Mathliyu 21 - KAKAƊU NA ƁƊAKKARKARA

Yesu Ku Ləkwa Urushalima

¹ Sakatə Yesu ka mjirthlipərni ku hara kudzəhə ka Urushalima, ka si ahar Bethfaji adzə Gar Zaitun, antə Yesu thlentə suɗa akwa nca mjirthlipərni,

² ka pəla ala ɗa, “Mwar giri, akwa di na akəma giri ni, təkəma giri ata wutə kwara laga mbwimbwiyari ka ɓzərni adzə ni. Mpəli giri ɗa ka giri səntə ɗa ali.

³ Kəlara mdə na ku ndəra ala giri, ka giri pəla alari, ‘Mthlaku an akwa bara ɗa’, antə tsa ata zhar ɗa ka giri təra ka da.”

⁴ Su ngəni hara ni an kamnyar ka su tə naɓi pəla ka tsa nghyaɓəladzi abbər,

⁵ “Pəla giri aka mjir Sihiyona, ‘Nggədza kuthlir giri akwa si adzə giri! Tsa an mdə na ka kanaɗi, tsa akwa si ata kwara, ata ɓzər kwara antə tsa akwa si ni.’ ”

⁶ Antə mjirthlipərni ku mwari ka hara tsu apatə Yesu pəla ala ɗa ka da hara.

⁷ Da səntə kwara ni ka ɓzərari ni, ka putə ləptayeri arɗa ata hila ɗa, antə Yesu fəltə kwara ni ka ndzəndzi ata kər.

⁸ Antə bwar ola mji ni pshari ləptayeri arɗa akwa laku, antə bwadukwa mji nthləgəi tsiya nfwayeri ka pwi akwa laku.

⁹ Antə dlamar mji na akwa mwa akəmari ka na aghəlari haptə kuraka ɗa akwa pəla, “Hu gir Ɓzər Dauda! Ka Hyel vədzə barka aka mdə na akwa si akwa thləma Mthlaku! Hu gir Hyel na akwa vəi na amta ta shang!”

¹⁰ Sakatə Yesu ku ləvəi akwa Urushalima, antə shanga mjir kuta di ni ndatədzi, tə mji ləkwa yu su abbər, “Wa ngəni ri?”

¹¹ Antə mji na akwa nu Yesu ni pəla, “Ai ngəni an naɓi Yesu na thlata ahar Nazareth akwa tsəɗi Galili ni.”

Yesu Ku Ləkwa Mbwar Hyel

¹² Antə Yesu ku ləkwa mbwar vəngkər səli ka kədləɓəla shanga mji na akwa ɗəl su, kəga mji na akwa masə su akwa mbwar vəngkər səli ni. Tsa shinamta tebərayeri ar mjir canji kwaba, kəga vəi ndzəndziyir mjir ɗəl kataparayeri.

¹³ Tsa pəla ala ɗa, “Mdə ku rəbuta abbər, “ ‘Mda ata kəga mbwarna abbər mbwar adduwa,’ amma giri ku namtə ni vəi ɗuwar mjir thla laku.”

¹⁴ Antə mji na mdlyang kəga mji na nggurdəkəi ku si adzə ni akwa mbwar vəngkər səli ni, antə tsa ku mbantə ɗa.

¹⁵ Amma sakatə pristayeri na ol'ola, kəga maləmayeri ar thlipə tsawur Musa, wutə surndatayeri tə tsa hara ni, har ka maɗankyar akwa hara kuraku akwa mbwar vəngkər səli, akwa pəla, “Hu gir Ɓzər Dauda,” antə ɗəffa ɗa ɓza.

¹⁶ Antə da pəla aka Yesu, “Ga akwa nggatə su tə mji ngəni akwa pəla ri nggye?” Antə Yesu pəla ala ɗa, “I. Giri aɗi ɗar karatari wa ya abbər, “ ‘Akwa mnya maɗankyar ka maɗankyar na ata uwa, antə ga ku ɗəmha aka kər nga abbər ka huwa səɓəla.’ ”

¹⁷ Antə tsa ku təra kazhar ɗa, ka ləɓəla akwa bərni ni, ka mwari ahar Bethlani, ka pi anda.

Yesu Ku Shiwumta Nfur Kamnda Laga

¹⁸ Səɓəla ɗəpari ɗəɗəpa, sakatə Yesu akwa ngka akwa Urushalima, təng tsa nggatə mi akwa kətə ni.

¹⁹ Sakatə tsa wutə nfur kamndə laga ata mnya laku, antə tsa mwari adzə nfu ni, amma tsa aɗi wutə ya ata wa, təng thlali daci. Antə tsa pəla aka nfu ni, “Ga aɗiya ata jaktə ya akəmazi kəra wa!” Təkəma antə nfu ni ku uli.

²⁰ Sakatə mjirthlipərni wuta apani antə da ndatədzi, ka pəla, “Apa madi tə nfur kamndə ni ul kasha nə ri?”

²¹ Antə Yesu shinau ala ɗa ka pəla, “I akwa pəla ala giri jirkur, abbər ma giri ka hamta jiri, ka ndzi ka kula nuhum, giri ata mzhi hara su na təramta su tə I hara aka nfur kamndə ni. Kamnyar giri ata pəla aka gar ngəni abbər, ‘Thlata, ka gə ra pwa akwa manda,’ ka suari hara.

²² Ma giri ka hamta jiri, kəlara su tə giri ku kiɗa akwa adduwa, giri ata wutari.”

Mji Ku Ndatədzi Ata Kəra Dunar Yesu

²³ Sakatə Yesu ku jaktə ngka akwa kuta bəbal ar mbwar vəngkər səli, akwa thlipa aka mji, antə pristayeri na ol'ola kəga mji na ol'ola ata kəra mji, ku si adzə ni, ka yu ni abbər, “Ka duna madi antə ga akwa hara suayeri ngəni ri? Tsuwa wan na gə izniyir hara su ngəni ri?”

²⁴ Antə Yesu shinau ka pəla, “I ma I ata yu giri su pal. Antə ma giri ku ni amsari, I ata pəla ala giri mdə na ni dunar hara suayeri ngəni ni.

²⁵ Ama antə Yahwana wutə dunar hara baptizma nə ri? Akəla Hyel nənga akəla mda ri?” Antə da kamtadzi ka ɗar wul su ata kər akwa daɓwa ɗa, akwa pəla, “Ma mburu pəla, ‘Thlata akəla Hyel,’ tsa ata pəla, ‘To, kamnyar mi tə giri aɗi hamta jiri alari wa ri?’

²⁶ Tsuwa ma mburu pəla, ‘Thlata akəla mda,’ Mburu akwa thlivər dlamar mji ngəni. Kamnyar shanga mji ku hamta jiri abbər Yahwana ni naɓi.”

²⁷ Antə da pəla aka Yesu abbər, “Yeru asəndə wa.” Antə Yesu pəla ala ɗa, “I ma I aɗi ata pəla ala giri vəi tə I wutə dunar hara suayeri ngəni ni akwa wa.

Karapu Ata Kəra Mdə Laga Ka Maɗa'ni Suɗa

²⁸ “Man su tə giri ata pəlari ata kəra su ngəni ri? Mdə laga aɗi ka maɗashilərni suɗa, antə tsa ku mwari adzə mdə na olari, ka pəla alari, ‘Ɓzərna, mwari ka gə ra hara kəthlər akwa fakər anap ashina.’

²⁹ Antə tsa pəla, ‘I aɗi ata mwari wa.’ Amma aghəla nda tsa ku sə pali dzamərni ka mwari.

³⁰ Antə baba' ɗa ni mwari adzə ɓzər na suɗkurari tsuwa, ka pəla alari tsu apani. Antə ɓzər ni pəla, ‘I ata mwari, zanuwa.’ Amma aghəla nda tsa aɗi sə mwari wa.

³¹ Na madi akwa nca ɗa suɗə ni an ku hara su tə baba'ni akwa barari ri?” Antə da pəla, “Tsu ɓzər na ntangkəma ni.” Antə Yesu pəla ala ɗa, “I akwa pəla ala giri jirkur, mjir dlu tsəma kəga karwayeri ata sə ləkwa kuthlikurər Hyel kəmata giri.

³² Kamnyar Yahwana na Mdər hara Baptizma ku si ka ncanta ala giri lakur jirkur, giri aɗi hamta jiri alari wa. Amma mjir dlu tsəma kəga karwayeri ku hamta jiri alari. Amma wala tə giri wutə su ngəni akwa harari ni, giri aɗi tubi ka hamta jiri alari wa.”

Karapu Ata Kəra Mjir Tsuhwa Na Dlu Hayar Faku

³³ “Nggədza giri karapu damwa. Waci mthlakər fakə laga aɗi na ku ncimta nfur anap akwa fakərni, ka kalaktə fakə ni ka kadaka, ka namtə vəi ntsarɓəla yimər anap ni akwa, ka latə mbwar səka.” “Antə tsa hamta fakə ni aka mjir hayari, ka təra mwari akwa tsəɗi damwa.

³⁴ Sakatə anap ni ku hara, antə tsa thlentə mafayeri arni aka mjir haya fakə ni, ka da dlu alari bwarni ar yar nfu ni.

³⁵ Amma mjir haya fakə ni ku ngkəgəi mafayeri ni, ka dlaɓu na palari, ka tsi palari, ka ndzəndzəhtə na palari ni ka pela.

³⁶ Antə mdə ni jaktə thlentə mafayeri damwa hangta na ntangkəma ni, amma mjir haya fakə ni ku hara ala ɗa tsu apatə da hara aka mdə na ntangkəma nda.

³⁷ Aghəla nda antə tsa thlenta ala ɗa ɓzərni, ka pəla, ‘I ka hamta jiri abbər da ata wutə səliyir ɓzərna.’

³⁸ Amma sakatə mjir haya fakə ni wutə ɓzərni ni, antə da pəla aka nvwa ɗa, ‘Yauwa! Nggədza mdə na ata sə fa kifər fakə ni ja! Asər giri ka mburu tsi ni, ka mburu dlutsə kifərni ni!’

³⁹ Antə da kətə ni, ka ndzəhəɓəla ni kazhar fakə ni, ka tsi ni.”

⁴⁰ “To, ma sakatə mthlakər fakə ni ku si, giri tamatə man tə tsa ata harari aka mjir haya fakə nə ri?”

⁴¹ Antə da pəla alari, “Ai, tsa ata tsəgəi kəmanggarayeri ni akwa laku na ata kətadzə mda, ka hamta hayar fakə ni aka mji damwa na ata sə na alari yar nfwayeri ni akwa sakari.”

⁴² Antə Yesu pəla ala ɗa, “Giri aɗi ɗar karatə su tə mdə rəbuta akwa kakaɗər Hyel wa ya? “ ‘Pela natə mjir hən mbwa ku nggəlari, an sə ndzi pelar həna na ɓɗakta shang. Ngəni an harar Mthlaku, tsa surndata natə mda abara ka wula!’ ”

⁴³ “Kamnyar ngəni antə I akwa pəla ala giri abbər mda ata sə dlutsə kuthlikurər Hyel akəla giri, ka hamta aka mji na ata sə hara su tə tsa ata barari.”

⁴⁵ Sakatə Pristayeri na ol'ola kəga mjir Farisi ku nggatə karapu ngəni, antə da nggaɓəla abbər Yesu akwa gari ni ata kəra ɗa.

⁴⁶ Antə da ku bara lakur ngkəi ni, amma da akwa thlivər dlamar mji, kamnyar da ku hamta jiri abbər Yesu ni naɓi.