Səɓəlari 11 - KAKAƊU NA ƁƊAKKARKARA

Musa Ku Psəmnya Mtər Yarakəma

¹ Antə MTHLAKU pəla aka Musa abbər, “Ba kulini bwani ku mbil pal tə I ata səntari aka kuthlir Masar kəga mjirni. Aghəla bwani ngəni antə tsa ata zhar giri ka giri təra. Antə ma sakatə tsa ku zhar giri ka giri təra ni, tsa ata kədləɓəla giri karkar kazhar tsəɗi ni.

² Antə ka gə pəla aka mji, shili ka mwanki, ka da yutə kariyir dəɓa ar adzərfa ka ar dinar akəla ntəwulayeri arɗa.”

³ Antə MTHLAKU hara tə mjir Masar ku wul mdəkur mjir Israila, har tə kwakunayeri ar kuthli kəga mjir Masar shang ana nar səli ka olkur aka Musa.

⁴ Antə Musa pəla aka kuthli, “MTHLAKU pəla, ‘I ata sə təramta akwa Masar apa kərathlər viri,

⁵ antə shanga maɗashili na yarakəma akwa tsəɗi Masar ata mta, baɗita ata yarakəmar tsa na kuthli na ata dəkəl kuthlikur, har ka mwanta aka yarakəma ar mwala mafa na akwa hadla, har ma kəga yarakəmar thlayeri, shang ata mtəgəi.

⁶ Antə akwa kəlara bwa akwa Masar mji ata sə tuwa ka kuraku swaiswai, tuwa na mwavər tə mda aɗi ɗar nggatə jiliyari wa, tsuwa mda aɗi ata jaktə nggatari kəra wa.

⁷ Amma ar mjir Israila, wala kila aɗi ata mbuhə mdər Israila wala mwaɓiyir ɗa wa. Apani antə giri ata sənda abbər MTHLAKU ku ndəkəmta daɓwa mjir Masar ka mjir Israila.’ ”

⁸ Tsuwa Musa pəla, “Aghəla nda antə shanga kwakunayeri ata sə si ka zuzuri akəmi ka kəma ɗa ata di, ka da kiɗə kəri abbər, ‘Hangkər kara təra, ga ka shanga mjir nga!’ Aghəla nda antə I ata sə təra.” Antə Musa ku ləɓəla ka ɗəffari ɓzəɓzari kazhar kuthli.

⁹ Antə MTHLAKU pəla aka Musa abbər, “Kuthli aɗi ata psi thləm kamnyar nga, kamnyar kəi jaktə hara surndatayeri damwa akwa Masar.”

¹⁰ Antə Musa ka Haruna ku hara shanga surndatayeri ni akəma kuthli, amma MTHLAKU ku namtə ɗəffa kuthli ni ɓəɓal, tə tsa aɗi ata hir zhar mjir Israila ka da ləɓəla kazhar tsəɗiyirni wa.