸ LEUM GOD, arulana pukanten mwet lokoalok luk! Kolyu tuh nga in oru ma lungse lom. Oru tuh in kalem sik inkanek lom nga in fahsr kac.

⁹ Kas ma mwet lokoalok luk elos fahk, tia ku in lulalfongiyuk; Elos lungsena kunausla. Kas lalos emwem ac aklukuk, Tusruktu ma inge mwe na kolla mwet nu ke misa.

¹⁰ O God, sang mwatalos ac kaelos; Lela tuh pwapa koluk lalos in kunauselosla sifacna. Luselosyak liki ye motom Ke sripen ma koluk pus lalos Ac ke sripen elos lain kom.

¹¹ A elos nukewa su konauk molela yurum fah enganak; Elos in on ac engan pacl nukewa. Karinganulosyang su lungse kom; Ke sripom elos arulana engan.

¹² O LEUM GOD, kom akinsewowoyalos su akos kom; Lungse lom karinganulos oana sie mwe loeyuk.