Markus 9 - KAKAƊU NA ƁƊAKKARKARA

¹ Antə tsa pəla ala ɗa, “I akwa pəla ala giri jirkur, mji laga aɗi athləthlata azi na aɗi ata mtə kambəla wutə kuthlikurər Hyel si ka dunarni wa.”

Palidzər Yesu

² Aghəla vir ngkwa antə Yesu kətə Bitrəs, ka Yakub, ka Yahwana, ka mwantə ɗa ata kəra gar na nal, tə da ndzəndzi anda shiɗa. Təkəma təng dludzər ni palidzi akəma ɗa,

³ tə ləptərni ndzi shalak mwapu akwa mbəlmbəla, natə mda aɗi akwa duniya ni na amzhi kəcimta ləptu ni ka tsa ndzi mwapu apani wa.

⁴ Antə da wutə Iliya, ka Musa akwa gari ka Yesu akəma ɗa.

⁵ Antə Bitrəs pəla aka Yesu, “Maləm, ku hara ɓɗaku tə mburu azi ni. Ndzi ka yeru namtə tentayeri makər, pal kamnyar nga, pal kamnyar Musa, ka palari tsuwa kamnyar Iliya.”

⁶ Bitrəs aɗi səndə su tə ka tsa pəla wa, kamnyar shanga ɗa ngəni makər ni ku thlivəra.

⁷ Təng dlamba laga si ka hartə ɗa akwa ləmbəku. Təng təkəma kuraku laga səɓəla akwa dlamba ni akwa pəla, “Ngəni an Ɓzərna natə I hira. Psi gir thləm alari!”

⁸ Təkəma antə da wuli su, amma da aɗi wutə mdə damwa adzə ɗa wa, təng Yesu shini.

⁹ Sakatə da akwa səghəi ata kəra gar ni, antə Yesu tsaktə ɗa abbər da aɗiya ngkər su tə da wutə ni aka wama wa, tar aghəla sakatə Ɓzər Mdə ku thlata akwa mtəmta.

¹⁰ Antə mjirthlipərni ni kəsi ndər ni akwa daɓwa ɗa, akwa yu nvwa ɗa abbər, “Man karapur thlata akwa mtəmta nə ri?”

¹¹ Antə da yu ni abbər, “Kamnyar mi tə maləmayeri ar thlipə tsawur Musa ana pəla, tar ma Iliya ku si katagu nə ri?”

¹² Antə Yesu pəla ala ɗa, “Jiri tar ka Iliya si katagu, ka tsa namɓəla shanga su. Amma tsuwa kamnyar mi tə mdə rəbutə abbər tar ka Ɓzər Mdə ɗar bwani akwa lakwayeri zumzum hang, ka mji taratə ni nə ri?

¹³ Amma I akwa pəla ala giri abbər Iliya ku kurtə si, tsuwa da ku hara alari shanga su tə da hira, tsu apatə mdə rəbuta akwa kakaɗu ata kərari ni.”

Yesu Ku Mbantə Ɓzər Laga Na Ka Shatan Akwa Dzari

¹⁴ Sakatə Yesu ka mjirthlipərni na makərni ngka adzə mambila mjirthlipərni ni, antə da wutə dlamar mji hang ku kalaktə ɗa, ka maləmayeri ar thlipə tsawur Musa ni akwa beɗi kəga da.

¹⁵ Sakatə shanga mji ni wutə Yesu, antə da ndatədzi ka duna, tə da hwi mwari adzə ni ka thlawar ni.

¹⁶ Antə Yesu ku yu mjirthlipərni abbər, “Giri akwa beɗi ata kəra mi kəga da nə ri?”

¹⁷ Antə mdə laga akwa nca mji ni pəla aka Yesu, “Maləm, I səntə ɓzərna ala ga, kamnyar tsa ka shatan laga akwa dzari na ku dləɓtə mnyari.

¹⁸ Kəlara sakatə shatan ni ku baɗitə hara bwani alari, tsa ana ngkəi ni ata di, ka muthlafu səɓəla akwa mnyari. Tsuwa tsa ana ɓɗəɓɗə thlirari, ka ulantə dzari. I ku gari aka mjirthlipər nga abbər ka da kədləɓəla shatan ni, amma da aɗi mzhi wa.”

¹⁹ Antə Yesu pəla ala ɗa, “Giri na mjir zaman ngəni, giri hilhilari, kula hamta jiri. Kəi fəi adzə giri apa madə ri kambəla giri mbərsa ka ndərərna ni? Har ka vədza aka saka madi antə I ata ləkəma ka mbwi ɗəffi ka giri ri? Səntə gir ni ali azi!”

²⁰ Antə da səntə alari ɓzər ni. Təkəma tə mambəl ni wutə Yesu, təng tsa tsa ɓzər ni, tə tsa ndla ata di, ka ləkwa takəla, ka muthlafu akwa səɓəla akwa mnyari.

²¹ Antə Yesu ku yu baba' ɓzər ni abbər, “Nawa antə su ngəni baɗita alari ri?” Antə mdə ni pəla, “Təng tə tsa ɓzəngkyar.

²² Su ni ku bara psu ni akwa u'u ka akwa yimi ka hang, ka tsa tsi ni. Amma ma su aɗi tə ga ata mzhi harari, kətadzə yeru usa, ka gə dlar yeru.”

²³ Antə Yesu pəla alari, “Ma ga amzha! Ai shanga su ana ndzi kasəla aka mdə na ku hamta jiri.”

²⁴ Təkəma antə baba' ɓzərni haptə kurakari ka pəla, “I ku hamta jiri, dlar ra kara jaka ali hamta jirərna.”

²⁵ Sakatə Yesu wuta abbər mji akwa si ata kəma duku ka hwi kamnyar wul su na akwa hara ni, antə tsa mpa aka shatan ni abbər, “Shatan twangtwangkur ka mnya dləɓdləɓa, I akwa tsawa ala ga, səɓəla akwa dzari, tsuwa ga aɗiya jaktə ləkwa dzari kəra wa.”

²⁶ Antə shatan ni hara kuraku, ka kənggərtə ɓzər ni ka duna, kambəla tsa səɓəla. Sakatə shatan ni ku səɓəla təng ɓzər ni ndzi apa mtəmtari, har tə mji hang pəla, “Ai ɓzər ni ku mti.”

²⁷ Amma Yesu ku tamtə tsiyari ka thlentə ni ata səlari, antə tsa thlatəmta.

²⁸ Sakatə Yesu ləvəi ata kəma duku ka mjirthlipərni, antə da yu ni akwa ɗuwari abbər, “Kamnyar mi tə ar yeru, yeru aɗi ana mzhi kədləɓəla shatan ni wa ri?”

²⁹ Antə Yesu pəla ala ɗa, “Jili mambəl ngəni, su aɗi na amzhi kədləɓəla ni wa, tar adduwa daci.”

Yesu Ku Jaktə Pəla Su Ata Kəra Mtərni

³⁰ Antə Yesu ka mjirthlipərni ku zhar vəi na nda ka təramta akwa kuta Galili, amma Yesu aɗi hir ka wama səndə vəi tə tsa akwa wa.

³¹ Kamnyar tsa akwa thlipa aka mjirthlipərni abbər, “Mda ata hamta Ɓzər Mda aka mji, ka da tsi ni. Ma sakatə da ku tsi ni, tsa ata thlata aghəla vir makər.”

³² Amma da aɗi nggaɓəla karapur gari ngəni wa, tsuwa da akwa thlivəra yu ni.

Wa An Təramta Ka Olkur Ri?

³³ Antə da si ahar Kafarnahum. Sakatə da ləvəi akwa kutakəi ni, antə Yesu yu mjirthlipərni abbər, “Man tə giri akwa beɗi ata kər akwa laku nə ri?”

³⁴ Amma da dləɓ səri, kamnyar ata laku ni da beɗi abbər wan olta shang akwa nca ɗa ri?

³⁵ Antə Yesu ndzəndzi ka kəga mjirthlipərni na kumnya suɗə ni adzə ni, ka pəla ala ɗa, “Ma mdə na akwa bara ka tsa ndzi akəma, tar ka tsa tərghəi kərari ka ndzi aghəli ta shang, ka tsa ndzi buɗar shanga mji tsuwa.”

³⁶ Antə tsa kətə ɓzəngkyar laga na raka, ka vu tə tsa thləthlata akwa nca ɗa. Sakatə tsa kətə ni ka fəfahə ni, antə tsa pəla ala ɗa,

³⁷ “Kəlara mdə na ku dlu ɓzəngkyar na raka apa ngəni akwa thləmi, tsa ku dlu ra. Tsuwa kəlara mdə na ku dlu ra, aɗi iya antə tsa dlu wa, amma mdə na thlentə ra.”

Kəlara Mdə Na Aɗi Dawar Mburu Wa, Tsa Ar Mburu

³⁸ Antə Yahwana pəla aka Yesu, “Maləm, yeru ku wutə mdə laga akwa kədləɓəla shatanayeri akwa thləma ga, antə yeru ngkatə ni. Kamnyar tsa aɗi akwa nu mburu wa.”

³⁹ Amma Yesu pəla, “Giri aɗiya ngkatə ni wa, kamnyar mda aɗi na ata hara surndata akwa thləmi antə aghəla nda, ka tsa mzhi pəla suayeri na ɗimi ɗimi ata kəri wa.

⁴⁰ Kamnyar kəlara mdə na aɗi nggəlar mburu wa, tsa ar mburu.

⁴¹ Kamnyar jiri, I akwa pəla ala giri, kəlara mdə na ku na ala giri yimər sa, wala an kwapə duku, kamnyar tə giri ar Kristi, jiri tsa ata wutə watsəɓari.”

Suayeri Na Ana Ngkərtə Mda Ka Mdə Hara Biku

⁴² “Tsuwa kəlara mdə na ata hara ka pal akwa nca maɗankyar ngəni raka raka na ku hamta jiri ali ni, ka tsa hara biku, ata ndzi hərku alari ka mdə mbwatə bur na ola ata wulyari, ka psu ni akwa manda.

⁴³ Ma tsiya ga ata vu nga akwa hara biku, nthləmta ni bu! Ai kuji ka gə ləkwa mpikə na akur wa ka tsiya gə duku, ta ga aləkwa kəyir u'u ka tsiya gə suɗa, vəi tə u'urni ana mtə wa ni.

⁴⁵ Tsuwa ma səla ga ata vu nga akwa hara biku, nthləmta ni bu. Ai kuji ka gə ləkwa mpikə na akur wa nggurdəkəi, ta mda apsu nga akwa kəyir u'u ka səla gə suɗa.

⁴⁷ Tsuwa ma nca ga ata vu nga akwa hara biku, tuhurɓəla ni bu. Ai kuji ka gə ləkwa kuthlikurər Hyel ka nca gə duku, ta mda apsu nga akwa kəyir u'u ka nca gə suɗa.

⁴⁸ Akwa vəi tə kulamnyayeri na ana ɓɗəɓɗə mda aɗi ata mtə ba saka madi wa, tsuwa vəi tə u'u aɗi ata mtə wa ba saka madi.

⁴⁹ “Mda ata sə kəcimta kəlara mda ka u'u, apatə mda ana kəcimta saɗaka mbamba ka una.

⁵⁰ “Unə msəra. Amma ma msərakur un ni ku mti, apa madi tə vəi unkurərni ni ata jaktə namtədzi ka damwa ri? “Ka giri ndzi ka msərakur un ni akwa ndzəndziyir giri, ka giri ndzi ka msərakur kəga nvwa giri.”