Zafaniya 1 - KAKAƊU NA ƁƊAKKARKARA

¹ Ngəni an andər natə MTHLAKU ku hamta aka Zafaniya. Zafaniya an ɓzər Kushi, na ɓzər Gedaliya, na ɓzər Amaliya, na ɓzər Hezekiya. Ndər ni si aka Zafaniya akwa sakatə Yosiya na ɓzər Ammon an kuthlir Yahuda.

Vir Tə MTHLAKU Ata Sə Hara Shariya

² MTHLAKU pəla, “I ata shamta shanga su na ata kəra duniya.

³ I ata shamta mji kəga mwaɓi mtakəu, I ata shamta shanga ɗikayeri na ana fəla, kəga kəlfayeri na akwa manda. I ata vu ka kəmanggarayeri ndlagamtadzi, kəi shamta shanga mji na ata kəra duniya, I na MTHLAKU an pəla.”

Shariya Ata Kəra Mjir Vəngkər Səli Aka Haptayeri

⁴ “I ata haɓəla tsi kəi ɗi mjir Urushalima ka shanga mjir Yahuda. I ata kurəmta shanga mambila mjir nu Baal, kəi tsi thləma pristayeri ar haptu.

⁵ I ata shamta mji na ana zuzuri ata kəra mbwayeri ka vəngkər səli aka pci, ka thliya, ka sasəlka. I ata shamta mji na ana zuzuri ka kahyel akwa thləma MTHLAKU amma tsu da akwa kahyel akwa thləma Milkom.

⁶ I ata shamta mji na ku shinadzə bwahili aka nu MTHLAKU, mji na aɗi ana bara MTHLAKU wala tsəkwitə ni wa.”

⁷ Dləɓ giri səri akəma MTHLAKU na ka Duna ta Shang! Kamnyar virər MTHLAKU abaka hara. MTHLAKU ku ɗəmhədzər hara saɗaka ka mjirni, tsuwa tsa ku pwi mji na ata sə hara ala ɗa shariya.

⁸ “Akwa vir tə I na MTHLAKU ata hamta mjir ɗa saɗaka ni, I ata ɗi kwakunayeri ka maɗashilər kuthli, ka shanga mji na ana ha ləptər vəngkər səli aka haptu.”

⁹ Vir nda I ata ɗi shanga mji na ana fəlɓəla nyarmbwa, ka mji na ana nghyantə kəyir Mthlakər ɗa, ka suayeri tə mdə dlutsə ka zambata.

¹⁰ MTHLAKU akwa pəla, “Vir nda mda ata sə nggatə kurakər tuwa akwa Nyarfur Kəlfa, ka nggatə mji akwa jaɓ tuwa akwa Zara na Suɗkur, ka kuraku na ola ar jaɓumtar su akwa garayeri.

¹¹ Tuwa giri, giri na ndzi akwa mnya kasəkur Mortar! Kamnyar shanga mjir fəli ku kurəmtadzi, shanga mjir ɗəl adzərfa ku mtəgəmtadzi.”

¹² “Sakanda I ata kətə pitəla kəi nggaɓəla jirkur ar Urushalima, I ata ɗi mji na aɗi ana damitədzi wala raka wa, mji na ana pəla akwa ɗəffa ɗa abbər, ‘Ɓɗakkur aɗi tə MTHLAKU ata hara ala mburu wa, tsuwa ɗimikur aɗi tə tsa ata hara ala mburu wa.’

¹³ Mji ata famnya gənar ɗa ka huzamta kəyayeri arɗa. Wala ma da an həntə kəi, da aɗi ata ndzəndzi akwa wa, wala ma da an ncitə fakər ɗa, da aɗi ata sa yimər anapari wa.”

¹⁴ Vir na ola ar MTHLAKU ku hara kudzəha, ku hara kudzəha, akwa si taktar. Vir nda ata ndzi vir na mwavər, wala sojayeri na katsala ata tuwa ka kuraku vir nda.

¹⁵ Vir nda an vir ɗəffə bwarbwarkur, vir ɗəffə ɓzəɓza ka vir bwani, tsa ata ndzi virər asar ka virər hilantə su tsa an virər kuthlu ka ɗəffə ɓzəɓza, Tsa ata ndzi virər pərɗu ka kuthlu na mənggəl,

¹⁶ vir mbur təmbəl ka kurakər mpa ar dlər bərniyayeri na akwa katangga, ka ar dlər mbwar səka na nal nal.

¹⁷ I ata səntə bwani ata kəra mji, antə da ata sə mwa apa mdlyang. Kamnyar tə da ku hara biku aka MTHLAKU, mda ata sə pumta mamshir ɗa apa bərbər, ka kumər dza ɗa sə hiɗa ata di apa kuɓa.

¹⁸ Vir tə MTHLAKU ata ncantə ɗəffə bwarbwarkurərni, adzərfar ɗa ka dinarər ɗa aɗi ata mzhi mbuli ɗa wa. Apa mdə natə ɗəffari ɓza kamnyar səlkər hirkur, antə ɗəffa MTHLAKU ata ɓzə ka duna, tə tsa ata mbamta shanga duniya. Jiri, tsa ata kurəmta shanga mjir duniya ata saka duku.