MARK 3 - ÜJAO LAITEP (BSI)

Yimdak Yak Pheipu Kahta

¹ Tüophei me üne-o Jesu synagogue te leih ye, hüyange tüome yimdak yak pheipu kahta ja ngoh.

² Sabbath me kahta ütam meitam yashi she, Jesu ümeng pholak jingne tüome kahta ütam yeonge kentinge leiye ngoh yangki.

³ Yak mangteiye ngohpu kahta te Jesuwe i, “Sheshao ye me tüome yongtüoh.”

⁴ Tüophei me Iye kahtalante tong, “Teman ngaokhüm me Sabbath me hang lingtüoh she ipu shi? Ümeng heiya ümei: Kahta üyinja yinlak heiya toilak?” Hüpoi iman-e ngaopha ja nehoi yengai.

⁵ Imante leiye pongyange Jesu yeonge mongshih ngai, hüpoi hüwante muh iman juteih yenangpu hei yeshupu ngeyange I yayenge teih. Tüophei me kahtate Jesuwe i, “Nang yak lantüoh.” Iye yoi yak lan hüyange mei.

⁶ Phariseelan synagogue mepu mamshe yayonge tai hüyange mamshe Herod pinlan phei hüo; hüyange Jesu toilak jingne iman-e kon yam.

Yengchingnah Me Bangha

⁷ Jesu hüyange I pinlan Galilee yengnah yete tai, hüyange kahta üngang I phei te woi. Iman Galilee mepu, Judea mepu,

⁸ Jerusalem mepu, Idumea yikeng mepu, jayekao Jordan yikeng mepu, Sidon hei Tyre chingnyu chingyo yupi mepu pei. Iye lingpu toishao iman-e jaiyange kahta üngang Jesu tangte pei.

⁹ Ükhong jamloi yong hüyange kahtalan-e Ite shunglak shing; tüokhei I pinlante lisheng ja tümtüoh she Jesuwe i.

¹⁰ Hangjingne Iye kahtalan maawe meitam, hüyange dakpalan üshei imante jonne tamlak jingne tei shunge pei.

¹¹ Hüyange aope iman me ünu yaha ngohpalan-e I nge, I sheshao me lamme ta hüyange üngwün, “Nanga Kahwang üha!”

¹² Hüpoi I aoweih yengailak jingne ünu yahate Jesuwe meimei-e i.

Jesuwe Pinlan Penme Ni Le

¹³ Tüophei me Jesu kahtang te ong hüyange Iye mongpu kahtalan I tangte nyik, hüyange I tangte iman pei;

¹⁴ hüyange Iye penme ni ngoiye le, imante Iye lampulan she min. Iye imante i, “Numan ü-phei ngohlak jingne Taowe numan leyangki.” “Konnyüolak jingne-o Taowe numan shonne teilak.”

¹⁵ Hüyange laalan jange teilak wong numan me ngohlak.

¹⁶ Iye lepu penme ni tüolan ngohnang; Simon (Jesuwe Ite Peter she min);

¹⁷ Zebedee üha Jeams hei Jeams ünao John (Jesuwe imnite Boanerges she min pha, leppu “Wangkhong halan”).

¹⁸ Andrew, Philip, Bartholomeo, Mattheu, Thomas, Alphaeus üha Jeams, Thaddaeus, Kana mepu Simon,

¹⁹ hüyange Judas Iskariot, aowe I lopa ne meng.

Jesu Hüyange Beelzebul

²⁰ Tüophei me Jesu nokte ye. Üne-o kahta üngang jem; Jesu hüyange I pinlan hahlak hipak nehoi yetüo.

²¹ Aope I noksalan-e tüopa ngaolan jai, I tükke anglak jingne iman yong, hangjingne “I mong pomteki” she kahtalan-e i.

²² Hüyange Jerusalem mepu laipu ngaokeng nyüopalan ütam-e hüke i, “I me Beelzebul ngoh nangja!” Ülaolan-e i, “Hatüowa laa ahngpa aowe Ite iman janglak wong pha.”

²³ Tüokhei Jesuwe I tangte kahtalan nyik hüyange imante ngaoleppu ütam i: “Satanne hangke satan jangpu oklak shi?

²⁴ Ahngching ja teitam yange tei hokma-a, tüopa ahngching yonge yengoh oklak.

²⁵ Hüyange noksa ja (ükhong ükhongne) teitam yange tei hokma-a, tüopa noksa yonge yengoh lak.

²⁶ Tüokhei satanlan ahngching teitampune mengma-a, yonge yengoh oklak, hüpoi leamlak hüyange üküm ngoilak.

²⁷ “Aowe-o Iye üwangne wongnangpu kahta phowe shayange ye-angpute, wongnangpu kahta nok mepu toinan nyieyahlak jingne ye-ong oklak.”

²⁸ Ütingme Taowe numante inang: kahta ühalan-e ünu üshei hüyange ngaomeng üshei hüyange iman-e hangshin me phoiwümyangki khongkümpu jingne ümeng winpu oklak.

²⁹ Hüpoi aowe Yaha Üjao phei tüi-e ngaomeng ngaoyangki, aope-o ümeng yewinlak, hangjingne Iye üküm yenangpu ünu omnang.

³⁰ Hangjingne, iman ütam-e Ime ünu yaha ngohnangki she ngao, tüokhei Jesuwe hüke ngao.

Jesu Inyu Hei Inaolan

³¹ Tüophei me Jesu Inyu hei Inaolan pei ngoi. Iman nokshao me yong hüyange kahta ütam shonne Ite i,

³² hangjingne I neikonne ükhong üyong shotte ngoh, hüyange iman-e Ite i, “Leihuyah, nangnyu hei nangnaolan nokshao me, hüyange iman-e nang yamnangki.”

³³ Jesuwe janne i, “Ünyu aoshi? Yejema-a ünaolan aoyin shi?”

³⁴ I neikonne shotte ngohpu kahtalante leiye pong hüyange i, “Leihu ünyu hei ünaolan tüome ngoh nang.

³⁵ Hang-jingne aoyinne Kahwange lengpu toi ling, I ünaolipa, ünaolinyu, hüyange ünyu.”