Ruth 4 - KAKAƊU NA ƁƊAKKARKARA

Bowaz Ku Kəl Ruth

¹ Antə Bowaz mwari akwa nyarfur kutadi ka ndzəndzi anda. Antə yangkura Elimelek na kudzəha ta shang natə Bowaz gari ata kər ni si akwa təramta. Antə Bowaz kəga ni abbər, “Asəra azi, pazhi, ka gə ndzəndzi.” Antə tsa ku mwari ka ndzəndzi.

² Antə Bowaz ku kəga mji na ol'olər kutadi kuma, ka kiɗə ɗa ka da ndzəndzi tsuwa. Sakatə da ku ndzəndzi,

³ antə Bowaz pəla aka mdə ni abbər, “Naomi ku ngka kazhar Mowab. Antə tsa akwa bara ɗələmta fakər yangkura mburu Elimelek.

⁴ Antə I wuta abbər kalkal ka gə səndə su ata kər. Antə kulini ma ga akwa barari ka gə masta akəma mji ngəni andzəndzi ni. Amma ma ga aɗi ata hirari wa ka gə pəla antə I ata mastari. Kamnyar mdə na kudzəhər masari aghəla ga an iya.” Antə mdə ni pəla, “I ata masari.”

⁵ Antə Bowaz pəla, “Kalkal. Amma ka gə sənda abbər vir tə ga ku mastə vəi ni akəla Naomi ga ata kəl Ruth ngkwar mjir Mowab na kughung ni. Apani vəi ni ata sə jaktə ngka aka kutakəyir mdə na mtə ni, antə thləmari aɗi ata sha wa.”

⁶ Antə mdə ni pəla, “Ma apani, I amzhi masə vəi ni wa, kamnyar ata hara ka kifər kutakəyirna sə sha. Antə I ku zhari ala ga kara pəli. I amzhi pəliyari wa.”

⁷ Akwa zaman nda ku ndzi surharar mjir Israila ka mdə ntsui ɓaɓiyirni ka tsa hamta aka mdə damwa na ata pali ni akwa ndzi mthlakər su ni. Apani antə mji ata kələngkərari abbər mdə na bilən ni ku ndzi mthlakər su ni akwa laku na kalkalari.

⁸ Apani antə mdə ni ku ntsui ɓaɓiyirni ka hamta aka Bowaz, ka pəla, “Ga ata mzhi mastari.”

⁹ Antə Bowaz pəla aka mji ol'ola ka shanga mji na anda, “Giri an seɗayeri ashina abbər I ku masta akəla Naomi shanga sur Elimelek ka sur maɗa'ni Kiliyon ka Mahlon.

¹⁰ Tsuwa, Ruth na ngkwar Mowab, kughungər Mahlon, ata ndzi mwalangkəya. Ngəni ata namtə ka sur mshi ni ndzi tsu akwa thləmari. Apani Elimelek ata wutə kəka antə thləmari aɗi ata sha akwa nca maɗama'ni akwa di ni wa. Giri an seɗayeri ashina.”

¹¹ Antə mji ol'ola ka shanga mji na anda pəla, “Yeru an seɗayeri. Ka MTHLAKU hara ka mwalangkiri ni ndzi apa Rahila ka Leya na ku ya maɗa' hang aka Yakub. Ka Hyel hara ka gə ndzi ka gəna akwa nyarmbwar Efrath, ka thləma gə tuwa akwa Bethlelehem.

¹² Ka MTHLAKU hara ka maɗar tə ngkwa ngəni ata ya ala gə namtə ka kutakəyir nga ndzi sənsəndari akwa Bethlelehem apa kutakəyir Perez natə Tamar ku ya aka Yahuda.”

Bowaz Ka Kəkayeri arni

¹³ Antə Bowaz ku kəl Ruth. MTHLAKU ku vədza alari barka antə tsa ku kətə hur ka yaɓəla ɓzər sal.

¹⁴ Antə mwanki pəla aka Naomi, “Ka huwa ndzi aka MTHLAKU, na aɗi zhar nga kula mdər wul ngə wa. Ka Hyel hara ka ɓzər ni ndzi mdə na ola akwa Israila!

¹⁵ Ka ɓzər ni sə dunautə nga, ka tsa dlar nga akwa sakatə ga ku hali. Kamnyar tsa an ɓzər mwalaɓzər nga na hir nga, na təramta ala gə maɗa' murfa.”

¹⁶ Antə Naomi kətə ɓzərni ka vu ni akwa humbari, ka wulwul ni.

¹⁷ Antə mwanki na ntəwulərni pəla, “Mdə ku yaɓəla ɓzər aka Naomi!” Antə da vətə thləm aka ɓzərni abbər Obed. Tsa an yaɓəla Yesse na baba' Dauda.

¹⁸ Nayeri ni an mji na akwa nyarmbwar Perez. Baɗitə ka Perez ka mwanta aka Dauda Perez an yaɓəla Hezron,

¹⁹ Hezron an yaɓəla Ram, Ram an yaɓəla Amminadab,

²⁰ Amminadab an yaɓəla Nashon, Nashon an yaɓəla Salmon,

²¹ Salmon an yaɓəla Bowaz, Bowaz an yaɓəla Obed,

²² Obed an yaɓəla Yesse, Yesse an yaɓəla Dauda.