Mathliyu 14 - KAKAƊU NA ƁƊAKKARKARA

Mtər Yahwana Mdər Hara Baptizma

¹ Akwa saka nda antə Kuthli Hirudus nggatə labar ata kəra Yesu.

² Antə tsa pəla aka buɗayeri arni abbər, “Ngəni ata ndzi Yahwana na Mdər hara Baptizma, tsa thlata akwa mtəmta, an su na hara tə tsa ka dunar hara surndatayeri ngəni ni.”

³ Kamnyar sakanda Hirudus ku kurtə ngkəi Yahwana ka hambwa ni akwa pərsəna, kamnyar Hirudiya, na mwalar ɓzərma'ni Filibus.

⁴ Kamnyar akwa saka na təramta, Yahwana na Mdər hara Baptizma ku pəla aka Hirudus abbər, “Aɗi kalkal ka gə kəl Hirudiya wa.”

⁵ Wala tə Hirudus akwa bara tsi Yahwana, tsa akwa thlivər mji, kamnyar tə da ana kətə Yahwana abbər tsa naɓi.

⁶ Sakatə vir tə mdə yaɓəla Hirudus ku hara, antə ngkwar Hirudiya ɓathla akəma mətəpiyayeri. Tsuwa ɓathlə ni ku ndzi msəra aka Hirudus

⁷ har tə Hirudus hara alkawal ka kahyel abbər tsa ata na aka ngkwar Hirudiya ni kəlara su tə tsa kiɗa akəlari.

⁸ Antə mama'ni pəla alari su tə ka tsa yuwa, antə ngkwa ni pəla, “Na ali kəra Yahwana na Mdər hara Baptizma ni azi kulini ata paranti!”

⁹ Antə ɗəffa kuthli ni ku ɓzi, amma kamnyar kahyel tə tsa hara, ka darajar mətəpiyayeri arni, antə tsa tsawa abbər ka mdə hamta alari kəra Yahwana.

¹⁰ Apani antə tsa thlentə ka mdə ra nthləi kəra Yahwana akwa pərsəna ni.

¹¹ Antə mdə ku səntə kəra Yahwana ni ata paranti ka hamta aka ngkwa ni, antə tsa mwanta aka mama'ni.

¹² Antə mjirthlipər Yahwana ku si ka kətə mshiyirni, ka harəmta. Antə da mwari ka pəla aka Yesu.

Yesu Ku Ndlantə Mji Dəpu Ntəfu

¹³ Sakatə Yesu ku nggatə ngəni, antə tsa thlatə ka ləkwa shar ka təra kazhar vəi nda, ka mwari akwa vəi laga na ciju kula mda. Amma sakatə dlamar mji ku nggatə vəi tə tsa ata, antə da thlata akwa kauyayeri zumzum ka nu ni ka səl.

¹⁴ Sakatə Yesu səɓəla kazhar shar ni ka wutə dlamar mji hang, antə tsa kətadzə ɗa, ka mbantə mjir ɗa na nggawa nggawa.

¹⁵ Sakatə tahaku ku hara, antə mjirthlipərni si adzə ni, ka pəla alari, “Vəi ngəni ku hara ciju ta kuta di. Nggədza tsuwa pci abaka təri. Antə kuji gə salamtə dlamar mji ni ka da mwari akwa kauyayeri kamnyar mastə susəma aka kərɗa.”

¹⁶ Amma Yesu pəla, “Aɗi dwali ka da təra wa, na giri ala ɗa su tə ka da səm bu.”

¹⁷ Antə da pəla alari, “Su natə yeru kəgari an kər buradi ntəfu ka kəlfa suɗa daci.”

¹⁸ Antə Yesu pəla, “Səntə giri ali azi.”

¹⁹ Antə tsa ku tsawa aka dlamar mji ka da ndzəndzi ata kusar. Antə tsa kətə kər buradi na ntəfu ka kəlfa suɗə ni, ka haptə ncari amta, ka usar Hyel, ka ɓəgəlwa buradi ni, ka hamta aka mjirthlipərni, ka da ndəkəmta aka mji.

²⁰ Antə shanga ɗa ku səma ka ndli. Antə da tsaptə na ɓushirəmtadzi ata di, har ka nghyantə thlambəl kumnya suɗə kəgari.

²¹ Tsuwa hangkur mji na səm ni ku mwantə apa mji shili dəpu ntəfu, mda aɗi jikau mwanki ka maɗankyar wa.

Yesu Ku Mwa Ata Kəra Yimi

²² Da akwa kuriyari təkəma, antə Yesu tsawa aka mjirthlipərni ka da ləkwa shar, ka da mwa akəmari ka mwari aɓəla bwanda manda ni, kambəla tsa salamtə dlamar mji.

²³ Aghəla tə tsa salamtə mji ni, antə tsa ndlətə gar tsa shini kamnyar hara adduwa. Har tə tahaku hara, tsa tsu anda shini.

²⁴ Tsuwa akwa saka ngəni shar ni ku təra ciju ka duna ata manda ni, ciju kazhar mnya manda ni, tsuwa shar ni akwa ɗar bwani kamnyar mpar yimi, kamnyar tə shambar ni akwa damitə bwa kəma ɗa.

²⁵ Akwa saka makər na aviri, antə mjirthlipər Yesu ni wutə Yesu akwa si ata kəra yimi ni, akwa si adzə ɗa.

²⁶ Amma sakatə da wutə ni akwa mwa ata kəra yimi ni, antə da thlivər ka duna, ka pəla, “Wul giri shatan!” Antə da hara kuraku kamnyar thlivəra.

²⁷ Amma Yesu ndər ala ɗa, ka pəla, “Peri gir hangkala giri. Iya! Giri aɗiya thlivər wa.”

²⁸ Antə Bitrəs pəla alari, “Mthlaku, ma an ga, pəla ali kəi mwari adzə nga ata kəra yimi ni.”

²⁹ Antə Yesu pəla, “Asəra!” Antə Bitrəs ku fəlghəi ata shar ni, ka ləkwa mwa ata kəra yimi ni akwa mwari adzə Yesu.

³⁰ Amma sakatə tsa wutə shambar na mwavər ni, antə tsa thlivər, ka ləkwa ləghəi akwa yimi ni. Antə tsa haptə kuraku ka pəla, “Mthlaku, mbantə ra.”

³¹ Təkəma antə Yesu ku ndərar tsiyari ka tamtə ni, ka pəla alari, “Gə mdə na ka hamta jiri raka, kamnyar mi tə ga aɗi mbərsa wa ri?”

³² Sakatə da ku ləkwa shar ni antə shambar ni thləthlata.

³³ Antə mji na akwa shar ni ku vəngkər səli aka Yesu, akwa pəla, “Jiri, ga an Ɓzər Hyel.”

Yesu Ku Mbantə Mdə Laga Ahar Jannisaret

³⁴ Sakatə da ləɓəla bwanda manda ni, antə da mwari akwa tsəɗi Jannisaret.

³⁵ Sakatə mjir di nda nggaɓəla abbər tsa an Yesu, antə da thlentə labar akwa shanga kauyayeri na kalaktə ɗa, antə da sənta alari shanga mjir ɗa na nggawa nggawa.

³⁶ Antə da kiɗə ni abbər ka tsa hir ala ɗa ka da tsəkwar wala mnya ləptərni daci. Antə shanga mji na ku tsəkwar ləptərni ni ku wutə mbantədzi.