Mathliyu 8 - KAKAƊU NA ƁƊAKKARKARA

Yesu Ku Mbantə Mdə Na Ka Shilkər Kəsəm Dza

¹ Sakatə Yesu ku səghəi ata gar, antə dlamar mji hang ku nutə ni.

² Antə mdə laga na ka shilkər kəsəm dza ku si adzə ni, ka zuzuri akəmari akwa pəla, “Mthlaku, ma gə hira, ga ata mzhi namtə ra kəi ndzi ndəlang.”

³ Antə Yesu ku ndərar tsiyari ka tsəkwar ni, ka pəla, “I ku hira, ndzi ndəlang!” Təkəma antə shilkər kəsəm dzari ni ku kuri adzə ni.

⁴ Antə Yesu pəla alari, “Ka gə wuta abbər ga aɗi ngkər su ngəni aka mdə wa. Amma mwari, ka gə ncantə kər nga aka prist. Tsuwa ka gə hamta saɗaka natə Musa thlamta kamnyar kəcimtadzi ni. Ka gə hara apani kamnyar ka mji sənda abbər ga ku mbantədzi.”

Yesu Ku Mbantə Buɗar Soja Na Ola Ar Rom

⁵ Sakatə Yesu ku mwari akwa Kafarnahum, antə olər soja laga ku si adzə ni, akwa kiɗə ni abbər

⁶ “Mthlaku, buɗarna apəpəi avi ka dzari mtəmtari, tsa akwa ɗar bwani ka duna.”

⁷ Antə Yesu pəla alari, “I ata si kəi mbantə ni.”

⁸ Amma soja ni pəla alari, “Mthlaku, I aɗi mzhi ka gə si aharngkəya wa. Ar ngə pəla ndər ni, antə buɗarna ata mbantədzi.

⁹ Kamnyar I ma I mdə na ka kuthlikur, ka sojayeri akwa tsi, natə ma I ku pəla aka mdə laga, ‘Mwari,’ tsa ata mwari, tsuwa ma I ku pəla aka mdə damwa, ‘Səra,’ tsa ata si. Tsuwa ma I ku pəla aka mafarna abbər, ‘Hara ngəni’, tsa ata haratari.”

¹⁰ Sakatə Yesu ku nggatə gari ngəni antə tsa ku ndatədzi, tə tsa pəla aka mji na akwa nu ni, “I akwa pəla ala giri jirkur, wala akwa nca mjir Israila I aɗi ɗar wutə jili hamta jiri ngəni wa.

¹¹ Tsuwa I akwa pəla ala giri, mji hang ata sə thlata abwar raghəi, ka abwar ramta, ka si kamnyar səm susəma ata kəma duku kəga Ibrahim, ka Ishaku, ka Yakub akwa kuthlikur na amtazi.

¹² Amma mji natə kalkal ka da an ndzi akwa kuthlikur ni, mda ata puɓəla ɗa akwa kuthlu, vəi tə mji ata tuwa ka ɓɗə thlir.”

¹³ Antə Yesu pəla aka soja na ol ni, “Mwari ja, ka tsa hara ala ga apatə ga ku hamta jiri akari ni.” Apani tsu ata saka nda antə buɗar soja ni ku mbantədzi.

Yesu Ku Mbantə Mama' Mwalar Bitrəs

¹⁴ Sakatə Yesu ku mwari aviyar Bitrəs, antə tsa wutə mama' mwalar Bitrəs apəpəi ka dzəkdzəku.

¹⁵ Antə Yesu tsəkwar tsiyari, antə dzəkdzəku ni ku kuri adzə ni. Antə mwala ni thlatə ka namta alari susəma.

¹⁶ Sakatə tahaku ku hara, antə mji səntə mji hang na ka shatanayeri aka Yesu. Antə Yesu ku kədləɓəla shatanayeri atar pəla ndər duku, ka mbantə shanga mji na nggawa nggawa.

¹⁷ Ngəni an kamnyar nghyaɓəla su tə naɓi Ishaya pəla, abbər, “Tsa ku kətə shilkayeri ar mburu, ka mbantə mburu ta nggawakurayeri.”

Mjir Pəla Abbər Da Ata Nu Yesu

¹⁸ Sakatə Yesu wutə dlamar mji hang adzə ni, antə tsa tsawa abbər ka da mwari aɓəla bwanda manda.

¹⁹ Antə maləm laga ku si ka pəla alari, “Maləm, I ata nu nga akwa kəlara vəi tə ga ata mwari akwa.”

²⁰ Antə Yesu pəla alari, “Pwaghayeri ka kur ɗa, ɗikayeri tsuwa ka mbwar ɗa, amma Ɓzər Mda aɗi ka vəi tə ka tsa pəpəi ata wa.”

²¹ Antə mdə laga akwa nca mjirthlipərni pəla alari, “Mthlaku, ndzi kəi ra harəmta baba'na katagu.”

²² Amma Yesu pəla alari, “Nu ra, zhar ka mji na mtəmta harəmta mdər ɗa na mtəmtari.”

Yesu Ku Mpa Aka Shambar Yimi

²³ Sakatə Yesu ku ləkwa shar ni, antə mjirthlipərni nutə ni.

²⁴ Antə shambar yimi na mwavər ku thlata ata manda ni, tə yimi ni baɗitə pu kərni akwa kənggərantə shar ni, har akwa bara ncighəi shar ni. Amma Yesu akwa heni.

²⁵ Antə mjirthlipərni ku mwari adzə ni ka thlentə ni akwa pəla, “Mthlaku, mbantə mburu, mburu ata sha diya!”

²⁶ Antə Yesu pəla ala ɗa, “Kamnyar mi tə giri akwa thlivər apani ri? Hamta jirər giri ku hara raka!” Antə tsa thlatə ka mpa aka shambar ni ka mpar yimi ni, antə shanga su ku pəpəi.

²⁷ Antə shanga mji ku ndatədzi akwa pəla, “Wan jili mdə ngəni ri, natə wala shambar ka manda akwa kələngkər alari ni ri!”

Yesu Ku Mbantə Mji Na Ka Shatan Akwa Dza Ɗa

²⁸ Sakatə Yesu ku ləɓəla abwanda manda akwa tsəɗi mjir Gadara, antə tsa kəɓa ka mji laga suɗa na ka shatan akwa dza ɗa, na thlata akwa vəi kula. Da sur thlivər ka duna, har tə mji aɗi ana nggitə nu laku ndagə wa.

²⁹ Antə da haptə kuraku akwa pəla, “Man akwa daɓwa mburu kəga gə ri, Ɓzər Hyel? Nənga gə si kamnyar hara ala yeru bwani təng akəmata sakari ahara ri?”

³⁰ Tsuwa akəma ɗa raka bəri laga aɗi na ola ar gaduwayeri akwa ɓəla.

³¹ Antə shatanayeri ni kiɗə kəra Yesu abbər, “Ma ga ku kədləɓəla yeru, ka gə zhar yeru bu, ka yeru mwari akwa bəri gaduwayeri ni.”

³² Antə Yesu pəla ala ɗa, “Təra giri!” Antə da səɓəla ka ra pudzi akwa kuta gaduwayeri ni. Antə shanga gaduwayeri ni ku hwi ləghəi ka ra pudzi akwa manda ni, ka mtəgəmtadzi akwa yimi ni.

³³ Antə mjir ɓəla gaduwayeri ni hwi ka ləkwa kuta di, ka jikatə shanga su na hara purəm kəga su na wutə mji na ka shatan akwa dza ɗa ni.

³⁴ Antə shanga mjir kuta di ni ləɓəla kamnyar ka da kəɓa ka Yesu. Sakatə da wutə ni, antə da kiɗə kərari abbər ka tsa təra kazhar ala ɗa tsəɗiyir ɗa.