Mathliyu 4 - KAKAƊU NA ƁƊAKKARKARA

Shatan Ku Ngkərtə Yesu

¹ Antə Mambəl ni ku mwantə Yesu akwa mtaku kamnyar ka Shatan ngkərtə ni.

² Aghəla tə Yesu ku hara asham ar vir nfwarkumari ka pci nfwarkumari, antə tsa nggatə mi.

³ Antə Shatan si ka pəla alari, “Ma ga an Ɓzər Hyel, ka gə tsawa aka pelayeri ngəni ka da ndzi buradi.”

⁴ Amma Yesu pəla alari, Mdə ku rəbuta akwa kakaɗər Hyel abbər, Aɗi ka susəma shini antə mda ata ndzi ka mpikə wa, amma tar ka shanga labar na səɓəla akwa mnya Hyel.

⁵ Antə Shatan ni mwantə ni ahar Urushalima, di na Ɓɗakkarkara, ka vətə ni ata kəra jikwara mbwar vəngkər səli aka Hyel,

⁶ ka pəla alari, “Ma ga an Ɓzər Hyel, psəghəi kər nga. Kamnyar mdə ku rəbuta abbər, “ ‘Hyel ata tsawa aka mjirthlentərni ata kəra ga. Ka tsiya ɗa antə da ata kathli nga, kamnyar ta pela asə tsa səla ga.’ ”

⁷ Antə Yesu shinau alari ka pəla, “Amma mdə ku rəbuta akwa kakaɗu tsuwa abbər, ‘Ga aɗiya ngkərtə Mthlaku na Hyel ar ngə wa!’ ”

⁸ Antə Shatan ni mwantə ni ata kəra gar na nal ka duna, ka ncanta alari shanga kuthlikurayeri ar duniya ka olkurər ɗa.

⁹ Antə Shatan ni pəla alari, “I ata hamta ala gə shanga suayeri ngəni, ma ga ata zuzuri ka vəngkər səli ali.”

¹⁰ Antə Yesu pəla alari, Təra azi, Shatan! Kamnyar mdə ku rəbuta akwa kakaɗu abbər, Ka gə vəngkər səli aka Mthlaku na Hyel ar nga, tsa duku shini antə ka gə hara mafakur alari.

¹¹ Antə Shatan ku təra kazhar Yesu, antə mjirthlentərhyel ku si ka dlar ni.

Yesu Ku Baɗitə Kəthlər Arni Akwa Tsəɗi Galili

¹² Sakatə Yesu nggata abbər mdə ku ngkəi Yahwana, antə tsa təra mwari akwa tsəɗi Galili.

¹³ Antə tsa zhar Nazareth ka ngka ahar Kafarnahum ata mnya manda, ka ndzi anda, akwa daɓwa tsəɗiyir Zebulun ka Naftali.

¹⁴ Ngəni an kamnyar ka su tə naɓi Ishaya pəla ni nghyaɓəladzi, abbər,

¹⁵ “Giri na tsəɗi Zebulun ka tsəɗi Naftali, ata lakur manda, aɓəla bwanda Jodan, Galili gə na tsəɗiyir mji gapani,

¹⁶ mji na ka ndzi akwa kuthlu, ku wutə parakəu na ola, mji na ka ndzi akwa bwar kuthlər mta, parakəu ku səɓəla ata kəra ɗa.”

¹⁷ Təng akwa saka nda antə Yesu baɗitə ngkər labar akwa pəla, “Ka giri tubi kamnyar kuthlikur na amtazi ku hara kudzəha.”

Yesu Ku Kəga Mjir Ngka Kəlfa

¹⁸ Sakatə Yesu akwa mwa ata mnya Mandar Galili, antə tsa wutə mjir ngka kəlfa suɗa, mdə ka ɓzərma'ni, Siman natə mda ana kəga ni Bitrəs ka ɓzərma'ni Andrawus. Da akwa pu banggama akwa manda kamnyar da mjir ngka kəlfa.

¹⁹ Antə Yesu pəla ala ɗa, “Nu gir ra, antə I ata namtə giri ka giri ndzi mjir sənta ali mji.”

²⁰ Təkəma antə da zhar banggamar ɗa ka nutə ni.

²¹ Sakatə tsa ɗar ləkəma raka antə tsa wutə mji suɗa mdə ka ɓzərma'ni, watau Yakub ka Yahwana na maɗa' Zabadi, akwa nam banggamar ɗa. Antə Yesu ku kəga ɗa.

²² Təkəma antə da zhar shar ni, ka baba' ɗa, ka nutə ni.

Yesu Ku Dlar Mji Zumzum Hang

²³ Yesu ku dlarhə shanga tsəɗi Galili, akwa thlipa akwa mbwayeri ar tsaptədzi, ka ngkər labar na msəra ata kəra kuthlikur ar Hyel, ka kuri shanga jili shilkayeri ka nggawakurayeri tə mji kəgari.

²⁴ Antə thləmari ku tuwa akwa shanga tsəɗi Siriya. Antə mji ku sənta alari shanga mji na nggawa nggawa, mji na akwa ɗar bwani ka shilkayeri na zumzum, ka mji natə dza ɗa akwa kətə ɗa, ka mji na ka mambəlayeri na ɗimi ɗimi, ka mji na ka shilkər cicukila, ka mji na ka dza ɗa mtəmtari, antə tsa ku mbantə ɗa shang.

²⁵ Antə dlamar mji hang ku nu ni, mji na thlata ahar Galili, ka Dikapolis, ka Urushalima, ka tsəɗi Yahudiya, har kəga na aɓəla bwanda Thlyagha Jodan.