Mathliyu 16 - KAKAƊU NA ƁƊAKKARKARA

Mji Ku Bara Seɗa Akəla Yesu

¹ Antə mjir Farisi ka mjir Saddukiya laga ku si adzə Yesu ka da ngkərtə ni. Antə da kiɗə ni abbər ka tsa ncanta ala ɗa seɗa laga akwar amtazi na ata ndatə mda.

² Amma tsa pəla ala ɗa, “Ma sakatə pci akwa təri, tə giri ku wutə vəi na amtazi ni hara mamza, giri ana pəla, ‘Yauwa, viri ata kur lapiya ɗəpa.’

³ Tsuwa ɗəɗəpa ma giri ku wutə kutahyel mamza ka zhimaru, giri ana pəla, ‘Yimi ata hara ashina.’ Giri ana səndə lakur ngkərɓəla su na ata sə hara atar wul kutahyel, amma giri amzhi ngkərɓəla seɗar zamanayeri wa.

⁴ Mjir zaman ngəni an mji na ɗimi ka kula jirkur. Da akwa bara seɗa, amma mda aɗi ata hamta ala ɗa seɗa wa, tar seɗar Jona.” Antə tsa ku zhar ɗa ka təra.

Sur Thlipər Mjir Farisi Ka Mjir Saddukiya

⁵ Sakatə mjirthlipərni ku ləɓəla aɓəla bwanda manda ni, antə da wuta abbər da ku fwari ta kətə buradi.

⁶ Antə Yesu pəla ala ɗa, “Ka giri hara hangkal, ka giri ngga ngga yistər mjir Farisi ka mjir Saddukiya ni.”

⁷ Antə da gari akwa daɓwa ɗa abbər, “Kamnyar tə mburu aɗi səntə buradi wa ni ya.”

⁸ Amma Yesu ku səndə su tə da akwa pəlari, antə tsa pəla, “Ai mji kula hamta jiri! Kamnyar mi tə giri akwa gari akwa daɓwa giri abbər giri aɗi ka buradi wa ri?

⁹ Ba sakani giri aɗi nggaɓəla wa ya? Giri amzhi ɗangtə laku tə I ndlantə mji dəpu ntəfu ka kər buradi ntəfu daci ni wa ya? Tsuwa thlambəl yiɗau antə giri nghyantə ka na ɓushirəmtadzi nə ri?

¹⁰ Wala tsuwa sakatə I ndlantə mji dəpu nfwar ka kər buradi murfə ni, thlambəl yiɗau antə giri nghyantə ka na ɓushirəmtadzi nə ri?

¹¹ Kamnyar mi tə giri amzhi nggaɓəla abbər I aɗi akwa gari ala giri ata kəra buradi wa nə ri? I pəla ka giri hara hangkal ka yistər mjir Farisi ka mjir Saddukiya.”

¹² Sakanda antə mjirthlipərni nggaɓəla abbər tsa aɗi akwa tsaktə ɗa ata kəra yist tə mda ana pu akwa buradi wa, amma tsa akwa tsaktə ɗa ata kəra surthlipər mjir Farisi ka mjir Saddukiya.

Su Tə Bitrəs Pəla Ata Kəra Yesu

¹³ Sakatə Yesu ku si akwa tsəɗi Kaisariya Fəlippi, antə tsa yu mjirthlipərni abbər, “Mji ana pəla abbər Wa an Ɓzər Mdə nə ri?”

¹⁴ Antə da pəla, “Mji laga ana pəla abbər ga an Yahwana na mdər hara Baptizma, mji laga ana pəla Iliya, mji laga tsuwa ana pəla Irmiya, wala pal akwa nca naɓiyayeri ni.”

¹⁵ Antə tsa pəla ala ɗa, “Amma ar giri, giri ana pəla I an wa ri?”

¹⁶ Antə Siman Bitrəs shinau ka pəla, “Ga an Kristi, Ɓzər Hyel na ka mpika.”

¹⁷ Antə Yesu shinau alari ka pəla, “Gə ka barka, Siman ɓzər Yahwana! Kamnyar aɗi mda an ngkər ala gə su ngəni wa, amma Təddarna na amtazi.

¹⁸ Tsuwa I akwa pəla ala ga, ga an Bitrəs, tsuwa ata pela ngəni antə I ata nci ikələziyarna, natə mta amzhi nggyariyari wa.

¹⁹ Tsuwa I ata hamta ala gə tsəkuramayeri ar kuthlikur na amtazi.” “Antə kəlara su tə ga ku mbwi akwa duniya ni, ata ndzi mbwimbwiyari amtazi, tsuwa kəlara su tə ga ku mpəli akwa duniya, ata ndzi mpəlimpəliyari amtazi.”

²⁰ Antə Yesu tsaktə mjirthlipərni ka duna abbər da aɗiya pəla aka wama abbər tsa an Kristi wa.

Yesu Ku Ngkər Su Ata Kəra Mtərni

²¹ Təng akwa saka nda antə Yesu baɗitə ncanta aka mjirthlipərni abbər, dwali ka tsa mwari ahar Urushalima, ka tsa ɗar bwaniyir suayeri zumzum hang akwa tsiya mji na ol'ola, kəga pristayeri na ol'ola ka maləmayeri ar thlipə tsawur Musa, har ka mdə tsi ni, ka tsa thlata akwa vir na makərkur.

²² Antə Bitrəs ndəkərəmta ni ata tenga ka baɗitə mpa alari akwa pəla, “Ka Hyel ngkata, Mthlaku! Su ngəni aɗi ata wutə ngə hun wa.”

²³ Amma Yesu shinardzi ka pəla alari, “Tərardzi kazhar ra, Shatan ragai! Ga an sur tsamta səl ali. Kamnyar ga akwa dzama apa mda, ga aɗi akwa dzama apa Hyel wa.”

²⁴ Sakanda antə Yesu pəla aka mjirthlipərni, “Kəlara mdə na ata bara nu ra, tar ka tsa nggəlar kərni, ka tsa kətə udzəm kadləkadla arni, ka tsa nu ra.

²⁵ Kamnyar kəlara mdə na ata bara mbantə mpikari, mpikari ata sha. Amma kəlara mdə na ata hir shamta mpikari kamnyar na, tsa ata wutə mpika.

²⁶ Kamnyar man ampaniyari ri, ma mda ata ndzi mthlakər shanga duniya ni, amma tsa ata ni ka mpikari? Wala tsuwa man tə mda ata mzhi paltari ka mpikari ri?

²⁷ Kamnyar Ɓzər Mda ata sə si ka mjirthlentərhyel akwa darajar Təddarni, ka tsa ntəmta aka waskəi kalkal ka su tə tsa hara.

²⁸ I akwa pəla ala giri jirkur, mji laga aɗi athləthlata azi na aɗi ata mtə kambəla da wutə Ɓzər Mda akwa si akwa kuthlikurərni wa.”