MARK 2 - ÜJAO LAITEP (BSI)

Yimtin Dakpu Kahta Ja Meitampu

¹ Aope nyih üjingha yanyange Kapernaum te Jesu leih ye, hüyange I nokme ngohnangki she ngaolan jai.

² Tüophei me noksa me hüyange tafün shong me lünne nyoi yenangpe kahta üngang jem. Hüwante Jesuwe imante konnyüo;

³ aope kahta ütam peipu nge, hüke kahta peliye yimtin dakpu kahta ja paiye pei.

⁴ Jamloi kahta maapu nanjingne iman-e Jesu tangte I yepei ok. Tüokhei Jesu shotte ngohpu nyoi phei shuwe iman-e noktok lüo. Aope iman-e noktok lüowe sho, iman-e yimtin dakpu kahta lengme yeitai.

⁵ Aope iman ütinglakpu Jesuwe nge, hüyange yimtin dakpate i, “Üha, nang ünu winyangki.”

⁶ Hüwante ngaokeng nyüopalan ütam shotte ngoh hüyange iman nying nyingke hüke teih:

⁷ “Tüopa kahtawe hangne hüke phoiwüm-e ngaopu shi? Kahwang tokte aowe-o ümeng winpu ye-ok!”

⁸ Iman-e hanghe teihyange teingao Jesuwe I yaha me mamshe shing, hüyange Iye imante i; “Numan mongjang me hüke hangne teihpu shi?

⁹ Yimtin dakpate, ‘Nang ünulan winyangki’, she ipu she o lak heiya, yejema-a ‘Lüotüoh, nang leng paiyah, hüyange kemtüoh’ she ipu shemeilak shi?

¹⁰ Hüpoi kahtoknyu me ünulan ümeng winpu oklak Kahta Üha me wong ngoh nang she numan-e shinglak nanjingne”—Iye yimtin dakpate i,

¹¹ “Taowe nangte inang, lüotüoh, nang leng paiyah, hüyange nokte yetüoh;”

¹² Iman üsheiye leiye ngohwante, tüopa kahta lüo. I leng pai hüyange mamme nokte ye. Iman üshei lanshe yashan hüyange Kahwang minyonge hüke i, “Toman-e hükihpu toi aope-o jeman nge!”

Jesuwe Levi Nyikpu

¹³ Jesu üne-o Galilee yengnah yete leihye. I tangte bangha pei hüyange Iye imante konnyüo ne ükong wang.

¹⁴ I kemjang kemme ngohwante, Alphaeus üha Levi kahngin shaipa ja, I nyoijing me shotyange Iye nge. Jesuwe Ite ngaowe i, “Ü-pheite woikei.” Levi yayong hüyange I phei te woi.

¹⁵ Tüophei me Levi nok me Jesuwe nük hah. Kahngin shaipalan hüyange ünulan Jesu pheite woipu maawe ngoh, hüyange iman yo me ütam hüyange I pinlan-o omme shot.

¹⁶ Aope ngaokeng nyüopalan ütam aoyin Pharisee ne ngoh, iman-e ünulan hüyange kahngin shaipalan phei Jesu hahpu nge; tüokhei iman-e pinlante tong, “Hangne Iye kahngin shaipalan hüyange ünulan phei hahpu shi?”

¹⁷ Aope Jesuwe iman ngao jai hüyange imante janne i; “Meiye ngohpu kahta lanne soihüngpa wongpong ne yeje: hüpoi aoyin dakyapeih tüolan jingne hei wongpong. Khakshuwe ngohpalan nyiklak jingne yeje, hüpoi ünulan jingne tao pei.”

Nyaolepu Jeng Tongpu

¹⁸ Sha-a baptipa John pinlan hüyange Pharisee lan nyaolepu ngoh. Kahta ütam Jesu tangte pei hüyange Ite tong, “Hangne baptipa John pinlan hei Phariseelan nyaole, hüpoi nang pinlan-e hangne nyaolepu üya?”

¹⁹ Jesuwe imante janne i: “Nokyam mo te peipu shümpalan nyemthepa phei ngohyange nyaolelak a?” Nyemthepa iman phei jamme ngohphei ma-a aope-o nyaolelak yeje.

²⁰ Hüpoi hipak ja peilak aope nyemthepa iman mepu yahteilakei, aope tüonyih peilakeih, iman nyaolelak.

²¹ “Phakshao ülang me nye üla aowe-o yeshing. Hüpoi ütamme shingma-a, üla shingpulan ülango omme hitte phünkülak.

²² Yejema-a ütamme wuwüngti üla meishotük ülang me hinma-a, wuwüngti ülawe meisho phüplak, hüyange wuwüngti üla hei meisho khok moini menglak. Yeje! Meishotük üla-a wuwüngti üla jingne!”

Sabbath Jeng Tongpu

²³ Sabbath ja me Jesu kah ütam linne kemmetai. I phei te woipu I pinlanne tahlick yütte yah.

²⁴ Tüokhei Phariseelan-e Jesute hüke i, “Leitüoh, Sabbath ngaokhüm phei yeshupe hangne iman-e lingpu?”

²⁵ Jesuwe jan; “Iye hahlak ütam ja wongpong ne mengwante David-e hanghe ling numan-e iya shi? I hüyange I pheipulan seanyao,

²⁶ tüokhei Kahwang nokte I pei hüyange Kahwang jingne phapu an Iye hah. Tüopa-a Abiathar ütahpa ngengpa ne mengwante ngaiyangki. Toman wanglam me ütahpa ngengpalan-e hei tüopa an hahlak, hüpoi David-e tüopa hah, hüyange I pheipu lante nehoi pha.”

²⁷ Hüyange Iye imante i, “Sabbath kahta jingne lingyangki; Sabbath jingne kahta lingpu ne yeje.

²⁸ Tüokhei Kahta Üha-a Sabbath jingne-o Youngwanpa.”