Mathliyu 23 - KAKAƊU NA ƁƊAKKARKARA

Yesu Ku Pəlangkər Aka Mji Na Ol'olər Addini

¹ Antə Yesu ku gari aka dlamar mji, ka aka mjirthlipərni, abbər,

² “Maləmayeri ar thlipə tsawur Musa, ka mjir Farisi, an mji tə mdə hamta ala ɗa izniyir thlipə tsawur Musa.

³ Antə ka giri hara shanga su tə da pəla ala giri, ka giri ɓəlata, amma giri aɗiya nu surharar ɗa wa. Kamnyar da ana pəla su, amma da aɗi ana hara wa.

⁴ Da ana mbwatə kəlayeri na kəgəɓu tə mda amzhi kətari wa ka pungkər aka mji, amma arɗa, da aɗi ana dlara akwa haptari wala ka kulenga ɗa wa.

⁵ Shang su tə da ana hara ni, da ana hara kamnyar ka mji wutə ɗa. Da ana namtə su laga bau ka lifo apa saka na ola ka vərasayeri ata, ka mbwata ata murkəma ɗa, ka namtə bugzərayeri na saɓəl saɓəl ata mnya ləptər ɗa!”

⁶ “Da hir ndzəndzi ata vəi ndzəndzi na ka daraja akwa shanga vəi səm susəma, ka shanga vəi ndzəndzi na ɓɗakɓɗaku akwa mbwayeri ar vəngkər səli.

⁷ Tsuwa da hir ka mji thlawar ɗa akwa kasukayeri, ka tsuwa ka mdə kəga ɗa, ‘Maləm.’

⁸ Amma ar giri, giri aɗiya hir ka mdə kəga giri maləm wa, kamnyar giri ka maləm duku, tsuwa shanga giri an mji kəga maɗama' ɗa.

⁹ Tsuwa giri aɗiya kəga mda akwa duniya abbər ‘Tədda’ wa, kamnyar giri ka Tədda duku daci amtazi.

¹⁰ Tsuwa mda aɗiya kəga giri abbər Mthlaku wa, kamnyar giri ka Mthlaku duku daci, natə tsa an Kristi.

¹¹ Mdə na olta shang akwa nca giri, ka tsa an ndzi buɗar giri na ata hara kəthlər ala giri.

¹² Kamnyar kəlara mdə na ku haptə kərari abbər tsa an ola, mda ata tərghəi ni. Tsuwa kəlara mdə na ku tərghəi kərari, mda ata haptə ni.”

Yesu Ku Mpa Aka Maləmayeri Ka Mjir Farisi

¹³ “Amma sha ku wutə giri, giri na maləmər thlipə tsawur Musa, ka mjir Farisi! Giri shimnya, kamnyar giri ku hartə nyarmbwar ləkwa kuthlikur na amtazi aka mji! Kamnyar giri ka kəra giri aɗi ata ləkwari wa, tsuwa giri aɗi psi laku aka mjir bara ləkwari ka da ləkwa wa.

¹⁵ “Sha ku wutə giri, giri na maləmər thlipə tsawur Musa, ka mjir Farisi! Giri shimnya, kamnyar giri ana ntamta manda na ola, ka mwari akwa tsəɗiyayeri na ciju, kamnyar bara mdə duku na ata tubi. Aghəla tə tsa ku tubi, giri ana jaktə namtə ni ka tsa təramta giri akwa ɗimikur har ka bwa suɗa.

¹⁶ “Sha ku wutə giri, giri na mdlyang na ana nca laku! Giri ana pəla, ‘Mdə na ku kahyel ka mbwar vəngkər səli, aɗi suma wa, amma kəlara mdə na ku kahyel ka dinar ar mbwar vəngkər səli, to kahyel ni ata kəthlərərni.’

¹⁷ Giri an mdlyang na caku caku! Kamnyar madi akwa nca ɗa an olari ri, dinar ni nənga mbwar vəngkər səli na namtə dinar tə tsa ndzi ɓɗakkarkara nə ri?

¹⁸ Tsuwa giri ana pəla, ‘Kəlara mdə na ku kahyel ka bagaɗi, aɗi ata ndzi sur damitədzi wa. Amma kəlara mdə na ku kahyel ka sur hamta na ata kəra bagaɗi ni, to kahyel ni ata hara kəthlərərni.’

¹⁹ Giri mdlyang kadzang! Nənga madi akwa nca ɗa an olari ri, sur hamta ni nənga bagaɗi na namtə sur hamta ka tsa ndzi ɓɗakkarkara nə ri?

²⁰ Kamnyar mdə na ku kahyel ka bagaɗi, ku kahyel ka tsa, ka tsuwa shanga su na ata kəra kərari ni.

²¹ Tsuwa kəlara mdə na ku kahyel ka mbwar vəngkər səli, tsa ku kahyel ka mbwar vəngkər səli ni, shang kəga Hyel ni, kəga mji na andzəndzi akwa kutambwa ni.

²² Tsuwa mdə na ku kahyel ka vəi na amtazi, tsa ku kahyel ka dəkəl kuthlikur ar Hyel, ka tsuwa tsa na andzəndzi ata dəkəl kuthlikur ni.

²³ “Sha ku wutə giri, giri na maləmər thlipə tsawur Musa, ka mjir Farisi! Giri shimnya, kamnyar giri ana hamta zaka ar shanga kari yaji, apa mint, ka dill, ka kumin, amma giri ana nggəlar hara suayeri na olta shang akwa tsawu ni, apa jirkur, kətadzə mda, ka ndzi ka jirkur akwa shanga su. Nayeri ni an su tə kalkal ka giri hara ntangkəma, wala tə aɗi abbər ka giri zhar hara suayeri ndagə wa.

²⁴ Giri an mdlyang na ana nca laku! Giri ana dlərɓəla yimər giri ta kəlara wirɗing, amma giri ana ndasəmnya dləkəmau!

²⁵ “Sha ku wutə giri, giri na maləmər thlipə tsawur Musa, ka mjir Farisi! Giri shimnya, kamnyar giri ana kəcimta bwahila kwapə ka tasa ɗəva, amma kuta ɗa nghyinghyari ka ɗimikur sur zamba ka mbulamkur.

²⁶ Giri na mjir Farisi, giri mdlyang ka duna! Kəcimta giri kuta kwapə ni ka tasa ɗəvə ni katagu, kamnyar ka bwahila ɗa ndzi kəcəkəcari tsuwa.

²⁷ “Sha ku wutə giri, giri na maləmər thlipə tsawur Musa, ka mjir Farisi! Giri shimnya, kamnyar giri ndzi apa kulayeri tə mdə fəi dza ɗa mwapmwapu, natə bwa na aɓəlaɓəla tə mda ata wutari an ɓɗaku, amma kutari an nghyinghyari ka ɗethlayeri ar mji na mtəmta, ka shanga diɗayeri.

²⁸ “Antə an laku tə giri akwa. Aɓəlaɓəla, mji ana wuta apa giri mji na pwa, amma avivi, ɗəffa giri an nghyinghyari ka shimnyakur kəga ɗimikur.”

Yesu Ku Pəla Bwani Na Ata Sə Wutə Ɗa

²⁹ “Sha ku wutə giri, giri na maləmər thlipə tsawur Musa, ka mjir Farisi! Giri shimnya, kamnyar giri ana namtə kulər naɓiyayeri ɓɗakɓɗaku, ka dəɓatə kulər mji na pwa.

³⁰ Giri ana pəla, ‘Wala ma mburu an aɗi akwa zamanər kəkayeri ar mburu, ar mburu, mburu aɗi ata hadzə tsi ala ɗa akwa tsəgəi naɓiyayeri ni wa.’

³¹ Apani giri ku ndzi seɗar kəra giri, abbər giri an kəkar mji na tsəgəi naɓiyayeri!

³² Antə kuri giri nghyaɓəla ɗimikur tə kəkayeri ar giri baɗitə ni!

³³ Giri an pwapwayeri, giri an maɗa' pwapwayeri dlama dlama! Apa madi tə giri ata mzhi msərəmta ləkwa kəyir u'u ri?

³⁴ Apani I akwa thlenta ala giri naɓiyayeri, ka mji na ɗəɗu, ka maləmayeri ar thlipə tsawur Musa. Giri ata kukwamta mji laga akwa nca ɗa ka giri tsəgəi ɗa, ka giri dlaɓu mji laga akwa mbwar vəngkər səli, ka hara ala ɗa bwani ata di ata di.

³⁵ Antə apani giri ata sə ɗar bwani kamnyar shanga mamshir mji na kula biku tə mdə pumta akwa duniya ni, baɗitə ka mamshir Habila na kula biku, har ka vədza aka Zakariya na ɓzər Berekiya, natə giri tsi ni akwa daɓwa Vəi na Ɓɗakkarkara ka bagaɗi ar hamta saɗaka ni.

³⁶ I akwa pəla ala giri jirkur, shanga suayeri ngəni ata sə si ata kəra mjir zaman ngəni!”

Yesu Ku Hir Urushalima

³⁷ “Aiyi Urushalima, Urushalima! Mjir nga ku tsəgəi naɓiyayeri, ka ndzəndzəhtə mji tə Hyel thlentə ala giri! Ka yiɗau, antə I bara kəi tsaptə maɗa' nga apatə anggira mtəka ana tsaptə maɗa'ni akira ɓəɓəkari, amma giri aɗi hir wa ri!

³⁸ Nggədza ja kulini mdə ku zhar ala giri mbwar Hyelər giri kula mda akwa.

³⁹ Kamnyar I akwa pəla ala giri, giri aɗi ata jaktə wutə ra kəra wa tar ma sakatə giri ku pəla, ‘Tsa ka barka mdə na ata si akwa thləma Mthlaku.’ ”