Mika 2 - KAKAƊU NA ƁƊAKKARKARA

Hyel Ata Ɗi Mjir Hara Bwani Aka Mji

¹ Sha ku wutə mji na ana ɗəmhə ɗimikur, mji na ana ɗəmhə ɗimikur ata vəi pəpəyir ɗa! Ma sakatə viri ku kuri da ana harata kamnyar da ka dunar harari akwa tsiya ɗa.

² Ma da ku ngguktə fakər mji, da ata dlutsari, ma da ku ngguktə kəyir mji, da ata dlutsari. Da ana nar bwani aka mji, ka dlutsə kəyir ɗa, da ana ntsari mji ka dlutsə fakayeri arɗa.

³ Kamnyar ngəni MTHLAKU pəla, “I ata ɗəmha asar ata kəra giri, natə giri aɗi ata mzhi kəɓəla kər giri wa. Giri aɗi ata jaktə mwa ka gaya kəra wa, kamnyar giri ata ləkwa bwani.

⁴ Vir nda dawayeri ar giri ata sə kumshi giri, da ata sardzi ala giri ka jikatuwa na mwavər abbər, “Sha ku wutə yeru! MTHLAKU ku kətə fakər yeru, tsa ku dlutsa akəla yeru, ka hamta aka mji na ɓəli yeru.”

⁵ Kamnyar ngəni, sakatə mda ata sə ngka ka tsəɗi ni aka mjir Hyel, ar giri, giri aɗi ata wutə nəɓwar giri akwa wa.

⁶ Mji ni akwa ngkər ali abbər, “Ga aɗiya ngkər labar ala yeru wa! Zhar ngkər gari ata kəra suayeri ngəni, sur səli aɗi na ata wutə yeru wa!”

⁷ Kalkal ka giri gari apani ya, mjir Israila? Kanaɗikur ar MTHLAKU ku kətə ya? Nənga tsa an hara su nayeri nə ri? Gariyir ni aɗi ana ndzi msəra aka mji na ana hara su kalkal wa ya?

⁸ Antə MTHLAKU hamta amsa aka mjir gəna ni abbər, “Giri ku dlər mjirna apa da dawar giri, ka fəi kariyir mji na akwa təramta ar msərakur, mji na akwa təramta kula dzama abbər da aɗi ata kəɓa ka mpa.

⁹ Giri ku kədləɓəla mwankir mjirna kazhar kəyayeri arɗa na ɓɗakɓɗaku. Giri ku fəi barkayeri natə I hamta aka maɗa' ɗa ba saka madi.

¹⁰ Thlatə kara təra, kamnyar vəi ghərəmtaghəra aɗi azi wa. Kamnyar ɗimikur ar giri an hara tə asar na ɗimi akwa wutə giri ni.

¹¹ Ma mdə na ata pwaktə giri ka ngkər ala giri thlandər abbər, ‘I ata ngkər ala giri su ata kəra yimər anap ka sur sa na ata wika’, tsa an ata ndzi mdər ngkər labar ala giri.”

¹² “Jiri, vir laga I ata tsaptə giri ata kəma duku giri na kəkar Yakub, I ata tsaptə mjir Israila na ku mbili. I ata tsaptə giri, kəi pwi giri ata kəma duku, apatə mdər ɓəla ana ngka ka təmarni akwa ciɓa. Giri ata ndzi apa bəri təma na akwa vəi ɓəla, apa mji dlama dlama tə mda ata nggatə kuraka ɗa.”

¹³ Hyel na ata ntuli ala ɗa vəi ləɓəla, an ata pwa akəma ɗa ka pwar ɗa. Da ata mburəmta nyarfur bərni ni ka ləɓəla, antə kuthlir ɗa ata pwa akəma ɗa, MTHLAKU surni an ata pwar ɗa.