Mathliyu 12 - KAKAƊU NA ƁƊAKKARKARA

Sur Yuwa Ata Kəra Vir Ghərəmtaghəra

¹ Akwa saka ndaga Yesu akwa təramta akwa fakər mthli Vir Ghərəmtaghəra, tsuwa mjirthlipərni akwa ngga ka mi. Antə da baɗitə ɓəgəli sanggamər mthli, akwa ɓɗari.

² Amma sakatə mjir Farisi wutə su ngəni, antə da pəla alari, “Wul mjirthlipər ngə ni akwa hara su na aɗi kalkal ka mdə hara akwa Vir Ghərəmtaghəra wa!”

³ Amma Yesu pəla ala ɗa, “Giri aɗi ɗar karata ata kəra su tə Dauda hara sakanda, sakatə tsa ka mji na adzə ni, akwa ngga mi wa ya?

⁴ Laku tə tsa ləkwa mbwar Hyel ka kwasə buradi natə mdə hamta aka Hyel ni, wala tə aɗi kalkal ka tsa wala mji na adzə ni ni kwasə wa, amma tar pristayeri daci ni!

⁵ Nənga giri aɗi karata akwa tsawur Musa wa ri, abbər akwa Vir Ghərəmtaghəra, antə pristayeri na mbwar Hyel hilantə Vir Ghərəmtaghəra, amma wala apani da kula biku?

⁶ I akwa pəla ala giri abbər su na ku təramta mbwar vəngkər səli ka olkur an aɗi azi.

⁷ Tsuwa ma giri an səndə su tə vəi ngəni akwa pəlari abbər, ‘Kətadza antə I akwa barari, aɗi saɗaka wa,’ sakani giri aɗi ata vəngkər biku aka mji na kula biku wa.

⁸ Kamnyar Ɓzər Mda an Mthlakər Vir Ghərəmtaghəra.”

Yesu Ku Mbantə Mdə Na Ka Tsiyari Mtəmtari

⁹ Antə Yesu zhar vəi ndaga, ka ləkwa mbwar vəngkər səli arɗa.

¹⁰ Tsuwa mdə laga aɗi anda na ka tsiyari mtəmtari. Antə da yu Yesu abbər, “Kalkal ka mdə mbantə mda Vir Ghərəmtaghəra ya?” Da yu ni apani ni kamnyar ka da wutə vəi sharni.

¹¹ Antə Yesu pəla ala ɗa, “Wan akwa nca giri natə ma təmarni ku tərkwa ku na zurang akwa Vir Ghərəmtaghəra, tsa aɗi ata tamtə ni ka tsa kəɓəla ni wa ri?

¹² Ai darajar mdə ku təramta ar təma. Apani tsawa aɗi ngkatə ta mda ahara ɓɗakkur akwa Vir Ghərəmtaghəra wa.”

¹³ Antə tsa pəla aka mdə na ka tsiyari mtəmtari ni abbər, “Ndəraɓəla tsiya ga.” Antə tsa ndəraɓəla tsiyari, antə tsiyari ku jaktə ndzi lapiya ka damwa apa na dukwari ni.

¹⁴ Amma mjir Farisi ku təra ləɓəla, ka ra hara sauri ata kəra laku tə ka da tsi ni akwa.

Mafar Hyel Na Carcarari

¹⁵ Sakatə Yesu ku nggaɓəla su tə da ɗəmha ata kərari ni, antə tsa təra kazhar vəi nda. Antə mji hang ku nutə ni, antə tsa ku mbantə ɗa shang.

¹⁶ Amma tsa tsaktə ɗa abbər da aɗiya ngkər ni aka mji wa.

¹⁷ Tsa ku pəla apani kamnyar nghyaɓəla su tə Hyel pəla atar naɓi Ishaya abbər.

¹⁸ “Nggədza buɗarna, natə I carɓəla, natə tə I hir ka duna, natə I akwa nggatə msərakurər arni, I ata vəngkər mambələrna ata kərari, antə tsa ata psəmnya jirkur aka mji,

¹⁹ Tsa aɗi ata beɗi kamnyar mbul kərni wa, wala gari ka kuraku wa, wala hara ka mdə nggatə kurakari ata lakur kuta di wa.

²⁰ Tsa aɗi ata ɓələmta kədla na abaka ɓəl wa, wala kuri tsi u'ur pitəla tə mdə ku kəmta u'urni wa. Har tar ma jirkur ku səmi.

²¹ Tsuwa akwa thləmari antə shanga mji ata sə ndzi ka vuwur su akwa ɗəffu.”

Dunar Yesu Ku Təramta Ar Beyelzebul

²² Antə mdə sənta alari mdə laga na ka shatan akwa dzari, na mdlyang ka mnyari dləɓdləɓari. Antə Yesu ku mbantə ni, har tə tsa mzhi ləkwa mnya ka wutə su.

²³ Antə shanga mji ku ndatədzi, ka pəla, “Nənga ngəni aɗi Ɓzər Dauda wa ri?”

²⁴ Amma sakatə mjir Farisi ku nggatə ndər ngəni, antə da pəla, “Ai ka dunar Beyelzebul na kuthlir shatanayeri antə mdə ngəni akwa kədləɓəla shatanayeri ni.”

²⁵ Amma Yesu ku səndə dzamər ɗa, antə tsa pəla ala ɗa, “Kəlara kuthlikur na ku ndəkəmtadzi ka bwa suɗa aɗi ata ndzəndzi wa. Tsuwa kəlara di wala kəi na ku ndəkəmtadzi, aɗi ata ndzəndzi wa.

²⁶ Antə ma Shatan ata kədləɓəla Shatan nvwani, tsa ku ndəkəmtadzi ka kərari surni, antə apa madi tə kuthlikurərni ata mzhi thləthlatə ri?

²⁷ Antə ma I akwa kədləɓəla shatanayeri ka dunar Beyelzebul, ka dunar wa antə maɗa' giri akwa kədləɓəla shatan ri? Antə apani da an ata sə hara ala giri shariya ata kəra su ngəni.

²⁸ Amma ma ka Mambələr Hyel antə I akwa kədləɓəla shatanayeri ni, to kuthlikur ar Hyel ku si ata kəra giri.

²⁹ Nənga apa madi tə mda ata mzhi ləkwa kəyir mdə na ka duna ka famnya kari kutakəyirni ri? Ai, tar ma tsa ku mbwi mdə na ka duna ni katagu, kambəla tsa mzhi famnya kari kutakəyirni.

³⁰ “Kəlara mdə na aɗi akwa nu su tə I pəla wa, tsa ku ndzi dawarna, tsuwa kəlara mdə na aɗi akwa dlar ra akwa tsaptə su wa, tsa akwa titiləmtari.

³¹ Antə I akwa pəla ala giri, kəlara biku ka kəlara ndər na ɗimi tə mji ata pəlari ata kəra Hyel, mda ata mzhi tifəmta ala ɗa, amma kəlara mdə na ata ngkər ndər na ɗimi ata kəra Mambəl na Ɓɗakkarkara, mda aɗi ata tifəmta alari wa.

³² Tsuwa kəlara mdə na ata pəla su na ɗimi ata kəra Ɓzər Mda, mda ata tifəmta alari, amma kəlara mdə na ata pəla su na ɗimi ata kəra Mambəl na Ɓɗakkarkara, mda aɗi ata tifəmta alari wa, wala akwa zaman ngəni wala akwa zaman na ata si.”

Mda Ana Səndə Nfwa Atar Yarni

³³ “Nfur səma na msəra yarni ana ndzi msəra, antə nfu na ɗəɗahu yarni ana ndzi ɗəɗahu tsuwa. Kamnyar mda ana səndə nfwa atar yarni.

³⁴ Giri na pwapwayeri na mwavər mwavər! Apa madi tə giri ata mzhi pəla su na kalkal ri, təng tə giri mji na ɗimi? Ai hangkur su na akwa ɗəffa mda, andər səɓəla ata mnya mda.

³⁵ Kamnyar mdə na pwa, ana fwaɓəla suayeri na ɓɗakɓɗaku akwa vəi pwi su arni na ɓɗaku, antə mdə na ɗimi tsuwa ana fwaɓəla suayeri na ɗimi ɗimi akwa vəi pwi su arni na ɗimi.

³⁶ “I akwa pəla ala giri, akwa vir shariya, waskəi ata sə pəla mnyari ata kəra shanga ndərayeri tə tsa pəla gapangapani.

³⁷ Kamnyar ndərayeri tə gə pəla an ata mzhi ncanta abbər gə ka jiri, wala gə kula jiri.”

Mji Ku Bara Wutə Sur Ndatayeri Akəla Yesu

³⁸ Antə mji laga akwa nca maləmayeri ar thlipə tsawur Musa kəga mjir Farisi laga, pəla alari abbər, “Yeru akwa bara ka yeru wutə surndata akəla ga.”

³⁹ Amma Yesu shinau ala ɗa ka pəla, “Mjir zaman ngəni an mji na ɗimi ka kula jirkur. Da akwa bara seɗa, amma mda aɗi ata hamta ala ɗa seɗa wa, tar seɗar naɓi Jona.

⁴⁰ Kamnyar apatə Jona ku hara pci makər ka vir makər akwa kuta kəlfa na ola, antə Ɓzər Mda ata sə hara pci makər ka viri makər akwa di.

⁴¹ Ma vir shariya mjir Nineva ata səɓəla ka pəlangkər ala ɗa abbər da aɗi hara kalkal wa, kamnyar wala da natə Jona an ngkər ala ɗa ma da ku tubi. Antə har mdə na təramta Jona ka olkur ku si azi, amma wala apani giri aɗi hir tubi wa!

⁴² Tsuwa akwa vir shariya, kuthli mwala na ar Sheba ata thlatə kəma duku ka zaman ngəni ka ncanta alari abbər tsa aɗi hara kalkal wa, kamnyar tsa ku thlata akwa vəi na ciju ka duna ka si, kamnyar ka tsa nggatə ɗəɗukur ar Kuthli Solaman. Antə nggədza mdə na ku təramta Solaman ka olkur azi.”

Ngkar Mambəl Na Ɗimi Akwa Vəi Ndzəndziyirni

⁴³ “Ma Sakatə mambəl na ɗimi ku ləɓəla akwa dza mda, tsa ana nu bwayeri na kula yimi, akwa bara vəi ghərəmtaghəra. Amma ma tsa aɗi wutə wa,

⁴⁴ tsa ata pəla, ‘I ata jaktə ngka akwa kəyirna tə I thlata akwa ni.’ Antə ma tsa ku ngka ka wutə kəi ni kula su akwa, tsartsarari, tsuwa namnamari,

⁴⁵ tsa ata mwari ka səntə mambəlayeri na ɗimi ɗimi damwa murfa, na ku təramta ni ka ɗimikur, ka da sə ndzəndzi akwa kəi ni. Antə akwa tsikərari, ndzəndziyir mdə ngəni ata ndzi ɗimi ta na ntangkəma ni. Tsu apani an su na ata sə hara aka mji na ɗimi akwa zaman ngəni ni.”

Mama' Yesu Ka Maɗama'ni Na Shili

⁴⁶ Sakatə Yesu tsu akwa gari aka mji, təng nggədza mama'ni kəga maɗama'ni athləthlata aɓəla, akwa bara ka da gari alari.

⁴⁷ Antə pal akwa nca mji na anda pəla alari, “Nggədza, mama' nga kəga maɗama' nga athləthlata aɓəla akwa bara gari ala ga.”

⁴⁸ Amma Yesu pəla aka mdə na ndər alari ni abbər, “Wan mama'na nə ri? Tsuwa kəga wan maɗama'na nə ri?”

⁴⁹ Antə tsa nca mjirthlipərni ka tsiyari ka pəla, “Nggədza mama'na kəga maɗama'na!

⁵⁰ Kamnyar kəlara mdə na ata hara su tə Təddarna na amtazi hira, tsa an ɓzərma'na, ka ngkwarma'na, ka mama'na.”