DANIEL 2 - ÜJAO LAITEP (BSI)

Nebuchadnezzar Shinmang

¹ Nebuchadnezzar ahngne mengpu wangpeng ni shepupa me, Iye shinmang ja mang. Tüowe I loishe mongshangne tam hüyange I shipu ye-ok;

² tüokhei Iye yaknyanleipalan, yepahipalan, phongyengpalan, hüyange hi-nganlan peiye Ite Iye mangyangpu shinmang khoih ilak jingne nyik-e tei. Aope iman peingoi hüyange ahngpa sheshao me yong;

³ Iye imante i, “Taowe mangyangpu shinmang jingne tao mongshang nangki. Tüopa-a hanghete leppu taowe shinghu nangki.”

⁴ Iman-e ahngpate Aramaic ngao me jan, “Nang üyongpa, jintepu jingne üyin ngohtüoh! Tomante nang mangpu ipha, hüyange tüopa-a toman-e nangte khoih itamlak.”

⁵ Ahngpawe shanha-itpalante i, “Taowe hüke monge yahteki, numan-e üte tao mangyangpu shinmanga itamlak hüyange tüopate leppuwa hanghe üte ipha. Numan-e ye-i-okma-a, taowe numan yungja phei me ja she phakke khoihlak hüyange numanjing noklan-a mette heamne tamlak.

⁶ Hüpoi numan-e ü-shinmang hüyange tüopate leppu moini üte iye tamma-a, taowe numante minyong phapu üyong phei hünghao phalak. Hüma-a sha-a shinmanga hanghe hüyange tüopate leppu hanghe üte ipha.”

⁷ Iman-e ahngpa te nishe jan, “Nang üyongpawe-hi shinmanga hanghe tomante ima-a, toman-e tüopa-a khoih ilak.”

⁸ Hüwante ahngpawe üngwün, “Taowe teihyangpu kih-e ngainang! Numan-e hipak tükke anglak jingne ngangnang, hangjingne ima-a numan-e üte shinmanga ye-i-ma-a,

⁹ numan lilite taowe ja kihpu shaoshiyateng phakülak she numan-e ngenang. Numan-e numan nying nyingke üte yelakpe tahleih iye ngohlak hüwante juwan-a jeileikülak she numan-e monge tümnang. Shinmanga hangheke ngohyangpu shi üte ipha, hümme nakshih tüopate leppu hanghe shi numan-e ikülak she taowe shinglak.”

¹⁰ Üyonglan-e janne i, “Nange hanghe shinghuya peih üyongpa nangte iye oklak kahtoknyu me ao-o yenang. Ao ahngpawe-o üshei phei üyongpa hüyange wong shenangpupawe-o hükihpu juteih Ijing yaknyan leipalan, yepahipalan, hüyange hi-nganlante jemantongja.

¹¹ Hanghepa jingne nang üyongpawe tongnang tüopa-a jamloi wantepuwe kahwanglan tokte kaiye aowe-o ye-i-oklak, hüyange kahwanglan-a kahta yo me yenyoi.”

¹² Hülan ngaote ahngpa jamloi mongshih ngai hüyange Babilon ahngnok lwngwanglan khongkümpu toilak jingne ngaokeng pha.

¹³ Tüokhei Daniel hüyange I shümpalan-o omme iman khongküm toilak jingne ngaokeng pha.

¹⁴ Hüwante ahngpa yompalan woipa Arioch, ao te toilak jingne ngaokeng phapu jonne tailak jingne ngaokeng phayange ngoh tüopa tangte Daniel wen. Iye ngaowa kentinge teihyange,

¹⁵ woipa Ariochte tong, hangne ahngpawe hükihpu yemeipu ngaokeng heh-e phapu. Tüokhei Arioch-e Danielte hanghe ngaiyangki iye tam.

¹⁶ Daniel mamshe ong hüyange hipak paowe yahlak jingne ahngpa mepu o-ngao yah, tüokaiye shinmangte leppu hanghe Iye ahngpate ipu oklak.

Nebuchadnezzar Shinmang Kahwange Hüowetam

¹⁷ Tüophei me Daniel nokte ye hüyange hanghe ngai tüopa jeng I shümpalan Hananiah, Mishael, hüyange Azariahlante i.

¹⁸ Iye imante shüpshe pha she wangdang Kahwangte yoplak jingne ngao hüyange Ite kahnying wüngha imante khoih ilak jingne tonglak hümme nakshih Babilon mepu konheingao pheipulan phei jamme iman yetoilak.

¹⁹ Hüwante tüoya muh kahnyingwüngha-a himang me Danielte ütahte ngai, hüyange Iye wangdang Kahwangte minyongpu pha

²⁰ Daniel-e ngao: “Kahwang-a konjong hüyange üngan ülong phei! Jin jintepu jingne Ite yihlu tüoh.

²¹ Iye hipak hüyange juwan itte sheamnang; Iye ahngpalan yah angnang hüyange yah teinang; aowe konjong hüyange shingeokpu phanang tüowa I ngohnang.

²² Hanghepa lupu hüyange kahnyingwüngha toishaolan ngohnang Iye ütahte ngai tamnang, wangnyak me hanghepa lowe angnang Iye shingnang, hüyange I me yoi nying nyingke wangngaiye neikon yange ngohnang.

²³ Taowe nangte yihlupu phanang hüyange nangte yihnoon nang, Ü-pajeiyonglan Kahwang. Nange üte konjong hüyange wong phayangki; taowe yoppute nange janyangki hüyange ahngpate hanghe ilak tomante hüowe tamteki.”

Daniel-e Shinmang Lüppe Tam

²⁴ Tüokhei Arioch, ao te ahngpawe ahngnokte tongtahpalan toilak ngaokeng pha tüopa tangte Daniel wen. Iye Ite i, “Iman li ne tahtam. Ahngpa tangte tao teipha, hüyange I shinmang hanghete leppu taowe Ite iye tamlak.”

²⁵ Nünge mamshe Arioch-e ahngpa Nebuchadnezzar shongte Daniel yahpei hüyange ahngpate i, “Jehudi chingtaiye ngohpalan yo mepu ja, aowe nang üyongpa shinmangte leppu nangte iye oklak taowe tüoteki.”

²⁶ Ahngpawe Daniel (ao te Belteshazzar she-o nyik) te i, “Taowe hanghe mangyangki hüyange tüopate leppu hanghe nange üte ipu oklak a?”

²⁷ Daniel-e jan, “Nang Üyongpa, hi-ngan, yepahipalan, yaknyanleipa, yejema-a shanha-itpalan, aowe-o tüopa jeng nangte iye oklak ao-o yenang.

²⁸ Hüpoi wangdang me Kahwang ja ngohnang, aowe kahnyingwüngha ütahte ngaitam nang. Nang Üyongpa, ngoikülak hipak me hanghe ngailak Iye shingne tamnang. Sha-a nang mangyangpu, nang aope shiye ngohwante nange himang nge taowe nangte ipha ning.

²⁹ “Aope Nang Üyongpa shiye ngoh, nange ngoikülak hipak jingne mangyangki: hüyange Kahwang, aowe kahnyingwüngha ütahte ngaiye, hanghe ngaine ngoh tüopa jeng nangte hüoyangki.

³⁰ Sha-a, tüopa kahnyingwüngha üte ütahte ngaiye tam, ülaolan phei tao ünyei kentamongtingpu jingne yeje, tüoyangpoi Nang Üyongpawe nange mangyangpute leppu shinge oklak jingne hüyange nangte hanghepa peiyangki tüopa juteih shinge yahlak jingne ngaiye tam.”

³¹ “Nang Üyongpa, nangjing himang me nange nang sheshao me yeonge yongpu peshao (mieng) phihlangpu hei müktishiwapu phei, hüyange leilak jingne fajümlihlakpa ne yong yange ngeyangki.

³² Tüopa üshanga shemeipupa hon phei lingyange; tüopatepu jakuh hei yaksea khüm phei lingyange; tüopatepu shieng hei yungshaoh-a shakphan yan phei;

³³ tüopatepu ya-a yan, hüyange tüopa tepu yatok tamme shonge yan hüyange tamme shonge-a kümp ne ngohyangki.

³⁴ Aope nange tüopate leiye ngoh, aowe-o yejonpute longwak mepu longnyulapa khüwta-e peshao yatok yan hei kümp pheipute shah-hüt hüyange tüolan-a khoihnyai-e paitam.

³⁵ Mokhshe yan, kümp, shakphan yan, khüm, hüyange hon khüwküm hüyange jüohipak mepu tahnoijing mepu kahmak kih-e mengemah. Ümee nehoi yetüohpe wangyange tüopa-a khongkümpu yahteiye küm. Hüpoi peshao paikhoih ne tampu tüopa longa kahtoknyu nopute yüoh-e kahmüoh üyong ja ne jonge ngai.”

³⁶ “Shinmanga tüone ngohyangki. Sha-a nang üyongpa, tüopate leppu hanghe taowe ipha ning.

³⁷ Nang Üyongpa, nanga ahngpalan üshei yo me sheyongpupa. Wangdang Kahwange nang ahngyongne linge tam hüyange nangte üngan, wong üyong, hüyange yihnoonpu pha.

³⁸ Iye nanga kahtoknyu me nyoipu üshei tangme wanglam lampane hüyange yinmok hüyange awhalan üshei tangme wanglam lampa ne linge tam. Hon üshanga nang.

³⁹ Nang tokphei me ahngching ülao ja, nang shinne kheyonge üjepe ngohlak; hüyange tüophei me lümshepupa, shakphan yan ahngching hanghepawe kahtoknyu nopute wanglam lamlak ngailak.

⁴⁰ Hüyange tüophei me peli shepupa ahngching yan wongnangpu shinne wongnangpu hangheye sheminlamphe küppe tamyange menge tamlak ngailak. Hüyange yanne khongkümpute küppe tampu kih-e, tüopawe küppe tamlak hüyange üwang yeme ngohpu ahngching lili menge winlak.

⁴¹ Nange üne-o yatok hei yalan lan-a tamme shonge kümp tamme shonge yan she ngeyangki. Tüopate leppuwa tamme shongpu ahngchinglan ngohlak. Tüopa me yan me ngohpu kihpu wong ütam ngohlak, hangjingne tüopa me kümp phei nyütyange yan ngohyangki.

⁴² Yalan tamme shonge yan hüyange tamme shonge kümp she ngohpute leppuwa ahngchinga ütam-a wongnange hüyange ahngching ütam-a wong yenangpe ngohlak.

⁴³ Nange üne-o yan-a kümp phei nyütyange-o ngeyangki. Tüote leppuwa tüolan ahngching mepu wanglam lampalan-e iman noksalan-a mata-tongningpu kaiye shüppe shalak jingne iman nganglak, hüpoi yan phei kümp nyütyange yengoh okpu kih-e iman-e ye-oklak.

⁴⁴ Tüolan wanglam lampalan hipak me wangdang Kahwange aope-o üküm yengoilak ahngching ja linglak. Tüopa-a aope-o mahne ye-oklak, tüoyangpoi tüolan ahngchinglanpa jaoshe-e mahtamlak, hüyange tüophei me jin jintepu jingne ngohlak.

⁴⁵ Nange aowe-o yejonpute longwak mepu long hangke khüw hüyange tüopawe hangke yan, shakphan yan, kümp, khüm hüyange hon phei lingpu peshaote shahtam, ngeyangki. Kahwang üyongpawe Nang üyongpate ngoikülak hipak me hanghe ngailak inang. Nange hangke mangyangki khakshuwe taowe nangte iyangki, hüyange tüopatepu ütingpa leppu nangte phayangki.”

Ahngpawe Danielte Khintak Pha

⁴⁶ Hüwante Ahngpa Nebuchadnezzar kahtokte khuhtawe khüm hüyange Danielte toidopu hüyange dopu phalak jingne ngaokeng pha.

⁴⁷ Ahngpawe i, “Nang Kahwang-a kahwanglan üshei phei sheyongpupa, ahngpalan tangme Youngwanpa, hüyange kahnyingwüngha ütahte ngaitampupa. Taowe tüopa shingnang hangjingne ima-a nange tüopa kahnyingwüngha khoih ipu okyangki.”

⁴⁸ Tüophei me Ahngpawe Danielte shotjing ütahpa pha, okkeshange lingpu hünghaolan üngang Ite pha, Babilon yenghoi tangme yakjongpa ne I menge tam, hüyange ahngnok tongtahpalan üshei tangme üshangpa ne I lingetam.

⁴⁹ Daniel-e yoppe tongpu kih-e ahngpawe Babilon yenghoi (province) wanglam lampu toishao me Shadrach, Meshach, hüyange Abednego ngohne tam; tüoyangpoi Daniel-a ahngnok ghonyoi memuh ngoh.