Salmoù 5 - Bibl Koad 21: Ar Bibl e Brezhoneg evit ar Vretoned

Salm 5

¹ D'ar mestr-kaner; gant ar fleütoù; salm David.

² Ro da skouarn da'm gerioù, o AOTROU, selaou va c'hlemmvan!

³ Va Roue ha va Doue, bez evezhius ouzh mouezh va garm, rak te eo a bedan!

⁴ AOTROU, adalek ar beure e klevez va mouezh, adalek ar beure e troan war-zu ennout hag e sellan.

⁵ Rak n'out ket un Doue a gav plijadur en droug; an den fall ne vo ket o chom ganit.

⁶ An dud lorc'hus ne zalc'hont ket dirak da zaoulagad; kasaat a rez an holl vicherourien a zireizhder.

⁷ Lakaat a ri da vervel ar re a lavar ar gaou; an AOTROU en deus euzh ouzh an den gwadsec'hedik ha faotus.

⁸ Met evidon-me, dre largentez da drugarez ez in ez ti, hag e stouin e-barzh da dempl santel gant doujañs.

⁹ AOTROU, va ren dre da reizhder abalamour da'm enebourien, plaena da hent dirazon.

¹⁰ Rak n'eus eeunder ebet en o genoù, n'eus nemet drougiezh en o c'halon, o c'horzailhenn a zo ur bez digor, loavañ a reont gant o zeod.

¹¹ Barn anezho, o Doue! Ra gouezhint en o c'hoantoù; diskar anezho en abeg da vraster o disentidigezh, rak en em savet int a-enep dit.

¹² Met ra laouenaio an holl re en em denn war-zu ennout! Ra ganint a levenez da viken! Ra diwalli anezho! Ra drec'ho ennout a re a gar da anv!

¹³ Rak te, AOTROU, a vennig an hini reizh; gronnañ a rez anezhañ gant da vadelezh evel gant ur skoed.