Ezekiel 38 - Bibl Koad 21: Ar Bibl e Brezhoneg evit ar Vretoned

Pennad 38

¹ Ha komz an AOTROU a voe disklêriet din o lavarout:

² Mab an den, tro da zremm ouzh Gog e bro Vagog, priñs Rosh, Meshek ha Tubal, hag e profedi a-enep dezhañ.

³ Lavar: Evel-henn e komz an Aotrou AOTROU: Setu em eus droug ouzhit, Gog, priñs Rosh, Meshek ha Tubal,

⁴ da zistreiñ a rin, hag e lakain ur c'hrog ouzh da javed, hag e rin dit dont er-maez gant da holl arme, kezeg ha marc'hegerien gwisket kaer holl anezho, un engroez bras gant skoedoù bras ha skoedoù bihan, o kregiñ ar c'hleze holl anezho.

⁵ Tud eus Persia, Kush ha Pud a zo ganto, o tougen skoedoù ha tokarnoù holl anezho.

⁶ Gomer hag e holl vagadoù, ti Togarma eus penn an hanternoz gant e holl vagadoù, ha meur a bobl a zo ganit.

⁷ Bez prest, en em gempenn, te hag an holl engroez dastumet en-dro dit, bez o gward!

⁸ A-benn kalz a zeizioù e vi galvet, er bloavezhioù diwezhañ e teui d'ar vro dieubet eus ar c'hleze ha dastumet a-douez meur a bobl, war venezioù Israel, a vo bet gwastet pell. Neuze, distroet holl a-douez ar pobloù, e vint o chom eno e surentez.

⁹ Pignat a ri hag e teui evel un arnev, evel ur c'hoabrenn o c'holeiñ ar vro, te ha da holl vagadoù ha meur a bobl ganit.

¹⁰ Evel-henn e komz an Aotrou AOTROU: En deiz-se, soñjoù a savo ez kalon, hag ez po divizoù fall.

¹¹ Lavarout a ri: Me a bigno a-enep ar vro hep mogerioù, kouezhañ a rin war dud sioul, e surentez en o chomlec'hioù, o vezañ o chom holl hep mogerioù, hep prennoù hag hep dorojoù,

¹² evit preizhata ha skrapat, evit kas an dorn war ar gouelec'h adpoblet ha war ur bobl dastumet a-douez ar broadoù, a bled gant he zropelloù hag he madoù, hag a zo o chom e-kreiz an douar.

¹³ Seba ha Dedan, ha marc'hadourien Tarsiz, hag o holl loenedigoù a lavaro dit: Hag e teuez evit preizhata? Hag ec'h eus dastumet da engroez evit skrapat, evit kas ganit arc'hant hag aour, evit tapout loened ha madoù, evit sevel ur breizhenn vras?

¹⁴ Setu perak, mab an den, e profedi hag e lavari da C'hog: Evel-henn e komz an Aotrou AOTROU: D'an deiz-se, pa vo Israel va fobl o chom e surentez, ha ne ouezi ket?

¹⁵ Dont a ri eus da vro e penn an hanternoz, te ha meur a bobl ganit, tud a gezeg holl anezho, un engroez bras hag un arme galloudus.

¹⁶ Pignat a ri a-enep va fobl Israel, evel ur c'hoabrenn o c'holeiñ ar vro. Bez' e vo en deizioù diwezhañ, ma rin dit kerzhout a-enep va bro, evit ma vin anavezet gant ar broadoù, pa vin santelaet drezout dirak o daoulagad.

¹⁷ Evel-henn e komz an Aotrou AOTROU: Ha n'eo ket diwar da benn em eus komzet gwechall, dre va servijerien profeded Israel, o deus profedet neuze e-pad bloavezhioù e rin dit dont a-enep dezho?

¹⁸ Met en deiz-se, en deiz ma kerzho Gog a-enep bro Israel, eme an Aotrou AOTROU, va fulor a savo em fri.

¹⁹ Hag e lavaran em gwarizi, e tan va c'hounnar: Ya, en deiz-se e vo ur grenadenn vras e bro Israel.

²⁰ Pesked ar mor, laboused an neñvoù, loened ar parkeier, pep stlejvil a ruz war an douar, hag an holl dud a zo war c'horre an douar a greno dirazon. Ar menezioù a vo diskaret, ar reier uhel a gouezho, an holl vogerioù a vo taolet d'an douar.

²¹ Hag e c'halvin a-enep dezhañ ar c'hleze war va holl menezioù, eme an Aotrou AOTROU. Kleze pep hini a droio a-enep e vreur.

²² Hag e varnin anezhañ dre ar vosenn ha dre ar gwad, hag e rin d'ar glav kouezhañ warnañ, war e vagadoù ha war ar pobloù niverus a vo gantañ, glav-bil, mein-grizilh, tan ha soufr.

²³ Hag e vin meuraet ha santelaet, hag e vin anavezet dirak daoulagad broadoù niverus, hag e ouezint ez on me an AOTROU.