Niveroù 27 - Bibl Koad 21: Ar Bibl e Brezhoneg evit ar Vretoned

Pennad 27 Hêrezh merc'hed Zelofkad. Jozue dibabet

¹ Merc'hed Zelofkad mab Hefer mab Galaad mab Makir mab Manase, eus tiegezhioù Manase mab Jozef: o anvioù a oa Mahla, Noa, Holga, Milka, Tirza.

² Int en em zalc'has dirak Moizez, dirak Eleazar an aberzhour ha dirak priñsed an holl vodadenn, ouzh digor teltenn an engalv, hag e lavarjont:

³ Hon tad a zo marvet er gouelec'h, ne oa ket e bodadeg ar re en em savas a-enep an AOTROU, e bodadeg Kora, met marvet eo en abeg d'e bec'hed, ha n'en doa mab ebet.

⁴ Perak e vefe lamet anv hon tad a-douez e diegezh dre ma n'en deus bet mab ebet? Ro deomp un dalc'h e-touez breudeur hon tad.

⁵ Moizez a ginnigas o c'haoz dirak an AOTROU.

⁶ An AOTROU a gomzas da Voizez o lavarout:

⁷ Emañ ar gwir gant merc'hed Zelofkad. A-dra-sur e roi dezho un dalc'h da hêrezh e-touez breudeur o zad, ha dezho e lakai da dremen hêrezh o zad.

⁸ Komz a ri da vibien Israel, hag e lavari: Pa varvo un den hep mab dezhañ, e hêrezh a dremeno d'e verc'h.

⁹ Ma n'en deus merc'h ebet, e roiot e hêrezh d'e vreudeur.

¹⁰ Ma n'en deus breur ebet, e roiot e hêrezh da vreudeur e dad.

¹¹ Ma n'en deus e dad breur ebet, e roiot e hêrezh d'an hini a vo e gar tostañ en e diegezh, hag e vo dezhañ. Kement-se a vo ur reolenn hag ur varnedigezh evit mibien Israel, evel m'en deus gourc'hemennet an AOTROU da Voizez.

¹² An AOTROU a lavaras da Voizez: Pign war Venez Abarim ha sell ouzh ar vro am eus roet da vibien Israel.

¹³ Sellout a ri outi. Ha neuze, te ivez a vo dastumet gant da bobl, evel m'eo bet dastumet Aaron da vreur,

¹⁴ dre m'hoc'h eus disentet ouzh va muzelloù e gouelec'h Zin pa dabutas ar vodadenn, ha n'hoc'h eus ket santelaet ac'hanon dirak o daoulagad en abeg d'an dour, doureier Meriba, e Kadesh, e gouelec'h Zin.

¹⁵ Moizez a gomzas d'an AOTROU o lavarout:

¹⁶ Ra lakaio an AOTROU, Doue ar speredoù a bep kig, war ar vodadenn, un den

¹⁷ a yelo er-maez dirazo hag a zeuio e-barzh dirazo, a lakaio anezho da vont ha da zont, evit na vo ket bodadenn an AOTROU evel deñved hep mesaer.

¹⁸ An AOTROU a lavaras da Voizez: Kemer Jozue mab Nun, un den a zo ar Spered ennañ, hag e lakai da zorn warnañ.

¹⁹ Degas a ri anezhañ dirak Eleazar an aberzhour ha dirak an holl vodadenn, hag e roi dezhañ ur garg dirazo.

²⁰ Lakaat a ri warnañ ul lod eus da veurded, evit ma sento outañ holl vodadenn mibien Israel.

²¹ Hag en em zalc'ho dirak Eleazar an aberzhour, a c'houlennataio evitañ barnedigezh an Urim dirak an AOTROU. War e c'hourc'hemenn ez aint er-maez ha war e c'hourc'hemenn e teuint e-barzh, eñ hag holl vibien Israel gantañ, an holl vodadenn.

²² Moizez a reas ar pezh en doa gourc'hemennet an AOTROU. Kemer a reas Jozue hag e tegasas anezhañ dirak Eleazar an aberzhour ha dirak an holl vodadenn,

²³ hag e lakaas e zaouarn warnañ hag e roas dezhañ e garg, evel m'en doa lavaret an AOTROU dre Voizez.