Markus 2 - KAKAƊU NA ƁƊAKKARKARA

Yesu Ku Mbantə Mdə Laga Na Ka Dzari Mtəmtari

¹ Aghəla virayeri laga antə Yesu ku ngka ahar Kafarnahum, antə mji nggata abbər tsa avi.

² Antə mji hang ku tsaptədzi adzə ni har tə vəi ndzəndzi aɗi wala aɓəla nyarfu kəra wa. Antə Yesu ku ngkər ala ɗa labar Hyel.

³ Antə mji laga ku səntə mdə laga nggawa ka dzari mtəmtari aka Yesu, mji nfwar an kəl ni.

⁴ Amma da aɗi mzhi ləmbwa ka mdə ni adzə Yesu wa kamnyar hangkurər mji. Antə da mburəmta kəra mbwa ni ata vəi tə kalkal Yesu ata. Sakatə da ku ntuli gula ni, antə da haghəi mdə na nggawa ni ata algau.

⁵ Sakatə Yesu ku wutə hamta jirər ɗa, antə tsa pəla aka mdə na ka dzari mtəmtari ni abbər, “Ɓzərna, mdə ku tifəmta ala gə bikər nga.”

⁶ Amma mji laga akwa nca maləmayeri ar thlipə tsawur Musa, na andzəndzi anda, pəla akwa ɗəffa ɗa abbər,

⁷ “Kamnyar mi tə mdə ngəni akwa gari apani ri? Ai tsa akwa rutə Hyel! Wan ka dunar tifəmta biku aka mda, ka təra kəra Hyel shini ri?”

⁸ Təkəma tə Yesu nggaɓəla abbər an su tə da akwa dzama ata kər akwa ɗəffa ɗa, antə tsa pəla ala ɗa, “Kamnyar mi tə giri akwa dzam su apani ri?

⁹ Na madi an kasəlari ri? Ka mdə pəla aka mdə na nggawa ni abbər, ‘Mdə ku tifəmta ala gə bikər nga,’ nənga ka mdə pəla, ‘Thlatə kara kətə algauwur nga kara mwa ri?’

¹⁰ Amma kamnyar ka giri sənda abbər Ɓzər Mda ni ka dunar tifəmtar bikayeri akwa duniya.” Antə tsa pəla aka mdə na nggawa ni abbər,

¹¹ “Thlata, kara kətə algauwur nga, ka gə təra ləha.”

¹² Təkəma antə mdə ni thlata, ka kətə algauwurni, ka təra, tsuwa shanga ɗa akwa wul ni. Antə su ngəni ku ndatə ɗa shang, har tə da hu Hyel akwa pəla, “Yeru aɗi ɗar wutə jili su apani wa!”

Yesu Ku Kəga Lawi

¹³ Antə Yesu jaktə mwari adzə mnya Mandar Galili. Antə mji hang ku tsaptədzi adzə ni, antə tsa ku thlipa ala ɗa.

¹⁴ Sakatə tsa akwa təramta, antə tsa wutə Lawi na ɓzər Halfa, andzəndzi akwa səvar dlu tsəma. Antə Yesu pəla alari, “Nu ra.” Antə Lawi thlatə ka nutə ni.

¹⁵ Vir laga Yesu ku mwari ka ndzəndzi ata vəi səm susəma aviyar Lawi. Tsuwa mji aɗi hang na mjir dlu tsəma ka mjir biku, na ku nu Yesu, antə hang akwa nca ɗa ku paktədzi akwa səm susəm ni ata kəma duku ka tsa kəga mjirthlipərni.

¹⁶ Antə maləmayeri ar thlipə tsawur Musa, natə da an mjir Farisi ni, ku wutə Yesu akwa səm susəma kəga mjir biku, ka mjir dlu tsəma ni. Antə da yu mjirthlipərni ni abbər, “Kamnyar mi tə tsa ana səm susəma ata kəma duku kəga mjir dlu tsəma ka mjir biku ri?”

¹⁷ Sakatə Yesu nggatə ndər ngəni, antə tsa pəla ala ɗa, “Mji na lapiya aɗi ana tur mdər hamta kuzəku wa, tar mji na nggawa nggawa. I aɗi si kamnyar kəi kəga mji na ɓɗakɓɗaku wa, amma mjir biku.”

Sur Yuwa Ata Kəra Kəl Asham

¹⁸ Akwa saka laga tə mjirthlipər Yahwana na Mdər hara Baptizma kəga mjir Farisi akwa kəl asham, antə mji laga si adzə Yesu ka yu ni abbər, “Kamnyar mi tə mjirthlipər Yahwana ka mjirthlipər mjir Farisi ana kəl asham, amma mjirthlipər nga aɗi ana kəl asham wa nə ri?”

¹⁹ Antə Yesu pəla ala ɗa, “Pazhayeri ar sala mwala ata mzhi kəl asham akwa sakatə sala mwala ni tsu adzə ɗa ya? Ai sakatə sala mwala ni tsu adzə ɗa, da amzhi kəl asham wa.

²⁰ Amma saka akwa si tə mda ata sə kətə sala mwala ni kazhar ɗa. Sakanda antə da ata kəl asham.

²¹ “Mda aɗi ana mbuɓəla ləptu na halhalari ka yadi na bilənari wa. Kamnyar ma tsa ku hara apani, antə yadi na bilənari ni ata thləhuɓəla ləptu na halhalari ni, tsuwa thləhu ni ata hara ɗimi kamta.

²² Tsuwa mda aɗi ana pu yimər anap bilən akwa zamzamiya na halhalari wa. Ma mdə ku hara apani, yimər anap ni, zamzamiya ata ndəlamtadzi, antə mda ta hara asar ar yimər anap ni japu ka zamzamiya ni. Ai tar zamzamiya na bilənari antə mda ata mzhi pu yimər anap na bilənari akwa.”

Sur Yuwa Ata Kəra Vir Ghərəmtaghəra

²³ Vir Ghərəmtaghəra laga sakatə Yesu ka mjirthlipərni akwa təramta akwa fakər mthli, təng mjirthlipərni baɗitə ɓəgəl sanggam mthli ni.

²⁴ Antə mjir Farisi pəla aka Yesu, “Wul su tə mjirthlipər nga akwa harari ni! Kamnyar mi tə da akwa hara su tə tsawur Musa aɗi hir ka mdə hara Vir Ghərəmtaghəra wa nə ri?”

²⁵ Antə Yesu pəla ala ɗa, “Giri aɗi ɗar karatə su tə Dauda hara sakatə tsa ka mji adzə ni akwa ngga mi ka tur susəm wa ya?

²⁶ Su ni hara akwa zaman tə Abiyathlar an olər pristayeri. Dauda ləkwa mbwar Hyel, ka kwasə buradi tə mdə ku hamta aka Hyel, natə aɗi kalkal ka kəlara mdə kwasə wa, amma tar pristayeri daci. Har ma tsa ku hamta bwaduku aka mji na adzə ni!”

²⁷ Antə Yesu pəla ala ɗa, “Ai mdə namtə Vir Ghərəmtaghəra ni kamnyar mda, aɗi abbər mda antə mdə namtə kamnyar Vir Ghərəmtaghəra wa.

²⁸ Antə Ɓzər Mda an Mthlaku, wala ata kəra Vir Ghərəmtaghəra.”