Yakub 1 - KAKAƊU NA ƁƊAKKARKARA

Thlawardzi

¹ I na Yakub, na mafar Hyel ka ar Mthlaku Yesu Kristi, an akwa rəbuta ala giri wasika ngəni ni, watau shanga giri na mjir nyarmbwa na kumnya suɗa na ku titiləmtadzi akwa duniya.

Hamta Jiri Ka Ɗəɗukur

² Maɗaməma, ka giri namtə kəlara bwani na ku wutə giri ka tsa ndzi sur kucali.

³ Kamnyar giri ku sənda abbər bwani ni akwa ngkərtə hamta jirər giri, kamnyar jaka ala giri dunar nggitə su.

⁴ Apani tar ka giri thlipə nggitə su swaiswai, kamnyar ka giri sə ndzi mji na nkahənkahari, nghyinghyari akwa shanga su, har su aɗi tə giri ata jaktə turari wa.

⁵ Amma ma mda aɗi akwa nca giri na kula ɗəɗukur, ka tsa kiɗa akəla Hyel, na ana hamta su aka mji kula huni, kula nggungguni, tsuwa tsa ata hamta alari.

⁶ Amma tar ka tsa kiɗa ka hamta jiri kula nuhum akwa, kamnyar mdə na ka nuhum ana ndzi apa mpar yimi na ola natə shambar ana fya ka shinar ni akwa kəlara bwa.

⁷ Kamnyar jili mda apani aɗiya mbərsa abbər tsa ata wutə su akəla Mthlaku wa,

⁸ təng tə hangkalari suɗsuɗə ni, kamnyar tsa aɗi thləthlata ata kəra su duku wa.

Mji Na Ngguɗi Ka Mjir Gəna

⁹ Ka kəlara mdər nuwa ndzi ka su tə tsa ata mzhi gaya ata kəra abbər Hyel ku haptə səliyirni.

¹⁰ Tsuwa ka kəlara mdər nuwa na ka gəna mzhi gaya ata kəra abbər Hyel ku tərghəi ni. Kamnyar mdər gəna ata mta tsu apatə pukdlər kusar mtaku ana ula ka sha.

¹¹ Kamnyar pci ana səɓəla ka bwarbwarkurərni, ka tətəɓumta kusar, ka pukdlari təgəri, ka ɓɗakkurərni sha. Tsu apani tsuwa antə mdər gəna ata sə mta ata kəra bara sur duniya ni.

Bwani Ka Ngkərtədzi

¹² Ata ndzi msəra aka mdə na ana nggitə bwani, kamnyar ma sakatə tsa ku nggitə ka kuri, tsa ata dlu watsəɓər mpikə na akur wa, natə Hyel ku hara alkawalari aka mji na hir ni.

¹³ Ma sur ngkərtə ku wutə mda, tsa aɗiya pəla abbər, “Hyel ku ngkərtə ra wa.” Kamnyar Hyel aɗi ana ngkərtə mda ka ɗimikur wa, tsuwa mdər mzhi ngkərtə ni aɗi wa.

¹⁴ Amma mburu ana təri akwa ngkərtədzi ma sakatə nggukə na ɗimi ku pwaktəmta mburu ka ndəkərtə hangkala mburu.

¹⁵ Tsuwa ma sakatə nggukər ɗimikur ni ku kətə hur, tsa ana sə yaɓəla biku, tsuwa ma sakatə biku ni ku kila ka hara ola, tsa ana sə yaɓəla mta.

¹⁶ Maɗama'na natə I hirhira, giri aɗiya hir ka mdə pwaktəmta giri wa.

¹⁷ Kamnyar kəlara cauta na ɓɗaku ka na ola, ana thlata amtazi, akəla Hyel na Təddar mburu na namtə pci, ka thliya ka shanga sasəlkayeri. Tsa aɗi ana palidzi wa, tsuwa su na dludzər kuthlu aɗi adzə ni wa.

¹⁸ Akwa hirərni antə tsa namtə mburu atar ndərər jirkur, abbər ka mburu ndzi apa yarakəma akwa nca suayeri tə tsa namta.

Nggatə Su Ka Hara Kəthlər Kəgari

¹⁹ Ka giri nggaɓəla ngəni, maɗama'na natə I hirhira, abbər kalkal ka waskəi ndzi mdər nggatə su taktar, amma aɗi mdər huvə gari wa, wala mdə tə ɗəffari ana ɓzə taktar wa.

²⁰ Kamnyar ɗəffə ɓzəɓza ar mda aɗi ana dlar mda akwa hara su na ɓɗaku tə Hyel akwa barari wa.

²¹ Antə ka giri pumta shanga halər ɗimikur ka shanga kəmanggarkur. Ka giri tərghəi kəra giri ka dlu ndərər Hyel tə mdə thləkamta akwa ɗəffa giri, na ata mzhi mbantə mpika giri ni.

²² Giri aɗiya pwaktə kər giri, akwa ngga ndərər Hyel daci wa, amma ka giri ndzi mjir haratari.

²³ Kamnyar ma mdə ku ndzi mdər ngga ndər ni daci, kula hara kəthlər kəgari, tsa ndzi tsu apa mdə na akwa wul kəmari akwa kutəram.

²⁴ Kamnyar təkəma tə tsa ku sharardzi kazhar kutəram ni, tsa ata fwari ata kəra laku tə kəmari akwa ni.

²⁵ Amma mdə na akwa vədzə hangkalari aka tsawu na nghyinghyari ni, tsawu na ana msərantə mdə ni, tsa ata wutə barka akwa shanga su tə tsa akwa harari, ma har tsa aɗi mdər nggari daci ka fwari su ata kər wa, amma tsa ku nggitə ka ləkəma akwa kəthlər kəgari.

Addin Na Jirari

²⁶ Kəlara mdə na akwa wuta abbər tsa mdər nu Hyel ka jirkur, amma tsa aɗi ɓəlatə kyanggyarari wa, to, tsa akwa pwaktə kərni daci, antə shanga nuwurni ni ku ndzi gapani.

²⁷ Kamnyar nu Hyel na jirari ka na kəcəkəcari akəma Hyel Tədda an apani, ka mdə dlar maɗankyar na muta, ka kughungayeri na akwa bwani. Tsuwa ka tsa ɓəlatə kərni ta kəlara sur duniya na ɗimi ɗimi ni.