Mathliyu 10 - KAKAƊU NA ƁƊAKKARKARA

Yesu Ku Carɓəla Mjirthlipərni Kumnya Suɗa

¹ Antə Yesu kəgatə mjirthlipərni na kumnya suɗə ni adzə ni, ka hamta ala ɗa dunar kədləɓəla mambəlayeri na ɗimi ɗimi, ka tsuwa ka da kuri kəlara jili shilku ka nggawakur na aɗi.

² Nayeri ni an thləma aposəlayeri na kumnya suɗə ni an apani. Na ntangkəma Siman, natə mda ana kəga thləmari Bitrəs, ka Andrawus na ɓzərma'ni, ka Yakub na ɓzər Zabadi, ka Yahwana na ɓzərma Yakub ni,

³ ka Filibus, ka Barthlolomiu, ka Thlomas ka Mathliyu na mdər dlu tsəma, ka Yakub na ɓzər Halfa ka Thladdeyus,

⁴ ka Siman mdər Kanana ka Yahuda Iskariyoti na ku sə ɓəli Yesu.

Yesu Ku Thlentə Mji Na Kumnya Suɗə Ni

⁵ Antə Yesu thlentə mji na kumnya suɗə ni, ka pəla ala ɗa, “Giri aɗiya mwari akwa tsəɗiyir mjir dur damwa wa, wala akwa kauyayeri ar mjir Samariya wa.

⁶ Amma ka giri mwari adzə təmayeri na shashari, watau mjir Israila.

⁷ Ma giri ku mwari, ka giri ngkər labar ar Hyel abbər, ‘Kuthlikur na amtazi ku hara kudzəha.’

⁸ Ka giri mbantə mji na nggawa nggawa, ka thlentə mji na ku mti. Ka giri kuri shilkayeri ar shilkər kəsəm dza, ka kədləɓəla shatanayeri akwa dza mji. Cauta antə giri wuta, antə ka giri hamta cauta tsuwa.

⁹ Giri aɗiya kəl kwaba wa, wala kəlara su tə mdə nam ka dinar wala adzərfa wala nggirkumi, akwa dlipur giri wa.

¹⁰ Tsuwa giri aɗiya kəl thləvu kamnyar lənggur giri wa, wala fa ləptu suɗa, wala ɓaɓi, wala kəl zwal wa. Kamnyar kalkal ka mdər kəthlər wutə susəma na ata mzhi ni.

¹¹ “Kəlara sakatə giri ku ləkwa di na ola wala na raka, ka giri bara mdə na pwa, ka giri ndzəndzi aviyar ngkiɗa har tar vir tə giri ata təra kazhar di nda.

¹² Ma sakatə giri akwa ləvəi akwa kəi ni, ka giri thlawar mjir kutakəi ni.

¹³ Antə ma mjir kutakəi an mji na pwa, ka giri hara adduwa kamnyar ka Hyel hamta msərakur ata akwa kəi ni. Amma ma aɗi apani wa, to ka msərakur giri ngka ala giri.

¹⁴ Tsuwa kəlara mdə na aɗi dlu giri wa, wala psi thləm aka ndərər giri wa, ma sakatə giri ata zhar di ni, ka giri ɓumta bərbər na ata səla giri.

¹⁵ I akwa pəla ala giri jirkur, ma vir shariya Hyel ata kətadzə mjir Sodom ka Gomora təramta mjir di ndaga.”

Bwaniyayeri Na Ata Sə Hara Akəmazi

¹⁶ “Nggədza, I akwa thlentə giri apa təmayeri akwa nca kilamtakayeri, antə ka giri ndzi ɗəɗu apa pwapwayeri, ka ndzi kula ɓzamtə su apa bukəlayeri.

¹⁷ Ka giri hara hangkal ka mji ni, kamnyar da ata sə hamta giri akəma alkaliyayeri, ka da ɓu giri ka kwandeng akwa mbwayeri ar vəngkər səli na arɗa.

¹⁸ Da ata sə mwantə giri akəma gwamnayeri ka kuthlyayeri kamnyar thləmi, kamnyar ka giri hara seɗa ala ɗa ka tsuwa aka mji na aɗi mjir Yahudi wa.

¹⁹ Ma sakatə da ku fatə giri, ka mwantə giri akwa shariya, giri aɗiya damitədzi ata kəra su tə giri ata pəlari wa, wala laku tə giri ata pəlari akwa wa. Kamnyar akwa saka ndaga mda ata ngkər ala giri su tə giri ata pəlari.

²⁰ Kamnyar aɗi giri an ata gari ni wa, amma Mambələr Təddar giri an ata gari atar giri.

²¹ “Kamnyar mda ata sə hamta ɓzərma'ni ka mdə tsi ni, tsuwa baba ata sə hamta ɓzərni. Tsuwa maɗankyar ata sə nggəlar ndərər mji na ya ɗa, har ka da vu ka mdə tsəgəi ɗa.

²² Shanga mji ata sə nggəlar giri kamnyar na. Amma mdə na ku nggitə har ka vədza aka tsikərari, tsa ata mbantədzi.

²³ Ma da ku hara bwani ala giri akwa di laga, ka giri hwi mwari akwa di damwa. Kamnyar I akwa pəla ala giri jirkur, akwabə giri a dlarhə shanga kauyayeri na akwa Israila ni, Ɓzər Mda ata si.

²⁴ “Ɓzər makaranta aɗi ana təramta maləmərni wa, tsuwa mafa aɗi ana təramta mthlakərni ka olkur wa.

²⁵ Ɓzər makaranta ata mzhi mwaɓtə ndzi apa maləmərni, tsuwa mafa ata ka tsa ndzi apa mthlakərni. Ma da ku kəga mthlakər kəi abbər tsa Shatan, da ata pəla mi aka mjir kutakəyirni ri?”

Mdə Natə Kalkal Ka Mdə Thlivər Ni

²⁶ “Antə giri aɗiya thlivər ɗa wa, kamnyar su aɗi na harharari na kula ata sə kəlardzi wa, wala na ɗuwarɗuwarari na kula mda ata sə səndari wa.

²⁷ Su tə I ku pəla ala giri akwa kuthlu, ka giri sə ngkər akwa parakəu. Tsuwa su tə giri ku nggata akwa vəi ɗuwarɗuwari, ka giri psəmnya ata kəra mbwayeri.

²⁸ Giri aɗiya thlivər mji na ata tsi dza mda, amma da amzhi tsi mambəl wa ni wa. Amma ka giri thlivər Hyel, na ata mzhi hilantə dza mda japu ka mambəl akwa kəi u'u.

²⁹ Mda aɗi ana ɗələmta addər suɗa ata kəra kwaba pal wa ya? Amma wala apani wala duku aɗi ata təri ata di kula hirər Təddar giri wa.

³⁰ Amma ar giri, wala shishir kəra giri mdə ku jikatə hangkurər ɗa.

³¹ Antə apani giri aɗiya thlivər wa, kamnyar darajar giri ku təramta addərayeri na hang ni.”

Ncantə Mbərsa Ka Yesu Akəma Mji

³² “Kəlara mdə na ata haptə səliyirna akəma mji, I ata haptə səliyirni akəma Təddarna na amtazi.

³³ Amma kəlara mdə na ata nggəlar ra akəma mji, I ata nggəlar ni tsuwa akəma Təddarna na amtazi.”

I Aɗi Səntə Msərakur Wa Tar Mpa

³⁴ “Giri aɗiya tamata abbər I si kamnyar kəi səntə msərakur akwa duniya wa. Awa, I aɗi si kamnyar kəi səntə msərakur wa, amma tar mpa.

³⁵ “ ‘Kamnyar I si kəi tsuktə mdə ka baba'ni, ɓzərngkwa ka mama'ni, mwala ɓzər ka mama' salngkiɗa.

³⁶ Tsuwa dawar mda ata thlatə tsu akwa nca mjir kutakəyirni.’ ”

³⁷ “Kəlara mdə na ku hir baba'ni wala mama'ni təramta ra, tsa aɗi mzhi ndzi arna wa. Tsuwa kəlara mdə na ku hir ɓzərni wala ngkwarni təramta ra, tsa aɗi mzhi ndzi arna wa.

³⁸ Tsuwa kəlara mdə na aɗi kətə udzəm kadləkadla arni ka nu ra wa, tsa aɗi mzhi ndzi arna wa.

³⁹ Kamnyar kəlara mdə na ata bara tsəlpi mpikari, mpikari ata sha. Kəlara mdə na ata hir shamta mpikari kamnyar na, tsa ata wutə mpika.”

Kəthlərayeri Na Ka Riɓa

⁴⁰ “Kəlara mdə na ku dlu giri, tsa ku dlu ra, tsuwa kəlara mdə na ku dlu ra, tsa ku dlu mdə na ku thlentə ra.

⁴¹ Kəlara mdə na ku dlu naɓi kamnyar tə tsa naɓi, tsa ata dlu watsəɓa ar naɓi. Tsuwa kəlara mdə na ku dlu mdə na pwa kamnyar tə tsa mdə na pwa, tsa ata dlu watsəɓər mdə na pwa.

⁴² Kəlara mdə na ku hamta yimi mtathlaku aka pal akwa nca maɗankyar nayeri ni, kamnyar tə tsa mdər thlipa arna, wala an kwapə duku, I akwa pəla ala giri jirkur, tsa ata wutə watsəɓərni.”