Səɓəlari 9 - KAKAƊU NA ƁƊAKKARKARA

Bwani na Ntəfkur: Mtər Mwaɓiyayeri

¹ Antə MTHLAKU pəla aka Musa, “Mwari adzə kuthli ka gə pəla alari abbər I na MTHLAKU na Hyelər mjir Ibrani akwa pəla, ‘Zhar mjirna ka da təra, ka da ra vəngkər səli ali.

² Kamnyar ma ga ku nggəlar ta zhar ɗa ka da təra, tə ga ku ləkəma ka kəsi ɗa,

³ MTHLAKU ata ɗi nga atar səntə shilkər mwaɓi na ata kurəmta mwaɓiyayeri ar nga na aɓəla, ka takwayeri, ka kwarayeri, ka dləkəmauwayeri, ka thlayeri, ka təmayeri, ka kwiyayeri.

⁴ Amma I ata ndəkəmta daɓwa mwaɓiyayeri ar mjir Israila ka ar mjir Masar, natə wala mwaɓiyir mjir Israila duku aɗi na ata mtə wa.

⁵ Antə I na MTHLAKU thlamta saka abbər ɗəpa antə I ata hara su ngəni akwa tsəɗi ni.’ ”

⁶ Səɓəla ɗəpari antə MTHLAKU ku hara apatə tsa pəla. Shanga mwaɓiyir mjir Masar ku mtəgəmtadzi, amma mwaɓiyir mjir Israila aɗi na mtə wala duku wa.

⁷ Antə kuthli ku thlentə mdə na mwari ka nggaɓəla abbər jiri mwaɓiyir mjir Israila ni aɗi na mtə wala duku wa. Amma kuthli ku namtə ɗəffari ɓəɓal, ka nggəlar ta zhar ka mjir Israila təra.

Bwani Na Ngkwakur: Shilkər Kuɗu

⁸ Antə MTHLAKU pəla aka Musa ka Haruna, “Kətsə giri pənju na akwa vir u'u akwa kuta tsiya giri, ka Musa ra titiləmtari akwa shambar ata nca kuthli.

⁹ Antə pənju ni ata titiləmtadzi apa kalau ata kəra shanga tsəɗi Masar, ka hara ka kuɗu na ata puɓəladzi ka ndəla ata dza mji kəga mwaɓiyayeri na akwa shanga tsəɗi Masar.”

¹⁰ Antə da ku kətsə pənju akwa vir u'u ka mwari ka thləthlata akəma kuthli. Musa ku titiləmta pənju ni amta akwa shambar, antə kuɗayeri ku puɓəladzi ka ndəla ata dza mji kəga mwaɓiyayeri.

¹¹ Har ɗeaghayeri ni aɗi mzhi thləthlata akəma Musa wa, kamnyar wala da ma kuɗu ni ku puɓəladzi ata dza ɗa tsu apa shanga mambila mjir Masar.

¹² Amma MTHLAKU ku hara tə kuthli ku namtə ɗəffari ɓəɓal, tə tsa aɗi psi thləm ala ɗa wa, kalkal apatə MTHLAKU ku pəla aka Musa.

Bwani Na Murfəkur: Handzəkəla

¹³ Antə MTHLAKU pəla aka Musa ka tsa thlatə ɗəɗəpə mbing, ka tsa mwari adzə kuthli, ka tsa pəla alari abbər, “MTHLAKU na Hyelər mjir Ibrani akwa pəla, ‘Ka gə zhar mjirna ka da təra, ka da ra vəngkər səli ali.

¹⁴ Kamnyar kulini I ata thlenta asarayeri na mwavər ata kəra gə sur nga, ka ata kəra kwakunayeri ar nga, ka mjir nga, kamnyar ka gə sənda abbər jiri akwa shanga duniya ni dludzərna aɗi wala duku wa.

¹⁵ Kamnyar ma I an haptə tsi ka tsa nga kəga mjir nga ka shilku, sakani giri ku kurəmtadzi kazhar kəra duniya.

¹⁶ Amma I ku zhar nga ka mpika, kamnyar kəi ncanta ala gə kuthlikur tə I kəgari, tsuwa ka shanga duniya səndə ra.

¹⁷ Amma ba kulini ga akwa hara kər olkur, tsuwa ga aɗi hir zhar mjirna ka da təra wa.

¹⁸ Antə ɗəpə saka apani I ata thlentə handzəkəla na mwavər ka duna ka tsa pughəidzi ata kəra giri, handzəkəla natə mjir Masar aɗi ɗar wutə jiliyari təng tə mdə nthlə tsəɗi ni wa.

¹⁹ Antə kulini, tar ka gə thlentə ka mdə səntə thlayeri ar nga ka shanga suayeri ar nga na aɓəla akwa mtaku. Kamnyar kəlara mda wala mwaɓi na aɓəla, ma handzəkəla ni ku pwa ata kərari, tsa ata mta.’ ”

²⁰ Antə bwadukwa kwakunayeri ar kuthli ku thlivər su tə MTHLAKU pəla ni, tə da hangkər ka səvi ka mafayeri kəga mwaɓiyayeri arɗa akwa kutakəi ta su awutə ɗa.

²¹ Amma mji na aɗi psi thləm aka MTHLAKU wa, da ku zhar mafayeri kəga mwaɓiyayeri arɗa tsu aɓəla akwa mtaku.

²² Antə MTHLAKU pəla aka Musa, “Hapta tsiya ga amta awul vəi na amtazi kamnyar ka handzəkəla pughəidzi ata kəra shanga tsəɗi Masar, ata kəra mji, ka mwaɓiyayeri, ka ata kəra sur faku, ka shanga su ptsəptsa na akwa mtaku.”

²³ Antə Musa ku haptə zwal ni aharhyel. Antə MTHLAKU ku thlentə dləra ka pughəi handzəkəla, tə u'ur wurka ku mbəla har ka səghəi ata di. Antə MTHLAKU ku pughəi handzəkəla ata kəra tsəɗi Masar.

²⁴ Antə Handzəkəla ku tər ka təra, tə u'ur wurka ku kəɗar hara akwa nca yimər handzəkəla na akwa səghəi ni. Antə handzəkəla ku tər ka duna natə mda aɗi ɗar wutə jiliyari akwa tsəɗi Masar təng waci wa.

²⁵ Antə handzəkəla ku ɓzagamtə shanga su na aɓəla ata bəbal akwa tsəɗi Masar. Tsa kurəmta mji kəga mwaɓi, ka dlaɓumta shanga su ptsəptsa ka thlarəmta shanga nfwayeri na akwa mtaku.

²⁶ Tar akwa tsəɗi Goshen vəi tə mjir Israila akwa, antə handzəkəla ni aɗi mwari wa.

²⁷ Antə kuthli thlentə ka mdə kəga alari Musa ka Haruna. Tə tsa pəla ala ɗa, “Akwa saka ngəni kam I ku hara biku. MTHLAKU an ka jirkur, yeru kəga mjirna an sha.

²⁸ Kiɗə giri ali kəra MTHLAKU! Kamnyar dlərər hyel ka handzəkəla ni ku mzhi apani. Kulini jiri I ata zhar giri ka giri təra, giri aɗi ata ndzi azi kəra wa.”

²⁹ Antə Musa pəla alari, “Təkəma ma I ku ləɓəla kazhar di ni, I ata haptə tsi amta aka MTHLAKU akwa adduwa, antə dləra ka wurkə ni ata thləthlata. Antə ga ata sənda abbər duniya ni ar MTHLAKU.

³⁰ Amma I ku sənda abbər ba kulini giri kəga kwakunayeri ar nga aɗi akwa thlivər MTHLAKU na ka Duna ta Shang katagu wa.”

³¹ Kulini nggaɓi kəga mthlir barli ku higəlantədzi, kamnyar mthlir barli ku kurtə pu munya, tsuwa nggaɓi ku kurtə pukdla.

³² Amma alkama ka alkamar mtaku aɗi hilantədzi wa, kamnyar arɗa da ana hara aghəli.

³³ Antə Musa ku təra kazhar kuthli ka ləɓəla kazhar kuta di. Tə tsa haptə tsiyari amta akwa adduwa aka MTHLAKU, antə dləra, ka wurka, ka handzəkəla ku thləthlata, tsuwa yimi aɗi tər kəra wa.

³⁴ Sakatə kuthli ku wuta abbər, yimi, ka handzəkəla, ka dləra, ka wurka ku thləthlata, antə tsa kəga kwakunayeri arni ku jaktə hara biku, ka namtə ɗəffari ɓəɓal apa na hwatu.

³⁵ Antə kuthli ku namtə ɗəffari ɓəɓal, ka nggəlari ta psi mjir Israila ka da təra, kalkal apatə MTHLAKU ku pəla.