Səɓəlari 1 - KAKAƊU NA ƁƊAKKARKARA

Bwani Tə Mjir Israila Ɗari Akwa Masar

¹ Nayeri ni an thləma maɗashilər Israila na mwari kəga baba' ɗa Yakub ahar Masar, waskəi ka kutakəyirni.

² Ruben, ka Simeyon, ka Lawi, ka Yahuda,

³ ka Issakar, ka Zebulun, ka Benjamin

⁴ ka Dan, ka Naftali, ka Gad, ka Asher.

⁵ Ar Yusuf mdə ku kurtə mwantə ni ahar Masar. Hangkur maɗashilər Yakub kəga kəkayeri arni na maɗashili shang an mji murfəkumari.

⁶ Yusuf, ka shanga maɗama'ni, ka shanga mji na akwa zaman na ndaga ku mtəgəi.

⁷ Amma nyarmbwar maɗa' Israila ku yatədzi hang, ka hara dlama dlama. Da ku jaka har tə mjir ɗa ku ndzi ka duna, antə da ku nghyantə tsəɗi ni.

⁸ Tsuwa akwa saka ngəni kuthli laga bilən ku wutədzi ahar Masar na aɗi səndə Yusuf wa.

⁹ Antə kuthli ni pəla aka mjirni abbər, “Wul giri mjir Israila ni ku hara hang kamta, har da ku təramta duna mburu.

¹⁰ Asər giri, ka mburu səndə su tə mburu ata hara ala ɗa ta da aləkəma ka yatədzi hang. Kamnyar ma mpa ku sə thlata, da ata sə mzhi paktə kər kəga dawayeri ar mburu, ka da dlərəmta mburu, ka hwi kazhar tsəɗi ni.”

¹¹ Antə mjir Masar pugəi helmayeri ata kəra ɗa na ata dwalitə ɗa akwa hara kəthlər mafakur. Antə da vu mjir Israila ni ka da nthləi kauyayeri ar pwi su aka kuthli. Antə da ku nthləi Pithlom ka Rameses.

¹² Amma apatə mjir Masar akwa ləkəma ka jakəngkər bwani aka mjir Israila, mjir Israila tsuwa akwa vərvər hara hang, ka titiləmtadzi akwa kəlara bwa, har tə mjir Masar ni baɗitə thlivər mjir Israila ka duna.

¹³ Antə mjir Masar ku ləkəma ka hara bwani aka mjir Israila kula kətadza.

¹⁴ Da hara tə mjir Israila ndzi akwa ɗəffə ɓzəɓza tədəku kamnyar mwavərkur kəthlər ar hər həi, ka caɗu, ka shanga jili kəthlərayeri na akwa fakayeri. Tsuwa mjir Masar ni aɗi akwa kətadzə ɗa wala raka wa.

¹⁵ Antə kuthlir Masar gari aka Shifra ka Puwa, mwankir kathla ar mjir Ibrani. Tsa pəla,

¹⁶ “Ma sakatə giri ata dlar mwankir Ibrani akwa kathla ala ɗa ɓzər, ka giri vədzə hangkala giri sakatə da ata kulahər ya ni. Ma giri wuta abbər ɓzər sal antə tsa ya, ka giri tsi ni, amma ma ɓzərngkwa, ka giri zhar ni ka mpika.”

¹⁷ Amma mwankir kathlə ni ana thlivər Hyel antə da aɗi hir hara su tə kuthlir Masar tsawa ala ɗa ni wa, antə da ku zhar maɗashili ka mpika.

¹⁸ Antə kuthlir Masar kəga mwankir kathlə ni ka pəla ala ɗa, “Kamnyar mi tə giri hara su ngəni ri? Kamnyar mi tə giri akwa zhar maɗashili ka mpikə ri?”

¹⁹ Antə mwankir kathlə ni shinau alari ka pəla, “Mwankir Ibrani ni aɗi apa mwankir Masar wa, kamnyar arɗa da ɓəɓal. Antə da ana ya akəmata mwankir kathla amzhətə ɗa.”

²⁰ Antə Hyel ku hara ɓɗakkur aka mwankir kathlə ni. Antə mjir Israila ku ləkəma ka jaka har tə mjir ɗa ku hara hang ka ndzi ka duna.

²¹ Kamnyar tə mwankir kathlə ni ana thlivər Hyel antə Hyel ku na ɗa mjir kutakəyir kəra ɗa.

²² Aghəla nda antə kuthli ni ku hamta tsawa aka shanga mjirni abbər, “Kəlara ɓzər sal natə mwalar mjir Ibrani ku yaɓəla, ka giri ndzəhəuwa ni akwa Thlyagha Nayil, amma kəlara ɓzərngkwa ka giri zhar ni ka mpika.”