Mika 4 - KAKAƊU NA ƁƊAKKARKARA

Kuthlikur Ar MTHLAKU An Msərakur

¹ Akwa virayeri na ata sə si akəmazi, gar na ka mbwar vəngkər səli aka MTHLAKU ata, ata sə ndzi gar na nal ta shanga garayeri. Tsa ata sə ndzi gar na amta ta shanga garayeri, antə mjir duniya hang ata sə gərdlədli mwari akwa.

² Mji ata sə thlata akwa tsəɗiyayeri hang ka si ka pəla, “Asər giri ka mburu mwari ata garər MTHLAKU, akwa mbwar vəngkər səli aka Hyelər Israila. Tsa ata sə thlipa ala mburu tsawur ni, antə mburu ata nu su tə tsa pəla akwa.” Kamnyar tsawur MTHLAKU ata səɓəla akwa Sihiyona, antə ndərərni ata thlata akwa Urushalima.

³ Tsa ata sə hara shariya akwa daɓwa tsəɗiyayeri, ka shwalatə daɓwa tsəɗiyayeri na ka duna na ciju. Da ata sə ɓdləmnya katsakarayeri arɗa ka da ndzi garmayeri, ka ɓdləmnya mwasayeri arɗa ka da ndzi ingdlar pa kəra nfwa, Antə tsəɗi aɗi ata sə jaktə haptə katsakar aka tsəɗi nvwa ni wa, wala jaktə ɗəmhədzi kamnyar mpa kəra wa.

⁴ Kəlara mda ata sə ndzi akira nfur anapərni ka akira nfur kamndərni ka msərakur. Tsuwa mda aɗi na ata thlivərantə ɗa wa, kamnyar MTHLAKU na ka Duna ta Shang an pəla.

⁵ Kamnyar kəlara dur akwa nu haptərni, amma ar yeru, yeru ata nu MTHLAKU, na Hyelər yeru har ba saka madi.

Israila Ata Ngka Kazhar Mafakur

⁶ MTHLAKU akwa pəla, “Vir nda I ata sə tsaptə mjirna na nggurdəkəi, ka mji tə I kədləɓəla ɗa ka mwanta akwa mafakur, ka shanga mji tə I vu tə da ɗar bwani.

⁷ I ata vu ka mji na nggurdəkəi an ndzi mji na mbiləmta, ka mji tə I kədləɓəla sə ndzi mji na ka duna. I na MTHLAKU an ata hara kuthlikur ata kəra ɗa akwa Gar Sihiyona, baɗitə kulini ka har ba saka madi.”

⁸ Antə gə na Urushalima, vəi tə Hyel ndzi apa mdər ɓəla na ana wul kəra mjirni, ata sə jaktə ndzi di kuthlikur apa na waci, mda ata jaktə ngka ala gə ka kuthlikur.

⁹ Kamnyar mə tə ga akwa tuwa ka kuraku ri? Ga aɗi ka kuthli wa ya? Mdər hamta ala gə sauri ku mtə ya? Nənga man hara tə ga akwa ɗar bwani ka duna apa mwala na akwa bwani ar kutərya nə ri?

¹⁰ Takəl giri akwa bwani ka giri nggyinggya, apa mwala na akwa kutərya giri na mjir Urushalima. Kamnyar kulini giri ata ləɓəla kazhar bərni ni, ka giri ra ndzəndzi akwa mtakəu, giri ata təra mwari ahar Babila. Anda antə MTHLAKU ata msərantə giri akwa tsiya dawayeri ar giri.

¹¹ Kulini mjir tsəɗiyayeri hang, ku tsaptədzi kamnyar mpa ka ga, Urushalima. Da akwa pəla, “Ndzi mda ata ɓzamtə Urushalima, ka mburu wul laku tə tsa ata ndla akwa!”

¹² Amma da asəndə dzamər MTHLAKU wa, da asəndə su tə tsa ɗəmhə wa, abbər tsa ku tsaptə ɗa apa julang, tə mda ata tsapta ata laliyir dəkə mthli.

¹³ MTHLAKU akwa pəla, “Urushalima, thlatə kara hadləmta tsəɗiyayeri! Kamnyar I ata na gə dunar gyal, natə təmbəlari liya ka mpəlari əmza. Ga ata dlidlirəmta mjir tsəɗiyayeri hang, ka fatə gənar ɗa ka hamta aka MTHLAKU, ka gənar ɗa ndzi aka mthlakər shanga duniya.”