Səɓəlari 10 - KAKAƊU NA ƁƊAKKARKARA

Bwani Na Nciskur: Ntsəkwa

¹ Antə MTHLAKU pəla aka Musa, “Mwari adzə kuthli, kamnyar I ku namtə ɗəffari ɓəɓal ka namtə ɗəffa kwakunayeri arni ɓəɓal, kamnyar kəi haratə surndatayeri ngəni akwa nca ɗa,

² ka tsuwa kamnyar ka gə sə pəla aka maɗa' nga kəga kəkayeri ar nga laku tə I hara bwani aka mjir Masar, ka surndatayeri tə I hara akwa nca ɗa, kamnyar ka shanga giri sə sənda abbər I an MTHLAKU.”

³ Antə Musa ka Haruna mwari adzə kuthli ka pəla alari, “MTHLAKU na Hyelər mjir Ibrani akwa pəla, ‘Nawa antə ga ata sə zhar nggəlar ta tərghəi kəra ga ali nə ri? Zhar ka mjirna təra, ka da ra vəngkər səli ali.

⁴ Kamnyar ma gə nggəlar ta zhar mjirna ka da təra, ɗəpa I ata səntə ntsəkwa akwa tsəɗiyir nga.

⁵ Antə da ata hartə kəra di ni cipu har tə mda aɗi ata mzhi wutə di wa. Antə da ata ɓɗəmnya shanga su na mbiləmta tə handzəkəla aɗi ɓzamtə wa, ka paktə ka shanga nfwayeri na akwa ɗəɗa akwa mtaku.

⁶ Da ata nghyantə kutakəyir nga, ka kutakəyir kwakunayeri ar nga, ka shanga mjir Masar. Antə wala mjir yar nga kəga kəkayeri ar nga aɗi ɗar wutə jili ntsəkwa apani təng tə da si ata kəra duniya wa.’ ” Antə Musa ku shinar kəmari ka ləɓəla kazhar kuthli.

⁷ Antə kwakunayeri ar kuthli si adzə ni ka pəla alari, “Ka barkar nga! Nawa antə mdə ngəni ata sə zhar ndəkərəngkər ala mburu asar ri? Zhar mji ngəni ka da təra, ka da ra vəngkər səli aka MTHLAKU na Hyelər ɗa bu. Nənga har ba sakani ga aɗi sənda abbər Masar ku hilantədzi ɗimi ɗimi wa ri?”

⁸ Antə mdə ku jaktə ngka ka Musa ka Haruna akəma kuthli. Antə kuthli ni pəla ala ɗa, “Mwar giri, ka giri ra vəngkər səli aka MTHLAKU na Hyelər giri, amma pəla gir ali kəga wa akwa nca giri an ata mwar nə ri?”

⁹ Antə Musa shinau ka pəla, “Shanga yeru an ata mwari, maɗankyar kəga maɗiyayeri. Yeru ata fatə maɗa' yeru shili ka mwanki, kəga ciɓər təma, kəga kwi, kəga thla. Kamnyar ku ndzi dwali ka shanga yeru paktədzi akwa hara kucali aka MTHLAKU.”

¹⁰ Antə kuthli ni pəla, “Ka Hyel mwantə giri! Har kəi zhar giri ka giri təra kəga mwankir giri kəga maɗa' giri na raka raka! Ngəni ku ndzi ata bəbal abbər ɗimikur antə giri ku ɗəmha.

¹¹ Awa, ahara wa! Giri ata təra ka mji shili daci, ka giri ra vəngkər səli aka MTHLAKU, kamnyar an su tə giri akwa barari.” Antə mdə ku kədləmta Musa ka Haruna kazhar kəma kuthli.

¹² Antə MTHLAKU pəla aka Musa, “Haptə tsiya ga amta ka gə ndərari təbwar tsəɗi Masar, kamnyar ka ntsəkwa si. Ntsəkwayeri ni ata hartə shanga tsəɗi Masar, ka ɓɗəmnya kəlara su ptsəptsa na akwa tsəɗi ni, watau shanga su na ka thlali tə handzəkəla ni aɗi thlarəmta wa.”

¹³ Antə Musa haptə zwal na akwa tsiyari ni amta təbwar tsəɗi Masar. Antə MTHLAKU hara tə shambar laga thlatə təbwar raghəi ka ɓukci ka pi akwa fya akwa tsəɗi Masar. Təng ɗəɗəpə mbing, shambar ni dli səntə ntsəkwayeri ni.

¹⁴ Antə ntsəkwayeri ni ku mwari akwa kəlara bwa, ka hartə shanga tsəɗi Masar. Mda aɗi ɗar wutə jili hangkur ntsəkwa apani wa, tsuwa mda aɗi ata jaktə wutə jili hangkurər ɗa apani kəra wa.

¹⁵ Kamnyar ntsəkwayeri ni ku hartə shanga vəi, har tə tsəɗi ni hara mənggəl kamnyar hangkurər ɗa. Antə da ɓɗəgəmnya shanga su ptsəptsa na akwa tsəɗi ni, ka shanga yar nfwayeri na mbiləmta aghəla handzəkəla nda. Thlali miraku aɗi na mbil wa, wala ar nfwa, wala su ptsəptsa na akwa na akwa mtaku akwa tsəɗi Masar.

¹⁶ Təkəma antə kuthli thlentə mda ka tsa ra kəga Musa ka Haruna. Antə tsa pəla ala ɗa, “I ku hara biku aka MTHLAKU na Hyelər giri ka hara biku ala giri tsuwa.

¹⁷ Kulini ka giri jaktə yafitə ra, ka giri kiɗa ali kəra MTHLAKU na Hyelər giri ka tsa kələmta ali asar ar kurəmta mdə ngəni.”

¹⁸ Antə Musa ləɓəla kazhar kuthli ka ra hara adduwa aka MTHLAKU.

¹⁹ Antə MTHLAKU pali bwar fi shambar ni, tə shambar ni baɗitə fi ka duna təbwar ramta. Antə shambar ni famta ntsəkwayeri ni ka pu ɗa akwa Manda Duwathlu, tə ntsəkwa wala duku aɗi mbili akwa tsəɗi Masar wa.

²⁰ Amma MTHLAKU ku namtə ɗəffa kuthli ɓəɓal, tə kuthli ni aɗi zhar mjir Israila ka da təra wa.

Bwani Na Əmdləkur: Kuthlu

²¹ Antə MTHLAKU pəla aka Musa, “Haptə tsiya ga amtazi kamnyar ka kuthlu na thlərətu si ka hartə shanga tsəɗi Masar, kuthlu na thlərətu ka duna har tə mda ata nggatari ata dzari.”

²² Antə Musa haptə tsiyari amtazi, tə kuthlu na thlərətu ku si ata kəra shanga tsəɗi Masar mnyar vir makər.

²³ Mda aɗi na mzhi wutə nvwa ni wa, tsuwa mda aɗi na mzhi zhar vəi tə tsa akwa wa, har vir makər. Amma akwa shanga bwa tə mjir Israila akwa, parakəu aɗi.

²⁴ Antə kuthli ku kəga Musa ka pəla alari, “To, mwar giri, ka giri ra vəngkər səli aka MTHLAKU, shanga giri kəga mwankir giri kəga maɗankyar giri. Amma ka giri zhar təmar giri, kəga kwiyir giri, kəga thlar giri tsu azi.”

²⁵ Amma Musa pəla alari, “Tar ka gə zhar yeru ka yeru mwari kəga mwaɓiyir yeru kamnyar hamta saɗakayeri ka saɗaka mbamba aka MTHLAKU na Hyelər yeru.

²⁶ Ku ndzi dwali ka yeru təra kəga mwaɓiyir yeru, wala mpəla mwaɓi duku yeru aɗi ata zharari aghəli wa. Kamnyar akwa nca ɗa antə yeru ata carɓəla natə yeru ata vəngkər səli aka MTHLAKU na Hyelər yeru kəgari. Tsuwa kulini yeru amzhi səndə jili mwaɓi tə yeru ata vəngkər səli aka MTHLAKU kəgari wa, tar ma yeru ku mwari anda.”

²⁷ Amma MTHLAKU ku namtə ɗəffa kuthli ɓəɓal tə tsa aɗi hir zhar ɗa ka da təra wa.

²⁸ Antə kuthli ni pəla aka Musa, “Thlat təra azi! Ka gə ləkwa hangkala ga. Ga aɗiya hir kəi jaktə wutə nga azi wa! Kamnyar ma vir tə I ku jaktə wutə nga, ga ata mta.”

²⁹ Antə Musa pəla alari, “Tsu apatə gə pəla, ga aɗi ata jaktə wutə ra kəra wa.”