Mathliyu 28 - KAKAƊU NA ƁƊAKKARKARA

Yesu Ku Thlata Akwa Mtəmta

¹ Sakatə Vir Ghərəmtaghəra ku təramta, ɗəɗəpə mbing vir Laduwa, antə Maryamu Magdalin ka Maryamu na dukwari, ku mwari adzə kul ni ka da wulha.

² Təkəma antə di ku kənggərantədzi, kamnyar tə mdərthlentərhyel ar Mthlaku ku thlata amtazi ka səghəi, ka takələmta pela na ata mnya kul ni, ka ndzəndzi ata kər.

³ Tsa akwa mbəlmbəla apa wurka, ka ləptərni mwapu shalaku apa mpur puwa.

⁴ Sakatə mjir gadi ni wutə ni, antə da thlivər ka duna ka pumtadzi ata di apa mji na mtəmtari.

⁵ Antə mdərthlentərhyel ni pəla aka mwanki ni, “Giri aɗiya thlivər wa, kamnyar I ku sənda abbər giri akwa bara Yesu tə mdə kukwamta ni.

⁶ Tsa aɗi azi wa. Kamnyar tsa ku thlata, tsu apatə tsa ku pəla. Asər giri, ka giri wutə vəi tə mdə peri ni akwa.

⁷ Mwa giri taktar, ka giri ra pəla aka mjirthlipərni abbər, tsa ku thlata akwa mtəmta. Nggədza tsuwa tsa ata mwari ahar Galili kəmata giri. Anda antə giri ata wutə ni! An su tə I sə pəlari ala giri.”

⁸ Təkəma antə da zhar kul ni ka thlivəra, nghyinghyari ka kucali, ka hwi ra pəla aka mjirthlipərni.

⁹ Təng təkəma Yesu ku kəɓa ka da, ka pəla ala ɗa, “Usama giri!” Antə da si adzə ni kudzəha, ka fəfahə səlari, ka vəngkər səli alari.

¹⁰ Antə Yesu pəla ala ɗa, “Giri aɗiya thlivər wa, mwar giri ka giri pəla aka maɗama'na ka da mwari ahar Galili, anda antə da ata wutə ra.”

Su Tə Mjir Sək Kəra Kul Ni Pəla

¹¹ Sakatə mwanki ni ləkwa təra, antə bwadukwa mjir sək kəra kul ni mwari akwa kuta di, ka pəla aka pristayeri na ol'ola shanga su na ku hara.

¹² Antə pristayeri na ol'ola kəga mji na ol'ola ku tsaptədzi ka ɗəmha abbər, da ata hamta kwaba hang aka sojayeri ni,

¹³ ka pəla ala ɗa, “Pəla giri aka mji abbər, ‘Mjir thlipərni an si aviri ka həltə ni sakatə yeru akwa heni.’

¹⁴ Antə ma su ni ku ləkwa thləma gwamna, yeru ata ngkərɓəla alari, antə giri aɗi ata ləkwa bwani wa.”

¹⁵ Antə mjir gadi ni ku dlu kwaba ni, ka hara tsu apatə mdə pəla ala ɗa ka da hara. Apani antə labar ngəni ku titiləmtadzi akwa nca mjir Yahudi har ba ashina.

Kəthlər Tə Yesu Hamta Aka Mjirthlipərni

¹⁶ Antə mjirthlipərni na kumkantang ni ku təra mwari akwa Galili, adzə gar tə Yesu pəla ala ɗa ka da mwari ni.

¹⁷ Sakatə da ku wutə ni, antə da vəngkər səli alari, amma mji laga akwa nca ɗa aɗi mbərsa abbər tsa wa.

¹⁸ Antə Yesu shahədzi kudzəha, ka pəla, “Mdə ku hamta ali shanga kuthlikur na amtazi ka na akwa duniya.

¹⁹ Antə mwar giri, ka giri namtə shanga mjir duniya ka da ndzi mjir nu ra, ka giri hara baptizma ala ɗa akwa thləma Tədda, ka ar Ɓzər, ka ar Mambəl na Ɓɗakkarkara.

²⁰ Ka giri thlipa ala ɗa ka da ɓəlatə shanga suayeri tə I tsawa ala giri ni. Tsuwa ka giri sənda abbər I ata vəi duku kəga giri tədəku, har kurər duniya.”