Titus 3 - KAKAƊU NA ƁƊAKKARKARA

Hal Na Ata Ndzi Kalkal Aka Krishan

¹ Ka gə ɗangta ala ɗa ka da kələngkər aka mjir kuthlikur ka mji na ka olkur. Ka da ndzi mjir kələngkər, parang ɗəmhəɗəmhari kamnyar hara kəlara kəthlər na ɓɗaku.

² Da aɗiya mnya ɗimi ata kəra mdə wa, tsuwa da aɗiya hir beɗi wa, amma ka da nu shanga su ka hangkal, ka nar daraja aka shanga mji.

³ Kamnyar wala mburu ma waci mburu ku ndzi caku, ka hara nggyarɗəkur. Mji ku shamta mburu tə mburu ndzi mafar nggukayeri, kəga bara msərakur zumzum. Mburu akwa shamta sakar mburu akwa hara kəmanggarkur, ka səlka, mji akwa nggəlar mburu, mburu akwa nggəlar ɗa tsuwa.

⁴ Amma sakatə Hyel na Mdər mbantər mburu hara ala mburu ɓɗakkur ka ncantə hirkurərni na ana palidzi wa ni ala mburu,

⁵ antə tsa mbantə mburu. Tsuwa ngəni aɗi kamnyar ɓɗakkur kəthlərər mburu laga wa, amma kamnyar kətadzərni. Antə tsa kəcimta bikər mburu, ka namtə mburu tə mburu ndzi mji bilən atar Mambəl na Ɓɗakkarkara.

⁶ Tsa pungkər ala mburu Mambəl ni ka tsiyari bwang, atar Yesu Kristi na Mdər Mbantər mburu.

⁷ Tsa hara ala mburu ɓɗakkur ngəni ni kamnyar ka mburu mzhi ndzi kula biku akəmari, ka ndzi ka hamta jiri abbər mburu ata sə wutə mpikə na akur wa ni.

⁸ Tsuwa gari ngəni ni jiri. Antə I akwa bara ka gə dunautə suayeri ngəni swaiswai, kamnyar ka mji na hamta jiri aka Hyel ni, vu kəra ɗa akwa hara kəthlərayeri na ɓɗakɓɗaku. Kamnyar suayeri ngəni ni ɓɗaku, tsuwa da su na ata dlar mji.

⁹ Amma ka giri zhar beɗiyayeri na kula kər, ka jika mjir nyarmbwar kəka, ka beɗiyayeri kəga mpa ata kəra tsawur mjir Yahudi ni, kamnyar sur dlara aɗi akwa wa.

¹⁰ Kəlara mdə na akwa səntə ndəkəmtadzi, ma ga ku mnya alari ka pal wala ka suɗa, ka gə psi wujirərni.

¹¹ Kamnyar jili mda apani ku kurtə mbaləmtadzi, natə bikərni akwa ncanta abbər tsa ku sha.

Sur Thlipa Na Akwa Tsikərari

¹² Ma sakatə I ku thlentə Artimas wala Tikikus adzə nga, ka gə ntsətədzi kara si adzə ra ahar Nikopolis, kamnyar I ku ɗəmha abbər I ata sə kuri vəya ni anda.

¹³ Ka gə mbalɓəladzi ka wuta abbər ga ku dlar Zenas na alkali ka Apollos akwa lənggur ɗa ni. Ka gə wuta abbər ga ku na ɗa shanga su tə da akwa turari.

¹⁴ Dwali ka mjir mburu thliptə hara suayeri na ɓɗakɓɗaku, atar dlar mji na akwa tura ata mamshari. Apani da aɗi ata ndzi kula ampani wa.

¹⁵ Shanga mji na adzə ra akwa thlawar nga. Ka gə thlawar mji na ana paktə kər ka mburu akwa hamta jiri ni. Ka Hyel hara ala giri ɓɗakkur.