Markus 3 - KAKAƊU NA ƁƊAKKARKARA

Yesu Ku Mbantə Mdə Na Ka Tsiyari Mtəmtari

¹ Vir laga tə Yesu jaktə mwari akwa mbwar vəngkər səli, təng tsa wutə mdə laga anda ka tsiyari mtəmtari.

² Azha mji laga aɗi anda na akwa bara laku tə ka da wutə vəi shar Yesu, antə da ku wul ni ka hangkal abbər nuhum tsa ata mbantə mdə ni akwa Vir Ghərəmtaghəra ni.

³ Antə Yesu ku pəla aka mdə na ka tsiyari mtəmtari ni, “Səɓəla ka gə si thləthlata akəma azi.”

⁴ Antə tsa pəla aka mji ni, “Kalkal ka mdə hara ɓɗakkur akwa Vir Ghərəmtaghəra, nənga ka mdə hara ɗimikur ri? Kalkal ka mdə mbantə mpika mda, nənga ka mdə kəl mpika mdə ri?” Amma da dləɓ səri ata kər.

⁵ Antə Yesu wul ɗa ka ɗəffari ɓzəɓzari, kamnyar ɗəffari ku ɓzi ka duna ata kəra kər ɓəɓalkur arɗa. Antə tsa pəla aka mdə ni, “Ndəraɓəla tsiya ga.” Antə tsa ndəraɓəla tsiyari, antə tsiyari ku jaktə ndzi lapiya apa na hwatu.

⁶ Antə mjir Farisi ku təra ləɓəla kazhar mbwar vəngkər səli ni, ka baɗitə pəli mnya kəga mjir Hirudus ata kəra laku tə da ata mzhi tsi Yesu.

Mji Ku Tsaptədzi Hang Ata Mnya Mandar Galili

⁷ Antə Yesu ka mjirthlipərni ku təra ka mwari ata mnya Mandar Galili. Antə mji dlama dlama ku thlata akwa Galili ka nutə ni, har kəga mjir Yahudiya,

⁸ ka Urushalima, ka Idumiya, ka aɓəla bwanda Thlyagha Jodan, ka tsuwa abwar Taya, Ka Sidon. Hang akwa nca ɗa si adzə Yesu ni kamnyar su tə da nggatə abbər tsa hara ni.

⁹ Antə tsa pəla aka mjirthlipərni ka da ɗəmha alari shar na raka ar yimi ka tsa ləkwa ta mji asə ntsəntsəhə ni kamnyar mji ku hara hang kamta adzə ni.

¹⁰ Kamnyar tsa ku mbantə mji hang, antə shanga mji na ka shilkayeri zumzum akwa ntsə lakur mwari adzə ni kamnyar ka da tsəkwar ni.

¹¹ Tsuwa kəlara sakatə mji na ka mambəlayeri na ɗimi ɗimi akwa dza ɗa ku wutə ni, da ana ndla akəmari ka pəla ka kuraku abbər, “Ga an Ɓzər Hyel.”

¹² Amma tsa tsaktə ɗa ka duna abbər da aɗiya ngkər ni aka mji wa.

Yesu Ku Carɓəla Mjirthlipərni Kumnya Suɗa

¹³ Antə Yesu lətə kəra gar, ka kəgaɓəla mji tə tsa akwa barari, antə da ku mwari adzə ni,

¹⁴ antə tsa carɓəla mji kumnya suɗa ka da ndzi ata kəma duku kəga tsa. Tsa akwa bara ka tsa dingngga thlentə ɗa ka da ra ngkər labar,

¹⁵ ka da wutə dunar kədləɓəla shatanayeri.

¹⁶ Nayeri ni an thləma mji na kumnya suɗə tə Yesu carɓəla ni. Siman, natə Yesu vəta alari thləm Bitrəs,

¹⁷ ka Yakub na ɓzər Zabadi, ka ɓzərma'ni Yahwana, natə tsa vəta ala ɗa thləm abbər Buwanarjis, watau maɗa' dlərər Hyel,

¹⁸ ka Andrawus, ka Filibus, ka Barthlolomiu, ka Mathliyu, ka Thlomas, ka Yakub na ɓzər Halfa, ka Thladdeyus, ka Siman na mdər Kanana,

¹⁹ ka Yahuda Iskariyoti na ɓəli ni.

Yesu Ka Beyelzebul

²⁰ Antə Yesu ku ləvəi akwa kəi laga. Antə mji hang jaktə tsaptədzi adzə ni, tsuwa mjirthlipərni aɗi mzhi wutə səm susəm wa.

²¹ Sakatə mjir kutakəyir ɗa nggata apani, antə da mwari kamnyar ka da səvi ka tsa, kamnyar mji akwa pəla, “Ai kərari ku tsa!”

²² Antə maləmayeri ar tsawur Musa na thlata ahar Urushalima pəla, “Ai Beyelzebul na kuthlir shatanayeri an akwa dzari. Tsuwa ka dunar Beyelzebul antə tsa akwa kədləɓəla shatanayeri ni.”

²³ Antə Yesu ku kəga ɗa adzə ni ka gari ala ɗa ka karapu, abbər, “Shatan ata mzhi kədləɓəla Shatan nvwani ya?

²⁴ Ai ma kuthlikur ku ndəkəidzi ka bwa suɗa, kuthlikur ndaga aɗi ndzəndzi wa.

²⁵ Tsuwa ma mbwa ku ndəkəidzi ka bwa suɗa, mbwa ndaga aɗi ata thləthlatə wa.

²⁶ Antə ma Shatan ku ndəkəmtadzi ka ləkwa mpa aka kərari surni, ai tsa amzhi thləthlatə kəra wa, kamnyar an tsikərari.

²⁷ “Mda aɗi na amzhi ləkwa kəyir mdə na ka duna ka famnya kari kutakəyirni wa, tar ma tsa ku mbwi mdə na ka duna ni katagu, kambəla tsa mzhi famnya kari kutakəyirni.

²⁸ “I akwa pəla ala giri jirkur, shanga biku tə mji hara, ka shanga suayeri na ɗimi ɗimi tə mji pəla, mda ata tifəmta ala ɗa.

²⁹ Amma kəlara mdə na ata pəla su na ɗimi ata kəra Mambəl na Ɓɗakkarkara, mda aɗi ata tifəmta alari wala raka wa, kamnyar tsa ku hara biku na ba saka madi.”

³⁰ Yesu pəla apani kamnyar tə mji laga akwa pəla abbər, “Tsa ka mambəl na ɗimi.”

Mama' Yesu Ka Maɗama'ni

³¹ Antə mama' Yesu ka maɗama'ni ku si ka thləthlata aɓəla, ka thlentə abbər ka mdə kəga ni.

³² Tsuwa mji aɗi hang andzəndzi adzə Yesu ka kalaktə ni. Antə da pəla alari, “Nggədza mama' nga kəga maɗama' nga na shili aɓəla akwa bara wutə nga.”

³³ Antə Yesu shinau ala ɗa ka pəla, “Wan mama'na kəga maɗama'na nə ri?”

³⁴ Antə tsa wul mji na andzəndzi adzə ni ni ka pəla, “Nggədza, mama'na kəga maɗama'na!

³⁵ Kamnyar kəlara mdə na ata hara su tə Hyel hira tsa an ɓzərma'na, ka ngkwarma'na, ka mama'na.”