PHILEMON 1 - ÜJAO LAITEP (BSI)

Mongmei Langwin

¹ Paul, Jesu Khrista jingne küppe angpupa, hüyange jeiheinao Timothy mepu: Toman jamshe shaoshanpa Philemon tangte,

² hüyange teman nyaheinao Apphia, hüyange teman phei shaoshanpa kengphet Arkhipas, hüyange nenok me jempu bumeinoklan üshei tangte:

³ Teman Üpa Kahwang hüyange Youngwanpa Jesu Khrista mepu numan tangte shüpshe hüyange chingmei ngohtüoh.

Philemon-e Kenpu Hüyange Ütinglakpu

⁴ Taowe aope ü-yoppu me nang teihtüoyapeih taowe Ü-Kahwangte jinte minyong nang;

⁵ hangjingne Youngwanpa Jesu Khrista hüyange üjaolan üsheite nange kenpu hüyange ütinglakpu jeng, taowe jainang;

⁶ hüyange nang ütinglakpu shüppeshapu nangme ngohpu ümei üshei jeng shingpu Khrista tangte ümei ngai oklak jingne taowe yopnang.

⁷ Hangjingne, jeiheinao, nange kenpu me tao yeonge mongmei nang hüyange toloimei tüonang, hangjingne nang kaiye üjaolan mongjang jaowetam.

Onesimus Jingne Paul-e Tongpu

⁸ Tüokhei hanghe wongpong tüopa jeng nangte ngaokeng phalak Khrista me tao yeonge wongnange ngohyapoi,

⁹ tüoyangpoi tao, Paul, wupa (lampu toishaoshanpa), hüyange sha-a Khrista Jesu jingne küpnok me ngohpupa ne menge, kenlak jingne, taowe nangte tonghuwe teih-e,

¹⁰ ü-küppu nokme puhpu Üha Onesimus jingne nangte tongnang.

¹¹ I hipak ja me nang jingne wongpong ne yejepe ngohyangki, hüpoi sha-a nang jingne hüyange üjingne wongpong ne ngohnang.

¹² I ao ü-yoi mongjangkih ngohnang, I taowe nang tangte yene tamnang.

¹³ Pungao ümei jingne tao küppu nok me ngohwante, nang nanleiye Iye üte jamlak jingne taowe ü-phei anghuwe teihngoh;

¹⁴ hüpoi nange meipu kange yeje, hüpoi mongonge linglak jingne taowe nange mongpu ye-ompe hango yelinghu.

¹⁵ Hangjingne nange I jintepu jingne yahyelak jingne, nang mepu I ütenjapu mongme yanne ngoh;

¹⁶ shaaji rhapakih yeje, hüpoi rhapa phei shenyeipu kenpu jeiheinao, ünyei ne üjingne shekenpu, hüpoi iy mei hei Youngwanpa moini me nang te ünyei shekenlak.

¹⁷ Hümma-a nange üte nang taopakih teihma-a; nange tao yahpu kih teihyange I yahtüoh.

¹⁸ Hüpoi Iye nangte ülamja yemeipe jonne ngohma-a, yejema-a pheeisea shaohyange ngohma-a, hümma-a tüowa üjingne mengetam tüoh.

¹⁹ Hatüo tao Paul, üyakke nyannang, taowe shümlakei, ütingme pheeisea kih nange üte yoi nying nyingke phalakne ngohpupa-a taowe nangte ye i.

²⁰ Eihyang, jeiheinao, Youngwanpa me nang meipu jenge ümong meine tamtüoh. Khrista me ü-mongjang maawe jao tampha!

²¹ Nange ngaojaipu me yeonge monghüm-e, hüyange taowe hanghe inang tüo tokte kaiye nange linglak she shinge, taowe, nang tangte nyannang.

²² Tüophei me jam üjingne ngoilak nyoijing ja tümme angkei, hangjingne numan-e yoppu kaiye numan tangte tao shonlak she taowe monghüm nang.

Ükümpa Salam

²³ Epaphras, Khrista me ü-taopa küppe ngohpupawe nangte salam phanang;

²⁴ hüyange Mark, Aristarkhas, Demas, hüyange Luk, üpheipu ü-taopalanne hükemuh inang.

²⁵ Teman Youngwanpa Jesu Khrista shüpshe numan yaha phei ngohtüoh. Amen.