YAKOBO 1 - Kakwa New Testament 1977

¹ Yakobo laga a upiye lo Ŋun ku lo Mata Yesu Kristo ilo‚ aroma ku ketimito mere gele konye mure naga na reki i kani kine.

² Luŋaseri kuwe kilo, kugbo ta laga amomorani modruzi ka’de ka’de kine‚ ruketa ko a kulia ti nyola koru‚

³ igbonaga ta adeni adi moro na rugo nasuna nyena zowundra teili lo rile ina.

⁴ ’Bo kolokita teili lo rilelo ti leŋe kita nanyena, ma ta ku romokini soso i gbi­yeri lasulo giri, ka’bi ta ku zara le’de ŋo tro.

⁵ Kugbo le’de ŋutu kasu dridriŋini laga ’ba tobodo, ti lepe make Ŋun laga lo ’doga ŋutulu kilo giri ’ba weleta, laga ani riringa ko ilo‚ ŋutu ŋanilo ititiki.

⁶ ’Bo ti lepe make ku rugo, ’ba yoyongu na teili. ’Bo ŋutu lo yoyongu teililo gbo beti pio ti suburi naga ma kobuŋena buradri, ma yingi ’beri kine.

⁷ Lu ŋutu de ka’bi ku rarambu adi nye irumbi le’de ŋo ku Matalo i kenini,

⁸ lepe gbo ku teiliko mure‚ laga lo gbo’diniki ’ba rame lo’bu i konesi kanye kine katani giri ilo.

⁹ Luŋase laga iloŋadroolo ti pudyini mugu igbonaga lepe gbo’di akukakina.

¹⁰ Ŋutu laga a korinelo ti pudyini mugu igbonaga lepe gbo’di ayeŋundra iloŋadroona‚ igbonaga lepe ilelenga be koturo naga i droru kata kine ina.

¹¹ ’Bo kolo naga na lupundro na sa’yu kamaka be kimana‚ lepe tetiogu drorulo, koturo kine druga lugu ka‚ ’bu’busi nasikona druga kakaraki kaŋo. Korinelo ililiki de ’do i dridriŋi na konesi kanye kine.

¹² Koŋo na’buna ina i ŋutu laga lo gbo’da ku teili lo rile i modru katanilo, igbonaga kugbo lepe laga amoro‚ lepe irurumbi yogono lo ru laga lo saraki ŋutulu laga lo nyadru Ŋun kilo.

¹³ Kugbo le’de ŋutu laga aluluka, lepe ka’bi ku kukulia adi, “Ŋun lo luluga na.” Ŋun ani romoki luluka ku kulia naro‚ ’bo lepe ani luluga le’de ŋutu ’do tro.

¹⁴ ’Bo ŋutu gele gele luluka i naga ma ki’beŋa ti lepe kine pikundri lepe i zigo na lepe itrona.

¹⁵ I bo ŋanina kugbo ki’bena naga ariondru pele‚ lepe druga yuŋundro toro. Kugbo torona naga gbo’di a golo‚ lepe druga yuŋundro tuwa.

¹⁶ Luŋaseri kuwe laga ma na nyadri kilo, ka’bi ta ku ’bo’bolia ’bo’bolia.

¹⁷ ’Doga gele gele naga a na’buna ku ’doketa gele gele laga a lo’bu kilo ŋiyu ki yu, ko kilo kiyundra kani ŋiyu ku Monye lo pararazi ti ’diko kinelo yu. Lepe ani lopugo mugu tro, ani tikindra mude ku lopugo na mugu nanyena.

¹⁸ Ku nyadru nanye lepena, lepe ayuŋundro yi ku kulia ti to’diri kine, ma yi ku gbo’da be konye lo trora a kayo kilo, i dridriŋi na kapazi laga ma lepe gbekindri kilo.

¹⁹ Luŋaseri kuwe laga ma na nyadri kilo, deneta kine kulia de. Ti ŋutulu kilo giri yiŋe wule, ka’bi ko ku popoki i tazu wule, ka’bi ku ŋoŋoma wule itro.

²⁰ Ŋoma na ŋutuluna ani kondra be na lopete laga soso lo Ŋun ilo.

²¹ Kuwade guparata ŋo giri laga a mundri kilo kaŋo, ku kulia naro na ’du’dudyo kine, ruketa ku teili lo tumada kulia na ’utuki kasu teiliko katani, naga na romoki i ritundro na ta kine.

²² ’Bo gbo’dita a kakona ti kulia ŋani kine, agbo’da a kayiŋa ’du laga lo ’bo’boliza ’beri kiloni.

²³ ’Bo kugbo le’de ŋutu laga a kayiŋani lo kulia ’du, kugbo agbo’da a kakonanini‚ lepe gbo be ŋutu laga lo medra koŋo nanye lepena i maraya ilo.

²⁴ Lepe medra mugu wule‚ druga tutu‚ ’bo wuleŋa gele lepe druga boboŋo adi koŋo nanyena gbo adinyona.

²⁵ ’Bo ŋutu laga lo medra soso kukuzu naga a na’bu‚ na yokozu ŋutuluna ilo‚ kugbo lepe lo kondra ’duu‚ ku lepe agbo’da a kayiŋani laga lo boboŋoloni‚ ’bo a kakonani laga lo kokondralo, ŋutu ŋanilo nyelo igbo’da ku koŋo na’bu ku kondra nanyena.

²⁶ Kugbo le’de ŋutu laga lo rambu adi nye a kateminioni lo Ŋun‚ ’bo kugbo lepe laga ani goza ŋede lonyelo teminizo naga ma ŋutu ŋanilo teminizi Ŋun ina a busa ’bo lepe ilo ’bo’boliza mugu.

²⁷ Teminizo naga ku kekeli‚ naga aku kokoreyi ku Ŋun Monyelo i konyenina‚ nye naga ina de: wodru na kikiziko kilo ku na awuzio kine kasiko i sasanyani, ku tiyu na mugu ’ba ’bo’yu na mundri ti ina ka de kine.