Titus 2 - KAKAƊU NA ƁƊAKKARKARA

Ka Gə Dunautə Sur Thlipə Na Kalkalari

¹ Amma ar nga, ka gə thlipə su na ata kəɓa ka surthlipə na ɓɗaku.

² Ka gə thlipa aka mji na ol'ola ka da ndzi ngkahəngkahari, ka da hara su ka jirkur, ka ndzi ɗəɗu, ka ndzi ka hamta jiri na jirari, ka hirkur, ka nggitər su.

³ Tsuwa ka gə thlipa aka mwanki na ol'ola ka da ndzi ka halər mjir nu Hyel, aɗi mjir hilantə thləma mdə wa, wala mjir wikə na ɗimi wa. Amma ka da ndzi mjirthlipə su na ɓɗaku,

⁴ kamnyar ka da mzhi thlipə hal na ɓɗaku aka mwanki na haɗa ləkwa mbwar ɗa ka da hir shilər ɗa ka maɗa' ɗa,

⁵ ka da ndzi ka mbwiɗəffu ka kəcəkəcəkur ka da ndzi mwanki na ngkahəngkahari akwa kəyir ɗa, ka ɗəffa ɗa kəcəkəcari, na akwa wul kutakəyir ɗa ɓɗaku, ka da ndzi mwanki na ka hangkal, na akwa kələngkər aka shilər ɗa, kamnyar ta mda asə rutə ndərər Hyel.

⁶ Tsuwa ka gə tsaktə mji shili na kustayeri ka da ndzi ngkahəngkahari.

⁷ Akwa shanga su ka mji wul sur thlipə na ɓɗaku ata ga, tsuwa akwa thlipər nga ka gə thlipə ka jirkur ka gə kəsi mdəkurər nga.

⁸ Ka gə ndzi mdər ngkər jirkur natə mda aɗi ata wutə sur nggəla akwa gariyir ngə wa. Atar apani dawayeri na ar mburu ata ləkwa səli, kamnyar da aɗi wutə su na ɗimi tə ka da pəla ata kəra mburu wa.

⁹ Ka gə tsaktə mafayeri ka da kələngkər aka mthlakər ɗa akwa shanga su, ka da hara su na ata kəskəra ɗa, da aɗiya pəlangkər ala ɗa wa,

¹⁰ tsuwa da aɗiya həl sur ɗa wa. Amma ka da ncantə jirkur akwa shanga su, kamnyar ka da nar səli aka surthlipə na ata kəra Hyel na mdər mbantər mburu ni, akwa shanga su.

¹¹ Kamnyar Hyel ku hara ala mburu ɓɗakkur, atar si akwa duniya, kamnyar ka shanga mji wutə mbantədzi.

¹² Ɓɗakkur tə tsa hara ala mburu ni akwa thlipa ala mburu abbər ka mburu pumta halayeri na aɗi ata kəskəra Hyel wa, ka nggukər sur duniya, ka mburu ndzi ngkahəngkahari, akwa hara su na kalkalari, ka halayeri na ata kəskəra Hyel akwa zaman ngəni.

¹³ Ka mburu ləkəma ka ndzi akwa laku ngəni apatə mburu akwa sək vir na ol ni, vir tə Hyelər mburu na ola ka Mdər Mbanta Yesu Kristi ata sə si akwa səli na ol ni.

¹⁴ Yesu hamta kərni ni kamnyar ka tsa msərantə mburu akwa shanga bikayeri, ka tsa kəcimta mburu, ka namtə mburu ka mburu ndzi mjirni, na ata ndzi ka ɗəffər hara suayeri na ɓɗakɓɗaku.

¹⁵ Ka gə thlipə suayeri ngəni, ka gə dunautə shanga mjir nuwa ka da hara. Ka gə mpa ala ɗa ka olkur tə gə kəgari ni. Ga aɗiya hir ka mdə rutə ngə wa.