Psalm 24 - BIBLE MUTAL

Sie Tokosra Fulat

[Psalm lal David]

¹ Faclu ac koano ma lun LEUM GOD; Faclu ac elos nukewa su muta fac ma pac lun LEUM GOD.

² El tulokinya fin kof lulap ye faclu, Ac oakiya ke acn loal meoa.

³ Su ac fah ku in fanyak nu fineol sin LEUM GOD? Ac su ac ku in utyak nu in acn mutal sel?

⁴ El su nasnas pao ac mutal insia; El tia alu nu ke ma sruloala Ku orek wulela kikiap.

⁵ LEUM GOD, su langoella, El ac fah akinsewowoyal ac fahkak lah wangin mwatal.

⁶ Mwet ouinge pa elos su sokol, Su suk in tuku nu ye mutun God lal Jacob.

⁷ Keyak sifowos, O kowos mutunpot; Ac srukak na nu lucng, kowos mutunpot omeet me, Tuh Tokosra lun wolana Elan utyak.

⁸ Su Tokosra lun wolana? LEUM GOD su ku ac kulana, LEUM GOD su kutangla ke mweun.

⁹ Keyak sifowos, O kowos mutunpot; Ac srukak na nu lucng, kowos mutunpot omeet me, Tuh Tokosra lun wolana Elan utyak.

¹⁰ Su Tokosra lun wolana? LEUM GOD lun un mwe mweun — El pa Tokosra lun wolana!