Yahuda 1 - KAKAƊU NA ƁƊAKKARKARA

Thlawardzi

¹ I na Yahuda na mafar Yesu Kristi, ka ɓzərma' Yakub, an akwa rəbuta ala giri wasika ngəni ni. I akwa rəbuta ala giri, giri natə Hyel kəgaɓəla giri, natə Hyel na Tədda hirhira, natə Yesu Kristi an akwa ɓəla lapiyakurər giri ni.

² I akwa hara adduwa abbər ka Hyel kətadzə giri, ka tsa na giri msərakur, ka jaka ala giri hirkur.

Tsaktədzi Ata Kəra Maləmayeri Ar Thlandər

³ Mjir yeru, I ku mwaɓta akwa ɗəffi kəi rəbuta ala giri gari ata kəra mbantədzi natə shanga mburu kəgari. Amma I wuta abbər kulini ku ndzi dwali ali kəi rəbuta ala giri kamnyar ntsantə giri ka giri mpa kamnyar hamta jiri natə Hyel na mburu na mjirni ka pal daci ni.

⁴ Kamnyar mji laga na aɗi mjir Hyel wa ku nggwar səkwa nca giri, mji tə mdə ku ɗar pəla mda ata ɗi ɗa kamnyar bara hilantə ɓɗakkur tə Hyel hara ala mburu, kamnyar ka da wutə lakur hara ɗimikurər ɗa ni. Da ku nggəlar Yesu Kristi natə tsa duku shini an Kuthlir mburu ka Mthlakər mburu ni.

⁵ Wala tə giri ku kurtə ka səndə ni, I akwa bara kəi ɗangtə ala giri abbər Yesu na mbantə mjir Israila akwa tsəɗi Masar ni, ku sə kurəmta mji na nggəlar hamta jiri aghəla nda.

⁶ Kamnyar wala mjirthlentərhyel na aɗi kəsi olkur tə Hyel hamta ala ɗa wa, amma da zhar vəi ndzəndziyir ɗa ni, tsa mbwamta ɗa akwa məsəsal na ka duna, ka hambwa ɗa aghəla nda akwa vəi kuthlu, har tar vir tə mda ata sə hara ala ɗa shariya na ola.

⁷ Tsu apani antə tsa hara ka Sodom ka Gomora, ka bərniyayeri na kalaktə ɗa. Kamnyar sakatə mjir diyayeri ngəni pudzi akwa hara ɗimikur akwa nu nggukər dza na ata hara cika aka mdə ni, da ku sə ndzi surthlipa atar ɗi tə mdə hara ala ɗa ka u'u na akurkur wa ni.

⁸ Tsuwa tsu an jili su na wutə mjir suni laga na diɓərantə dza ɗa, ka nggəlar nu su tə kuthlikur pəla, har ka ləkwa nggənggəl mjirthlentərhyel ni.

⁹ Wala Mikayel na olər mjirthlentərhyel ni aɗi hara jili su ngəni wa. Kamnyar sakatə tsa akwa beɗi ka ɓuji ka Shatan ata kəra mshiyir Musa nda, tsa na Mikayel ni aɗi nggəl shatan nə wa. Təng tsa pəla, “Ka Mthlaku mpa ala ga!”

¹⁰ Amma ar mji nayeri ni, da ana mnya ɗimi ata kəra kəlara su tə da aɗi nggaɓəla wa. Tsuwa tsu suayeri ngəni tə da ana hara apa mwaɓi na kula kər, akwa hara kəlara su tə ɗəffa ɗa pəla ala ɗa ni, ata sə kurəmta ɗa ka kərɗa.

¹¹ Sha ku wutə ɗa! Kamnyar da akwa nu surharar Kayinu. Da ndzi apa Balaam, kamnyar da akwa pwaktə mji kamnyar kwaba. Antə tsu apa Kora, mda ata kurəmta ɗa kamnyar haptə hangkal.

¹² Səm susəmər mwardzi kəga jili mji ngəni akwa nca giri ni akwa hilantə giri, təng tə da ku vəi kuta ɗa akəma, akwa səm su kula səli kula thlivər ni. Da ndzi apa dlamba na kula yimi tə shambar ana kətə ka təra kəgari, apa nfu na kula ya akwa sakar yarni. Da ku ndzi mtəmtari ka bwa suɗa, ka nggilanga ɗa ntsuntswari.

¹³ Da ndzi apa mpar yimi na mwavər na ana thlata ka pu kərni, akwa gajaka ka sur səli na kula ampani apa mbur yimi. Da ndzi apa sasəlkayeri na ana kadla gapangapani, natə mdə vəi kuthlu na pələku ni kamnyar ɗa ba saka madi.

¹⁴ Wala Enok na akwa zaman na murfəkur aghəla Adam, ku hara naɓikur ata kəra ɗa abbər, “Mthlaku ata sə si ka mjirthlentərni na ɓɗakkarkara dlama dlama,

¹⁵ ka da hara shariya ata kəra shanga mji. Tsa ata ngkəi shanga mji na ku hara su na aɗi kəskəra Hyel wa ka biku, ka shanga mnya ɗimi tə mjir biku na kula thlivər Hyel hara ata kərari ni.”

¹⁶ Mji nayeri an mjir nggungguni, tədəku da akwa ngka vəi shar mda ka jikamnya ata kəra ɗa. Da an mji na akwa nu nggukər dza, ka mji na hir gari ol'ola, taktə mda kamnyar ka da səm riɓa ata kərari.

Tsaktədzayeri Damwa

¹⁷ Amma mjir yeru, ka giri ɗangtə suayeri tə aposəlayeri ar Mthlakər mburu Yesu Kristi pəla waci abbər ata sə hara ni.

¹⁸ Da ku pəla ala giri abbər, “Akwa kurər duniya mji laga ata sə ndzi mjir mnya ɗimi, akwa nu nggukayeri na aɗi kalkal akəma Hyel wa.”

¹⁹ Da an mji na ana səntə ndəkəmtadzi ni, mjir nu nggukayeri ar dza, mji na kula Mambələr Hyel.

²⁰ Amma ar giri, mjir yeru, ka giri vu duna giri akwa kəlantə kər giri abwar hamta jiri na ɓɗakkarkara. Ka giri hara adduwa akwa dunar Mambəl na Ɓɗakkarkara.

²¹ Ka giri ndzi tsu akwa hirkur na ar Hyel, giri akwa sək səyir Mthlakər mburu Yesu Kristi, na atar kətadzərni ata mwantə giri akwa mpikə na akur wa.

²² Ka giri dingngga kətadzə mji na aɗi kuri hamta jiri wa.

²³ Ka giri mbantə bwadukwa ɗa, apa giri akwa ngkaɓəla ɗa akwa u'u. Mji bwaduku tsuwa ka giri kətadzə ɗa, amma ka giri hara ka hangkal, ta diɗər biku na ata ləptər ɗa ni asə pəli giri.

Adduwar Huwa

²⁴ Antə kulini ka huwa ndzi aka mdə na ka dunar ɓəlatə giri ta giri andla, ka namtə giri kula mbəlku akəmari ka kucali akwa səliyirni.

²⁵ Antə ka shanga səli, ka daraja, kuthlikur, ka duna, ndzi aka Hyel na duku shini, na Mdər mbantər mburu, atar Yesu Kristi na Mthlakər mburu, akwa zamanayeri na təramta, ka na kulini, ka tsuwa ba saka madi! Amin.