Klemmganoù 5 - Bibl Koad 21: Ar Bibl e Brezhoneg evit ar Vretoned

Pennad 5

¹ Az pez soñj, AOTROU, eus ar pezh a zo erruet ganeomp, sell ha gwel hon dismegañs.

² Hon hêrezh a zo tremenet da ziavaezidi, hag hon tiez da dud estren.

³ Deuet omp da vezañ emzivaded hep tad, hag hor mammoù a zo evel intañvezed.

⁴ Evet hon eus hon dour a briz arc'hant, ha da baeañ hon eus evit ma teu deomp hor c'hoad.

⁵ Heskinet omp, ar yev war hor gouzoug. Faezh ez omp ha n'hon eus diskuizh ebet.

⁶ Astennet hon eus hon dorn war-zu Ejipt hag Asiria, evit kaout hor gwalc'h a vara.

⁷ Hon tadoù o deus pec'het ha n'emaint ken, ha ni hon eus douget o direizhder.

⁸ Sklaved a ren warnomp, ha den ne zieub ac'hanomp eus o daouarn.

⁹ Klask a reomp hor bara war var hor buhez, en abeg da gleze ar gouelec'h.

¹⁰ Hor c'hroc'hen a zo tomm-grizias evel ur forn, en abeg da daerder an naon.

¹¹ Gwallet o deus ar maouezed e Sion hag ar gwerc'hezed e kêrioù Juda.

¹² Pennoù a zo bet kroget dre o daouarn, dremm an henaourien n'eo ket bet doujet.

¹³ An dud yaouank o deus douget ar maen-milin, ar vugale o deus brañsellet dindan sammoù koad.

¹⁴ An henaourien n'emaint ken ouzh an dorojoù, an dud yaouank ouzh o sonerezh.

¹⁵ Levenez hor c'halon a zo paouezet, hon dañs a zo troet e kañv.

¹⁶ Kurunenn hor penn a zo kouezhet. Gwalleur deomp, rak pec'het hon eus.

¹⁷ En abeg da-se eo klañv hor c'halon, en abeg da-se eo teñvalaet hon daoulagad,

¹⁸ en abeg da venez Sion hag a zo glac'haret, ken e pourmen al lern warnañ.

¹⁹ Met te, AOTROU, te a chomo da viken, ha da dron a bado a oad da oad.

²⁰ Perak ec'h ankounac'hafes ac'hanomp da viken? Perak e tilezfes ac'hanomp ken pell?

²¹ Gra deomp distreiñ ouzhit, AOTROU, hag e tistroimp! Adnevez hon deizioù evel ma oant gwechall.

²² Hag hon taolet kuit ez pefe da viken? Ha fuloret e vefes a-enep deomp dreist?