Mika 6 - KAKAƊU NA ƁƊAKKARKARA

MTHLAKU Akwa Pəla Israila Ku Hara Biku

¹ Mjir Israila, nggatə gir su tə MTHLAKU akwa pəla ali, “Thlatə, ka gə pəla su na damitə nga akəma garayeri, ka ɗəɗəgəlayeri nggatə kuraka ga.”

² Giri na garayeri, nggatə giri damitədzər MTHLAKU, psi giri thləm, giri na zhimbwala duniya na ba saka madi. Kamnyar MTHLAKU ata burkatə mjirni, tsa akwa pəla mjir Israila aɗi hara kalkal wa.

³ “Mjirna, man tə I hara ala giri ri? Akwa mi antə I ku ghərantə giri ri? Pəla giri ali!

⁴ Kamnyar I ku fwaɓəla giri akwa tsəɗi Masar ka msərantə giri akwa mafakur. I ku thlenta ala giri Musa, ka Haruna, ka Maryamu, ka da pwar giri.

⁵ Mjirna, ɗangtə giri, su tə Balak na kuthlir Mowab ɗəmha ata kəra giri, ka su tə Balaam na ɓzər Beyor shinau alari. Ɗangtə gir lənggur giri akwa daɓwa Shittim ka Gilgal, giri ata nggaɓəla su tə I, na MTHLAKU, hara kamnyar mbantə giri akwa sakayeri laga.”

Su Tə MTHLAKU Ana Bara

⁶ “Ka mi antə kəi si akəma MTHLAKU, ka zuzuri akəma Hyel na amta ri? Kəi si akəmari ka saɗaka mbamba ar kənayeri na ka məva ɗa pal pal ya?

⁷ Gam təmayeri dəpu pal ata mzhi namtə ɗəffa MTHLAKU ya nənga zərkayeri dəpu kuma ar mal zaitun ata mzhari ri? Ma I hamta alari saɗaka ka yarakəmarna ata mzhi ntəmta ali bikərna ya? Saɗaka mbamba tə I hara ka ɓzər kuti ata mzhi ntəmta ali bikər na ya?”

⁸ Awa, MTHLAKU ku ncanta ala gə su na ɓɗaku, mdə ragai, ka su tə tsa akwa barari akəla ga. Su tə tsa akwa barari an, Ka gə ndzi ka jirkur akwa shanga su, ka gə hir mji ka kətadzə ɗa tədəku, ka gə nu Hyelər nga ka tərghəi kər.

Zamba Ka Mwavərkur

⁹ Psi gir thləma giri! MTHLAKU akwa pəla aka mjir bərni Urushalima, abbər ɗəɗukur na jirari an thlivər ɗəffa MTHLAKU. Psi gir thləma giri! MTHLAKU ku thlamta sakatə tsa ata sə ɗi giri.

¹⁰ I ata fwari ata kəra gənar ɗimikur tə giri tsapta akwa kəi kəmanggarkur ni ya? Nənga I ata fwari ata kəra tasar ngkər su tə giri ana dəkhə kirari nə ri?

¹¹ Apa madi tə I ata zhar ɗi mji na ka aunar thlandər, ka mjir bufu na kula jirkur ri?

¹² Mjir gəna na akwa nca giri ni wutə gəna ni atar zamba ka mwavərkur, mjir tsəɗiyir giri shang akwa thlandər.

¹³ Kamnyar ngəni I ata dlaɓu giri, kəi titiləmta giri kamnyar bikər giri.

¹⁴ Giri ata səm susəma, amma giri aɗi ata ndlə wa, giri ata ndzi tsu ka məi. Giri ata tsaɓə su, amma suari aɗi ata ndzəndzi wa, shanga su tə giri vəi, ata sə sha akwa mpa.

¹⁵ Giri ata thləka, amma giri aɗi ata thliyari wa, giri ata ntsar mal zaitun, amma giri aɗi ata səmari wa, giri ata ntsar anap, amma giri aɗi ata sa yimari wa.

¹⁶ Kamnyar giri ku nu surharar Omri ka nu ɗimikur ar kutakəyir Ahab, ka nu shanga su tə da pəla. Antə I ata sənta asar ata kəra giri, tə mjir giri ata sə ndzi sur kumshi aka mji, ka shanga mji sə rutə giri.