Mathliyu 13 - KAKAƊU NA ƁƊAKKARKARA

Karapu Ata Kəra Mdər Ɓucə Hwulfa

¹ Tsu vir nda antə Yesu ləɓəla ka ra ndzəndzi ata mnya manda.

² Amma kamnyar tə dlamar mji hang ku tsaptədzi adzə ni, antə tsa ləkwa shar ka ndzəndzi akwa. Antə shanga mji na tsaptədzi ni thləthlata ata mnya manda ni.

³ Antə tsa ku ngkər ala ɗa su hang akwa karapu. Tsa pəla, “Mdər tsuhwa laga aɗi na ku ləɓəla kamnyar ɓucə hwulfa.

⁴ Sakatə tsa akwa ɓucə hwulfə ni akwa faku, antə hwulfayeri laga ku təri akwa kuta laku, tə ɗikayeri ku si ka ntəntwakəmnya ɗa.

⁵ Hwulfayeri laga tsuwa ku təri akwa vəi na ka pirakthlya, vəi tə həi aɗi ata hang wa, antə tsa ku ptsi taktar kamnyar tə həi aɗi ata kərari hang wa.

⁶ Amma sakatə pci ku səɓəla, antə da tətəɓumtadzi ka ulantədzi kamnyar tə da aɗi ka nggilang wa.

⁷ Tsuwa hwulfayeri laga ku təri akwa nca mtəhərayeri, antə mtəhərayeri ni ku kələngkərdzi ala ɗa ka ngkatə ɗa kəla.

⁸ Amma hwulfayeri laga ku təri akwa həi na ɓɗaku, antə da ku kəla ka ya munya, laga munyari aru pal, laga ngkwakumari, laga tsuwa makkumari.

⁹ Mdə na ka thləmər nggatə su, ka tsa nggata.”

Karapur Karapur Mdər Thləka Ni

¹⁰ Antə mjirthlipər Yesu ku si ka pəla alari, “Kamnyar mi tə ga ana gari aka mji ka karapu ri?”

¹¹ Antə Yesu shinau ala ɗa ka pəla, “Ar giri mdə ku hamta ala giri səndər ashira kuthlikur na amtazi, amma arɗa mda aɗi hamta ala ɗa wa.

¹² Kamnyar mdə na ka su antə mda ata jakəngkər alari, ka tsa ndzi kəgari hang. Amma kəlara mdə na kula su, wala su tə tsa kəgari ma, mda ata dluɓəlari.

¹³ Tsuwa su na hara tə I ana gari ala ɗa ka karapwayeri ni an “ ‘Kamnyar da ana wutə su, amma da aɗi ana wulɓəla wa, tsuwa da ana psi thləm, amma da aɗi ana nggatə su wa, wala nggaɓəla wa.’ ”

¹⁴ “Ata kəra ɗa, antə naɓikur ar Ishaya ku nghyaɓəladzi tə tsa pəla abbər, ‘Jiri giri ata ləkəma ka nggatə su, amma giri aɗi ata nggaɓəlari wala raka wa. Giri ata ləkəma ka wutə su, amma giri aɗi ata wulɓəlari wala raka wa.

¹⁵ Kamnyar ɗəffa mji ngəni ku hara ɓəɓal, tsuwa da ku dzəɓtə thləma ɗa ka hartə nca ɗa, kamnyar ta da asə wutə su ka nca ɗa, ka da sə nggatə su ka wutə su, ka dluwa akwa ɗəffa ɗa, tə ka da sə ngka adzə ra, kamnyar kəi mbantə ɗa.’ ”

¹⁶ “Amma ar giri, giri ka barka kamnyar nca giri ana wutə su, tsuwa thləma giri ana nggatə su.

¹⁷ I akwa pəla ala giri jirkur, naɓiyayeri kəga mji na pwa hang ku bara ka da wutə su tə giri ku wuta ni, amma da aɗi wutə wa, tsuwa ka da nggatə su tə giri nggatə ni, amma da aɗi nggatə wa.

Yesu Ku Ngkərɓəla Karapur Mdər Ɓucə Hwulfa

¹⁸ “Psi giri thləma giri ja, ka giri nggatə karapur mdər tsuhu ni.

¹⁹ Ma mdə ku nggatə ndər ar kuthlikur ni, amma tsa aɗi nggaɓəla wa, Shatan ana si ka tsa dlutsə su tə mdə thləka akwa ɗəffa mdə ni. Ngəni an hwulfə na təri akwa kuta laku ni.

²⁰ Hwulfə na təri akwa vəyayeri na ka pirakthlya ni an mdə na ku nggatə ndər ni ka dlu təkəma ka kucali.

²¹ Amma təng tə tsa aɗi ka nggilang wa, tsa aɗi fəi wa. Apani sakatə bwaniyayeri na mwavər mwavər ku thlata ata kəra ndər ni, antə tsa ngka ka bwahili.

²² Tsuwa hwulfə na təri akwa nca mtəhərayeri ni an mdə na ku nggatə ndərər Hyel ni, amma damitədzayeri ka bara gəna, ku ngkatə ni ta tsa akəla, antə tsa ku ndzi kula ampani.

²³ Hwulfə na təri akwa həi na ɓɗaku ni an mdə na ku nggatə ndər ni ka nggaɓəla, antə tsa ku ya ka hara munya, laga aru, laga ngkwakumari, ka laga tsuwa makkumari.”

Karapu Ata Kəra Sazau Ar Alkama

²⁴ Antə Yesu ku ngkər ala ɗa karapu damwa ka pəla, “Kuthlikur na amtazi ni ndzi tsu apa mdə na ku thləkamta hwulfə na ɓɗaku akwa fakərni.

²⁵ Amma sakatə mji akwa heni, antə dawar ni mwari ka thləkau sazau akwa nca alkama ni ka təra.

²⁶ Sakatə alkama ni ku kəla, ka hara kər antə sazau ni ku kəla tsuwa ka ncaɓəla kərɗa.

²⁷ Antə buɗayeri ni si ka pəla aka mdərkəyir ɗa abbər, ‘Zanuwa, aɗi hwulfə na ɓɗaku antə gə thləka akwa fakər ngə ni wa ya? Ka, sazauwayeri ngəni wutədzi ama tsu ri?’

²⁸ Antə tsa pəla ala ɗa, ‘Dawa laga an hara su ngəni.’ Antə buɗayeri ni yu ni, ‘Ga hir ka yeru ra ntsuɓəla ɗa ya?’

²⁹ Amma tsa pəla, ‘Awa, kamnyar ta nuhum sakatə giri akwa ntsuɓəla ɗa ni, giri asə ntsumta ɗa kəga alkama ni.

³⁰ Zhar giri ɗa ka da kəla ata kəma duku, har ka vədza aka sakar thlari. Ma sakar thlari ku hara, I ata pəla aka mjir thlari ni ka da tsaptə sazauwur alkama ni ata kəma duku ntangkəma, ka mdə mbwamta ɗa kər pal pal, kamnyar ka mdə mbamta ɗa. Amma ar alkama ni ka mdə tsapta ali akwa biyirna.’ ”

Karapu Ata Kəra Munya Mastad

³¹ Antə Yesu ngkər ala ɗa karapu damwa abbər, “Kuthlikur na amtazi ni ndzi tsu apa munya mastad, natə mdə laga kətə kara thləkamtari akwa fakərni.

³² Munya mastad an munya na raka ta shang akwa nca munya suayeri, amma ma sakatə tsa ku kəla, tsa ana ndzi na olta shanga nfwayeri, ka ndzi nfu na ola, har tə ɗikayeri ata si ka latə mbwar ɗa ata tsiyayerari.”

Karapu Ata Kəra Yist

³³ Antə Yesu jaktə ngkər ala ɗa karapu damwa abbər, “Kuthlikur na amtazi ndzi tsu apa yist, natə mwala laga kətə ka hərta akwa mpwa ar auna makər, har tə shanga mpu tə mdə hərtə ni ku thlata.”

Ampani Ar Kəthlər Ka Karapu Ni

³⁴ Yesu ku ngkər shanga suayeri ngəni aka mji na tsaptədzi ni akwa karapu. Jiri su aɗi tə tsa ngkər ala ɗa amma kula akwa karapu wa.

³⁵ Ngəni an kamnyar nghyaɓəla su tə naɓi pəla. Tsa ku hara apani kamnyar ka tsa nghyaɓəla su tə naɓi pəla abbər, “I ata gari ala ɗa akwa karapwayeri, I ata pəlaɓəla ala ɗa suayeri na ɗuwarɗuwarari təng akwa baɗitər duniya.”

Yesu Ku Ngkərɓəla Karapur Sazau Ni

³⁶ Antə Yesu ku zhar dlamar mji ka ləvəi, antə mjirthlipərni ku si adzə ni ka pəla, “Ngkərɓəla ala yeru karapur sazau ngəni akwa fakə ni.”

³⁷ Antə tsa shinau ka pəla, “Mdə na thləkamta hwulfə na ɓɗaku ni an Ɓzər Mda.

³⁸ Faku ni tsuwa an duniya ni, hwulfə na ɓɗaku ni tsuwa an mjir ləkwa kuthlikur ni, sazau ni tsuwa an maɗa' mdə na ɗimi ni.

³⁹ Tsuwa dawa na thləkau sazau ni an Shatan, sakar thli sur fakə ni tsuwa an kurər duniya. Mjir thli sur fakə ni tsuwa an mjirthlentərhyel.

⁴⁰ Apani tsu apatə mdə ku tsaptə sazau ni ka mbamta akwa u'u ni, antə mda ata sə harari akwa kurər duniya.

⁴¹ Ɓzər Mda ata sə thlentə mjirthlentərni, ka da tsagaptə shanga sur vu mda akwa hara biku ka shanga ɗimikur, ka fwaɓəla ɗa kazhar kuthlikurərni,

⁴² ka da ra pu ɗa akwa u'u na mwavər, vəi tə mji ata tuwa ka ɓɗə thlir.

⁴³ Antə mji na ka jirkur ata sə mbəlmbəla apa pci akwa kuthlikur ar Təddar ɗa. Mdə na ka thləmər nggatə su, ka tsa nggata.

Karapu Ata Kəra Gəna Na Ɗuwarɗuwarari

⁴⁴ “Kuthlikur na amtazi ndzi tsu apa gəna tə mdə ɗuwari akwa fakəu tə mdə laga karəngkər, ka jaktə ɗuwamta. Antə kamnyar ka kucali na akwa ɗəffari, tsa mwari ka ɗəgələmta shanga su na akəlari, ka si ka mastə fakəu ndaga.

Karapu Ata Kəra Sur Gəna Laga Na Ka Daraja

⁴⁵ “Tsuwa, kuthlikur na amtazi ndzi tsu apa mdər fəli na akwa pakə sur gəna na ka daraja.

⁴⁶ Sakatə tsa wutə sur gəna na ka daraja ni antə tsa mwari ka ɗəgələmta shanga su tə tsa kəgari, ka mastə sur gəna ndaga.

Karapu Ata Kəra Banggama

⁴⁷ “Tsuwa, kuthlikur na amtazi ndzi tsu apa banggama natə mdə ndzəha akwa manda, na ku ngkatsə jili kəlfayeri zumzum.

⁴⁸ Sakatə banggama ni ku nghyi, antə mji ku ndəkərɓəla ni ata mnya manda ni, ka ndzəndzi ka carɓəla jili kəlfayeri na ɓɗakɓɗaku, ka puwa akwa kurtu, ka pumta na ɗimi ɗimi ni.

⁴⁹ Tsu apani antə ata sə hara akwa kurər duniya. Mjirthlentərhyel ata sə ləɓəla ka da fwaɓəla mji na ɗimi ɗimi akwa nca mji na ɓɗakɓɗaku,

⁵⁰ ka pu ɗa akwa vəi u'u na mwavər, vəi tə mji ata tuwa ka ɓɗə thlir.”

Gəna Na Bilən Ka Na Fəifəyari

⁵¹ “Giri ku nggaɓəla su ngəni ya?” Antə da pəla alari, “I.”

⁵² Antə tsa pəla ala ɗa, “Apani kəlara maləm natə mdə ku thlipa alari lakur ndzi akwa kuthlikur na amtazi, tsa ata ndzi tsu apa mthlakər kəi na ana fwaɓəla suayeri na bilən bilən ka na fəifəyari akwa mbwar pwi surni.”

Mji Ku Nggəlar Yesu Ahar Nazareth

⁵³ Sakatə Yesu ku kuri ngkər karapwayeri ngəni, antə tsa təra kazhar vəi ndaga.

⁵⁴ Sakatə tsa si akwa diyirni, antə tsa baɗitə thlipa ala ɗa akwa mbwar vəngkər səli arɗa. Antə shanga mji na nggatə thlipərni ni ku ndatədzi, ka pəla, “Mdə ngəni wutə ɗəɗukur ngəni ka dunar hara surndatayeri ngəni ama ri?

⁵⁵ Aɗi ngəni an ɓzər kapənta ni pwa? Aɗi Maryamu an mama'ni wa ya? Tsuwa aɗi Yakub, ka Yusuf, ka Siman, ka Yahuda an maɗama'ni wa ya?

⁵⁶ Tsuwa aɗi shanga maɗama'ni na mwanki ni ata kəma duku kəga mburu azi wa ya? Ka, ama antə mdə ngəni wutə shanga suayeri ngəni ri?”

⁵⁷ Antə da nggəlar ncari ata kəra suayeri ngəni. Amma Yesu pəla ala ɗa, “Vəi aɗi tə naɓi kula daraja ata wa, tar akwa diyirni ka akwa kutakəyirni.”

⁵⁸ Apani tsa aɗi hara surndatayeri na ol'ola hang anda wa, kamnyar da an mji na kula hamta jiri.