Markus 5 - KAKAƊU NA ƁƊAKKARKARA

Yesu Ku Mbantə Mdə Laga Ka Shatan Akwa Dzari

¹ Antə Yesu ka mjirthlipərni ku ntamta manda ni ka ləɓəla abwanda akwa tsəɗiyir Gerasin.

² Sakatə Yesu səɓəla akwa shar ni, antə tsa kəɓa ka mdə laga na ka mambəl na ɗimi akwa dzari, tsa thlata akwa vəi kula.

³ Kamnyar akwa vəi kula ni antə tsa ana ndzəndzi. Tsuwa mda aɗi na amzhi mbwi ni, wala an ka məsəsal wa,

⁴ kamnyar ka hang tə mdə mbwi ni ka məsəsal kəga canayeri, amma kəlara saka tsa ana nthləgəmta canayeri ni ka ɓəgələmta məsəsal na akwa səlari ni. Antə mda aɗi na ka dunar mzhi rwatə ni wa.

⁵ Pci ka viri tsa ana kadla akwa vəi kula ka akwa garayeri, akwa hara kuraku tədəku, ka thləthla dzari ka pela.

⁶ Sakatə tsa wutə Yesu tsu ciju, antə tsa pthli hwi ka mwari ka zuzuri akəmari,

⁷ ka haptə kuraku ka duna akwa pəla, “Man paktə ra ka gə ri, Yesu, gə na Ɓzər Hyel na Amta ta shang? I paktə nga ka Hyel, ga aɗiya hara bwani ali wa!”

⁸ Tsa pəla apani kamnyar tə Yesu pəla alari abbər, “Səɓəla akwa dza mdə ni, mambəl na ɗimi ragai!”

⁹ Antə Yesu yu ni, “Thləma gə mə ri?” Antə mdə ni shinau ka pəla, “Thləmi Dlama, kamnyar yeru hang!”

¹⁰ Antə tsa kiɗə ka kiɗə kəra Yesu, abbər tsa aɗiya kədləɓəla ɗa kazhar zara ngəni wa.

¹¹ Tsuwa kudzəhə ka da, ciɓa laga aɗi ola ar gaduwayeri na akwa ɓəla anda adzər gar.

¹² Antə shatanayeri ni kiɗə Yesu abbər, “Zhar yeru bu ka yeru mwari akwa nca gaduwayeri ni, ka yeru ləkwa dza ɗa.”

¹³ Antə Yesu ku na ɗa laku. Antə shatanayeri ni ku səɓəla, ka ra pudzi akwa dza gaduwayeri ni. Antə gaduwayeri na ku mwanta apa dəpu suɗə ni, ku hwi ləghəi ata gar ni, ka pudzi akwa manda ni, ka satə yimi ka mtəgəmtadzi akwa manda ni.

¹⁴ Antə mjir ɓəla gaduwayeri ni hwi ka ra jikatə labar ni akwa kuta di, ka aka mji na ata hildi. Antə mji ku hwi ləɓəla kamnyar ra wutə su na hara ni.

¹⁵ Sakatə da si adzə Yesu, antə da wutə mdə tə shatanayeri ləɓəla akwa dzari ni andzəndzi, ka ləptərni hahari ata dzari, tsuwa tsa akwa hangkalari, antə shanga ɗa ku thlivəra.

¹⁶ Antə mji na wutə su na ku hara ni ka nca ɗa, ku ngkərɓəla aka mji laku tə su ni hara aka mdə na ka shatanayeri ni, ka su na wutə gaduwayeri ni.

¹⁷ Antə da ləkwa kiɗə kəra Yesu abbər ka tsa təra kazhar ala ɗa tsəɗiyir ɗa.

¹⁸ Sakatə da andzəndzi akwa shar ni, antə mdə tə shatanayeri ləɓəla akwa dzari ni kiɗə Yesu abbər, “Zhar ra bu ka mwa təra ka ga.”

¹⁹ Amma Yesu aɗi hir alari wa. Ata vəya ndaga tsa pəla alari, “Ngka avi adzə maɗama' nga, ka gə pəla ala ɗa olkur su tə Mthlaku hara ala ga, ka laku tə tsa kətadzə nga.”

²⁰ Antə mdə ni təra, ka mwari akwa shanga kauyayeri na kuma tə mda ana pəla Dikapolis ni, akwa ngkər olkur su tə Yesu hara alari. Antə shanga mji ku ndatədzi.

Yesu Ku Mbantə Ngkwar Yayirus Ka Mwala Na Nggawa

²¹ Sakatə Yesu ku jaktə ləkwa shar ka ntamta kuta manda ni ka mwari aɓəla bwanda, antə mji hang tsaptədzi adzə ni ata mnya yimi ni.

²² Antə pal akwa nca mji na ol'ola ata kəra mbwar vəngkər səli, na ka thləmari Yayirus ku si. Sakatə tsa wutə Yesu, antə tsa ndla akəmari,

²³ ka kiɗə kərari ka duna abbər, “Ngkwarna na raka ata mnya mta. Usa, sər ka gə vəngkər tsiya ga alari, ka tsa mbantədzi ka ndzi ka mpika.”

²⁴ Antə Yesu ku təra ata kəma duku ka mdə ni. Antə mji hang ku nutə Yesu, har da kalaktə ni akwa ɓiɓihə ni.

²⁵ Tsuwa mwala laga aɗi anda na ku hara məva kumnya suɗa ka mamshi akwa pumtadzi adzə ni.

²⁶ Tsuwa tsa ku kəɗar mwari adzə liktayeri hang, ka shamta shanga su tə tsa kəgari, amma hərku aɗi wa, təng shilkə ni akwa vərvəra!

²⁷ Sakatə mwala ni ku nggatə labar ata kəra Yesu, antə tsa si adzə ni təbwahilari akwa nca mji ni, ka tsəkwar ləptərni.

²⁸ Kamnyar mwala ni pəla akwa ɗəffari abbər, “Ma I ku tsəkwar wala an ləptərni, I ata mbantədzi.”

²⁹ Təkəma təng mamshi na akwa hwi ni thləthlata, tsuwa tsa ku nggata akwa dzari abbər tsa ku msər ta shilkə ni.

³⁰ Tsuwa təkəma təng Yesu nggata abbər duna ku ləɓəla akwa dzari, antə tsa ku shinardzi akwa nca mji ni ka pəla, “Wan tsəkwar ləptərna nə ri?”

³¹ Antə mjirthlipərni pəla alari, “Ga akwa wul mji hang akwa ɓiɓihə nga apani, antə ga ata pəla, ‘Wan tsəkwar ra nə ri?’ ”

³² Amma Yesu ku ləkəma akwa bara ka tsa wutə mdə na tsəkwar ni ni.

³³ Mwala ni ku səndə su na ku hara alari, antə tsa si ka thlivəra, ka dzari ata kədza, ka ndla akəma Yesu, ka ngkərɓəla alari shanga jirkur na aɗi.

³⁴ Antə Yesu pəla alari, “Ngkwarna, hamta jirər nga ku mbantə nga. Ka Hyel mwantə ngə lapiya. Ga ku msər ta nggawakurər nga.”

³⁵ Yesu tsu akwa gari ni, təng mji laga thlata aviyar Yayirus ka si, ka pəla aka Yayirus abbər, “Ai Ngkwar ngə ni ku mti, antə ga aɗiya jaktə ghərantə maləm ni wa!”

³⁶ Amma Yesu ku psəngkər thləm aka su tə da pəla ni wa, ka pəla aka olər mbwar vəngkər səli ni abbər, “Ga aɗiya thlivər wa. Ar ngə hamta jiri.”

³⁷ Tsuwa tsa aɗi hir ka mdə damwa nu ni wa, tar Bitrəs, ka Yakub, ka ɓzərma'ni Yahwana.

³⁸ Sakatə da ku si aviyar Yayirus, təng Yesu wutə hangkala mji thlatəthlatari, ka mji akwa tuwa ka jaɓ tuwa ka kuraku.

³⁹ Sakatə tsa ləvəi, antə tsa pəla ala ɗa, “Kamnyar mi tə hangkala giri thlatəthlatari ka mji akwa jaɓ tuwa nə ri? Ai ɓzəngkyar ni aɗi mtə wa, amma tsa akwa heni.”

⁴⁰ Antə da kumshi ni. Amma tsa vu tə shanga mji ləɓəla. Antə tsa kətə baba' ngkwa ni, ka mama'ni, ka mjirthlipərni na ata vəi duku ka tsa, tə da ləmbwa adzə ɓzəngkyar ni.

⁴¹ Antə Yesu tamtə tsiya ngkwa ni, ka pəla alari, “Talithlakum,” Karapwari abbər, “Ɓzərngkwa, I akwa pəla thlata!”

⁴² Təkəma antə ngkwa ni thlata, ka baɗitə mwa. Ngkwa ni ka məvari kumnya suɗa. Sakatə mji wutə su ngəni, antə da ndatədzi ka duna.

⁴³ Amma Yesu tsaktə ɗa ka duna abbər da aɗiya pəla aka mdə wa. Antə tsa pəla ala ɗa ka da nar susəma aka ngkwa ni.