Ar Prezeger 10 - Bibl Koad 21: Ar Bibl e Brezhoneg evit ar Vretoned

Pennad 10

¹ Ar c'helien marv a vrein hag a laka da verviñ eoul ar fronder; evel-se e ra un nebeud a follentez e-keñver an hini a zo prizet evit e furnez hag e c'hloar.

² Ar fur en deus e galon a-zehou, met an diskiant en deus e galon a-gleiz.

³ Zoken pa gerzh an diskiant war un hent, e vank dezhañ ar poell, hag e lavar diwar-benn pep hini: Un den diskiant eo!

⁴ Mar sav ez enep spered an hini a ren, na guita ket da lec'h, rak an douster a ziwall diouzh pec'hedoù bras.

⁵ Un droug am eus gwelet dindan an heol, evel ur fazi o tont eus ar rener:

⁶ ar follentez a zo lakaet er renk uhelañ, hag ar re binvidik a zo azezet en izelded.

⁷ Gwelet em eus ivez servijerien war varc'h, ha priñsed o vont war droad evel servijerien.

⁸ An hini a gleuz ur foz a gouezho enni, hag an hini a doull er c'hleuz a vo flemmet gant un naer.

⁹ An hini a fiñv mein a vo gloazet ganto, hag an hini a faout koad a vo en riskl dioutañ.

¹⁰ Mard eo dallet an houarn ha ma n'eo ket bet lemmet e zroc'h, e ranko kreskiñ div wech e nerzh. Met ar furnez he deus ar gounid da reiñ ampartiz.

¹¹ An naer a flemm pa n'eo ket hudet, hag an huder ne dalvez ket gwelloc'h.

¹² Komzoù genoù ar fur a zo leun a c'hras, met muzelloù an diskiant en lonk.

¹³ Penn-kentañ komzoù e c'henoù a zo ur follentez, ha diwezh e brezegenn a zo ur wall sotoni.

¹⁴ An den diskiant a liesa ar c'homzoù, koulskoude ne oar ket an den ar pezh a c'hoarvezo gantañ. Piv a zisklêrio dezhañ ar pezh a vo war e lerc'h?

¹⁵ Labour an diskianted o skuizh, dre ma n'ouzont ket mont betek kêr.

¹⁶ Gwalleur dit bro, a zo ur bugel da roue, hag a vez da briñsed o tebriñ adalek ar beure!

¹⁷ Eürus out bro, a zo da roue un den a ouenn vrudek, hag a vez da briñsed o tebriñ p'emañ ar c'houlz, evit derc'hel o nerzhoù ha n'eo ket evit en em reiñ d'an evaj!

¹⁸ En abeg da zaouarn didalvez e kouezh al leur, hag en abeg da zaouarn laosk e teu an noed da zeverañ en ti.

¹⁹ Ober a reer predoù evit laouenaat, ar gwin a ro plijadur d'ar vuhez, met an arc'hant a respont da bep tra.

²⁰ Na villig ket ar roue, zoken ez soñjoù, na villig ket ar pinvidig, zoken er gambr ma kouskez, rak labous an neñv a gasfe da vouezh, hag ar pezh en deus divaskell a zisklêrfe da gomzoù.