MARK 16 - Kok Borok (Re-edited) Bible (BSI)

Jisu thangwi bachamani

¹ Sabat sal pái kheno Magdalani Mariam, Jakobni buma Mariam tei Salomi Jisuni mango phulna hwnwi langi-thok motom pai lai kha.

² Kaitho Salni phungo katswi aisirisiri sal ka twtwi-o bórok mangkhoro tháng lai kha.

^3-4 Lama-o bórok bobo bono hai hwnwi sa lai tháng lai-o, “Duglamni a holongdapno chwngno sabo norwi rwnai?” (Abo holongdap kotorma se.) Aphuru bórok naharwi nai ba holongdap norjak.

⁵ Hakhe bórok mangkhoro habwi kha, aro rí kuphur kanjak sikla khoroksano yagra bwkhak achugwi tongma nugwi kha; hakhe bórok uanama hapjak kha.

⁶ Bo bórokno hai hwnwi sa kha, “Ta uana di, norok kruso kanta bujaknai Nasaretni Jisuno naitugo. Bo aro kwrwi kha-bo mwthangwi tisajak kha. Nai di, orono bórok bono tonmani

⁷ Tabuk tháng si di, bini sagrirokno hai hwnwi saui di, Pitornobo saui di, ‘Norokni slái swkang bo Galili-o thángnai, bo sama hai’-no norok bono aro nugwi anw.’ ”

⁸ Hakhe bórok kirima hapjagwi mangkhorni khárwi phai kha. Kirima hapma bai bórok kebono kók tháisa phano sa li ya. [

KÓK PÁITHAK (O kók Mark swimani Kothoma Kahamni ulo swijago) Magdalani Mariam bai Jisu nukjakmani

⁹ Kaitho Salni aisirisiri Jisu thangwi bachaui puila Magdalani Mariamno nukjak phai kha; bini bisingni’-no Jisu mwtai hamya maksni rwkhlai kha. A bwrwirok Pitor bai bini logisongrokni thani thángwi bórok sajakmani bebak kókno kisicha khe saui kha.

¹⁰ Mariam thángwi bini logisongrokno saui kha. Aphuru bórok muisubuk chaui kabwi tong laimani; Aboni ulo borok mwthangjak phlainani o tong phlainai kók kwtharno Jisu sak baithang bini sagrirokno khúk tẃi salkabai bai salthángbai bwkhak rohor kha.]

¹¹ hakhe Jisu thangcha phi kha, phiya Mariam bono nuk kha hwnwi sama khna khe bórok bono poito khlai li ya.

Sagri khoroknwi bai Jisu nukjakmani

¹² Aboni ulo bórokni bere khoroknwino Jisu tei potsa khe nukjak phai kha, a khoroknwi aphuru kami bwkhak him laijak.

¹³ Bórok kiphilwi omono teirokno saui kha, tamo khe bórok omono poito khlai li ya.

Sagri chisarok bai Jisu nukjakmani

¹⁴ Jotoni ulo Jisu sagri chisarokno bórok chá lai tong phuru nukjak phai kha. Bórokni poito kwrwini bagwi, phiya bo thangwi bachamano nuknairokni kókno poito khlaina nai yani bagwi bo bórokno khorai kha.

¹⁵ Bo bórokno hai hwnwi sa kha, “Tháng di, swngchar gwnangwi bebak borokni thani Kothoma Kaham pírwi di.

¹⁶ Poito khlaiwi baptisma wngnai borok bo’ se mwthangjaknai; poito khlai ya borok bo majra berjaknai.

¹⁷ Poito khlainairok bai omo tẃi soidomni samung phunukjak anw: Ani mungwi bórok mwtai hamya rwkhlainai, hámung sini ya kók sanai,

¹⁸ chibukno rom phano eba mungsa swk bis nung phano hamya wng glak: Bórok hamyarokni saka yak bera khe a hamyarok hamnai.”

Jisu chuknoha-o tisaui tlangjakmani

¹⁹ Bórok bai kók sa bai kheno Subrai Jisu chuknoha-o tisaui tlangjak kha, hakhe Kaitorni yagra bwkhak achugwi kha.

²⁰ Sagrirok thángwi ha gwnangwi pírwi kha, phiya Subrai bórok bai baksa samung khlaiwi bórok pírmano soidomni samung bai kubui khe phunuk kha.] [