2 Rouned 4 - Bibl Koad 21: Ar Bibl e Brezhoneg evit ar Vretoned

Pennad 4

¹ Un intañvez, a-douez gwragez mibien ar brofeded, a grias da Elizea o lavarout: Da servijer va gwaz a zo marv, ha gouzout a rez penaos e touje da servijer an AOTROU. Hag ar c'hredour a zo deuet da gemer va daou vugel, evit ma vint sklaved.

² Elizea a lavaras dezhi: Petra 'rin evidout? Disklêr din ar pezh ac'h eus ez ti. Hag hi a lavaras: Da servijerez n'he deus netra en ti nemet ur podad eoul.

³ Neuze e lavaras dezhi: Kae er-maez, goulenn listri digant da holl amezeien, listri goullo, ha na c'houlenn ket un niver bihan.

⁴ Ha kae ez ti, serr an nor warnout ha war da vibien, hag e skuilhi en holl listri-se, o lakaat a-gostez ar re a vo leun.

⁵ Mont a reas eta a-digantañ, hag e serras an nor warni ha war e vibien. Int a zegase al listri dezhi, hag hi a skuilhe enno.

⁶ Pa voe leun al listri, e lavaras d'he mab: Degas din c'hoazh ul lestr. Hag e respontas: N'eus lestr ebet ken. Hag an eoul a baouezas.

⁷ Neuze e teuas da zisklêriañ kement-se da zen Doue, a lavaras: Kae da werzhañ an eoul ha pae da zle; te ha da vibien a vevo gant an nemorant.

⁸ Un deiz ma tremenas Elizea dre Sunem, e oa eno ur vaouez pinvidik a zalc'has anezhañ da zebriñ bara en he zi. Ha bep gwech ma tremene, ez ae di evit debriñ bara.

⁹ Hag hi a lavaras d'he gwaz: Setu, gouzout a ran ez eo un den santel a Zoue, an hini a zeu dalc'hmat d'hon ti.

¹⁰ Greomp, mar plij, ur gambr uhel vihan, ha lakaomp enni ur gwele, un daol, ur gador hag ur c'hantolor. Pa zeuio d'hon ti, en em denno eno.

¹¹ Un deiz eta, o vezañ deuet di, en em dennas er gambr uhel, hag e tiskuizhas eno.

¹² Hag e lavaras da C'hehazi e servijer: Galv ar Sunamitez-se. He gervel a reas, hag homañ en em zalc'has dirazañ.

¹³ Neuze e lavaras da C'hehazi: Lavar dezhi: Setu, kemeret ec'h eus an holl brederioù-se ganeomp, petra a c'hellimp ober evidout? Bez' ac'h eus da gomz ouzh ar roue, pe ouzh penn an arme? Hag e respontas: Emaon o chom e-touez va fobl.

¹⁴ Hag e lavaras: Petra ober eviti? Gehazi a respontas: Met n'he deus mab ebet, hag he gwaz a zo kozh.

¹⁵ Elizea a lavaras: Galv-hi! Hag e c'halvas anezhi, hag hi en em zalc'has ouzh an nor.

¹⁶ Elizea a lavaras: Er bloaz a zeu, d'ar mare-mañ, e vriati ur mab. Hi a lavaras: Nann, va aotrou, den Doue, na lavar ket gevier da'z servijerez!

¹⁷ Ar vaouez a goñsevas hag a c'hanas ur mab er bloaz war-lerc'h, d'an hevelep mare, evel m'en doa lavaret Elizea dezhi.

¹⁸ Ar bugel a greskas, hag e c'hoarvezas ma'z eas un deiz da gavout e dad, e-kichen ar vederien,

¹⁹ hag e lavaras d'e dad: Va fenn! Va fenn! An tad a lavaras d'e servijer: Doug-eñ d'e vamm.

²⁰ E zougen a reas eta hag en kasas d'e vamm. Hag e chomas war he daoulin betek kreisteiz, hag e varvas.

²¹ Pignat a reas, hag e c'hourvezas anezhañ war wele den Doue, hag e serras an nor warnañ, hag ez eas er-maez.

²² Goude e c'halvas he gwaz hag e lavaras dezhañ: Degas din, mar plij, unan eus ar servijerien hag un azenez, hag ez in betek den Doue, hag e tistroin.

²³ Eñ a lavaras: Perak e fell dit mont d'e gavout hiziv? N'eus nag al loar nevez nag ar sabad. Hi a respontas: Mont a ra!

²⁴ Hag e reas dibrañ an azenez, hag e lavaras d'he servijer: Kas buan ha na c'horreka ken na lavarin dit.

²⁵ Evel-se ez eas kuit hag e teuas etrezek den Doue da Venez Karmel. Kerkent ha ma welas den Doue anezhi, a-bell, e lavaras da C'hehazi e servijer: Setu aze ar Sunamitez!

²⁶ Kae, kerzh en arbenn dezhi ha lavar dezhi: Ha mont a ra mat an traoù ganit, ha gant da bried, ha gant ar bugel? Hi a lavaras: Mont a ra!

²⁷ Hag e teuas da gavout den Doue war ar menez, hag e krogas en e dreid. Gehazi a dostaas evit he fellaat, met den Doue a lavaras dezhañ: Lez-hi, rak hec'h ene a zo er c'hwervoni, hag an AOTROU en deus kuzhet-se ouzhin, n'en deus ket en disklêriet din.

²⁸ Hag hi a lavaras: Ha goulennet em boa ur mab digant va aotrou? Ha ne'm boa ket lavaret dit: Na'm zouell ket?

²⁹ Elizea a lavaras da C'hehazi: Gouriz da zivgroazell, kemer va bazh ez torn, ha kae. Mar kavez unan bennak, n'en saludi ket, mar salud unan bennak ac'hanout, ne responti ket dezhañ, hag e lakai va bazh war zremm ar bugel.

³⁰ Mamm ar bugel a lavaras: An AOTROU a zo bev ha da ene a zo bev! Ne zilezin ket ac'hanout. Hag e savas hag ez eas war he lerc'h.

³¹ Gehazi, o vezañ o diaraoget, a lakaas ar vazh war zremm ar bugel. Met ne voe na mouezh na merk a evezh. Distreiñ a reas da gavout Elizea, hag e kontas kement-se dezhañ o lavarout: Ar bugel n'eo ket dihunet.

³² Elizea a zeuas eta en ti, ha setu, ar bugel a oa marv ha gourvezet war e wele.

³³ Mont a reas e-barzh, hag e serras an nor warno o-daou, hag e pedas an AOTROU.

³⁴ Hag e pignas, hag e c'hourvezas war ar bugel, o lakaat e c'henoù war e c'henoù, e zaoulagad war e zaoulagad, e zaouarn war e zaouarn. Astenn a reas warnañ, ha kig ar bugel a voe tommaet.

³⁵ Hag e tistroe, hag e kerzhe dre an ti amañ hag ahont, hag e pigne hag ec'h astenne c'hoazh warnañ. Da ziwezhañ ar bugel a strevias seizh gwech, hag ar bugel a zigoras e zaoulagad.

³⁶ Neuze e c'halvas Gehazi hag e lavaras dezhañ: Galv ar Sunamitez. Hag he gervel a reas, hag hi a zeuas da gavout Elizea a lavaras dezhi: Kemer da vab.

³⁷ Dont a reas d'en em deurel d'e dreid, hag e stouas d'an douar; goude e kemeras he mab hag ez eas er-maez.

³⁸ Elizea a zistroas da C'hilgal. Bez' e oa un naonegezh er vro. Mibien ar brofeded a oa azezet dirazañ, hag e lavaras d'e servijer: Laka ar pod bras, ha poazh ur soubenn evit mibien ar brofeded.

³⁹ Unan bennak a yeas d'ar parkeier da zastum louzeier. Kavout a reas ur winienn ouez, hag e tastumas diwarni koulourdrennoù-moc'h gouez, leizh e wiskamant. Pa zistroas, e lakaas anezho a-dammoù e pod ar soubenn, rak ne ouient ket petra e oa.

⁴⁰ Hag e voe roet d'an dud-se da zebriñ, met raktal m'o doe debret eus ar soubenn-se, e krijont o lavarout: Den Doue, ar marv a zo er pod-se! Ha ne c'helljont ket debriñ.

⁴¹ Elizea a lavaras: Degasit bleud. Hag e taolas anezhañ er pod, hag e lavaras: Roit d'an dud-se, ma tebrint. Ha ne voe netra ken fall er pod.

⁴² Neuze e teuas eus Baal-Shalisha un den a zegasas da zen Doue bara ar frouezh kentañ, ugent baraenn heiz hag ed kentañ en e sac'h. Elizea a lavaras: Ro d'an dud-se, ma tebrint.

⁴³ E servijer a lavaras: Penaos e roin diouto da gant den? Met respont a reas: Ro d'an dud-se, ma tebrint, rak evel-henn e komz an AOTROU: Debret e vo hag e vano.

⁴⁴ Evel-se o lakaas dirazo, hag e tebrjont, hag e vanas diouto, hervez komz an AOTROU.