Psalm 3 - BIBLE MUTAL

Sie Pre In Suk Kasru Ke Lotutang

[Psalm lal David, ke el Kaingkunul Absalom, Wen natul]

¹ O LEUM GOD, puslana mwet lokoalok luk, Pusenina mwet tuyak lainyu!

² Elos kaskas keik ac fahk, “God El ac tia kasrel.”

³ Tusruktu, O LEUM GOD, kom mwe loang luk liki ongoiya in pacl e nukewa. Kom ase nu sik kutangla, Ac akpulaikyeyu.

⁴ Nga pang nu sin LEUM GOD tuh elan kasreyu, Ac El topukyu liki eol mutal sel.

⁵ Nga ona ac motulla, Ac LEUM GOD El karinginyu nwe ke nga ngutalik.

⁶ Nga tia sangeng sin tausin mwet lokoalok Su rauniyula yen nukewa.

⁷ Fahsru, LEUM GOD! Moliyula, God luk! Kom kai mwet lokoalok luk nukewa Ac akmunasyalos, na wangin ku lalos in aklokoalokyeyu.

⁸ Kutangla tuku sin LEUM GOD— Lela tuh Elan akinsewowoye mwet lal.