Mika 3 - KAKAƊU NA ƁƊAKKARKARA

Mika Ku Mpa aka Mjir Pwar Israila

¹ Psi gir thləma giri, giri na ol'ola akwa nyarmbwar Yakub, giri na ka kuthlikur ata kəra Israila! Ai kalkal ka giri səndəɓəla su na ka jirkur,

² amma ba kulini giri akwa nggəlar ɓɗakkur ka hir ɗimikur. Giri ana fəi kəsəmər mjirna tə da tsu ka mpika, ka ɓudzəkəi kum na ata ɗethlər ɗa.

³ Giri ana ɓɗəmnya mjirna, ka fəi kəsəmər dza ɗa. Giri ana ɓəgəlwa ɗethlər ɗa, ka thləthlamta ɗa apa kum akwa tasa, apa kum tə mda ata tari akwa tughum.

⁴ Saka ata sə si tə giri ata sə tuwa aka MTHLAKU amma tsa aɗi ata shinau ala giri wa. Tsa ata sə ɗuwardzi ala giri sakanda, kamnyar ɗimikur surharar giri.

⁵ Nggədza su tə MTHLAKU akwa pəlari ata kəra naɓiyayeri na akwa shamta mjirni, mji na ana psəmnya abbər, “Msərakur”, aka mji na ana nar ala ɗa susəma, amma da ata pəla, “Mpa ata thlata”, aka mji na aɗi na ala ɗa su wa.

⁶ “Kamnyar ngəni giri na naɓiyayeri, su akwa ndzi ala giri kuthlu, su aɗi tə giri amzhi wutari kəra wa, kuthlə ku si ka hartə giri, antə ndər aɗi tə giri ata wutari akəli wa. Pcir giri ku kurtə təri, giri na naɓiyayeri, antə təpci ku ndzi ala giri kuthlu pələku.”

⁷ Giri na ana wul su, giri ata sə ləkwa səli, giri na ana hakdzi, mda ata sə kəli səliyir giri. Shanga giri ata sə hartə kəma giri kamnyar səli kamnyar giri aɗi ata sə wuta amsa akəla Hyel wa.

⁸ Amma arna, I nghyinghyari ka duna tsuwa I nghyinghyari ka mambələr MTHLAKU, tsa ku nghyantə ra ka jirkur ka dunautə ra, kamnyar kəi mzhi pəla aka Yakub vəi shar ni, kəi pəla aka mjir Israila bikayeri tə da hara.

⁹ Nggatə gir ngəni, giri na ol'ola akwa nyarmbwar Yakub, giri na ka kuthlikur ata kəra mjir Israila, giri na ana nggəlar jirkur, ka ndwaləmta shanga su na kalkal.

¹⁰ Giri akwa nci səla Sihiyona ka mamshir mji, ka hən Urushalima ka gənar ɗimikur.

¹¹ Mji ol'olər di ni akwa hara shariya kamnyar sur dzəɓ mnya, pristayeri arni akwa thlipə kamnyar dlu nta, naɓiyayeri arni akwa hara naɓikur kamnyar bara kwaba daci. Amma ba kulini da ana gaya ka MTHLAKU, ka pəla, “Su aɗi na ata wutə yeru wa, MTHLAKU akwa nca yeru.”

¹² Antə kamnyar giri, mda ata kukultə Sihiyona, ka tsa ndzi apa bəbal. Mda ata sə ndlamta Urushalima ka tsa ndzi apa həi zawar tsaptsaɓa, antə mbwar vəngkər səli ata sə ndzi mtakər kuɓər nfwa.