Malaki 2 - KAKAƊU NA ƁƊAKKARKARA

Tsakta Aka Pristayeri

¹ MTHLAKU na ka Duna ta Shang akwa pəla, “Giri na pristayeri, tsawu ngəni an kamnyar giri.

² Ma giri aɗi ata psi thləma giri, ka vədzə hangkala giri, ka ni səli wa, to, I ata shuwumta giri, kəi shuwumta barkayeri natə giri ku kurtə wuta. Jiri, I ku kurtə shuwumta ɗa, kamnyar giri aɗi vədzə hangkali giri aka su tə I pəla wa.

³ Kamnyar ngəni I ata mpa aka maɗa' giri, kəi kəkərtə civər mwaɓiyir saɗakar giri ata kəma giri, kəi kədləɓəla giri ka civər mwaɓi ni.

⁴ Apani antə giri ata sənda abbər I an ku thlenta ala giri tsawu ngəni ni, kamnyar ka alkawal na akwa daɓwa yeru kəga mjir Lawi, natə da an Pristayeri, ləkəma ka ndzi gyang, ndə MTHLAKU na ka Duna ta Shang.

⁵ Alkawal tə yeru mbwi kəga da ni an alkawalər na ɗa mpika, ka ar ndzi lapiyakur, kamnyar ka da thlivər ra. Antə akwa saka ndaga da ku thlivər ra ka ni səli.

⁶ Da ku thlipə su na jiri, kula thlandər akwa. Da ku mwa ka iya akwa msərakur ka jirkur har tə mji hang ku zhar hara ɗimikur.

⁷ Kamnyar kalkal ka pristayeri nu surthlipə na jirari, tsuwa ka mji nggatə surthlipə na kalkal akwa mnya ɗa, kamnyar da an mjir thlenta ar MTHLAKU na ka Duna ta Shang.

⁸ Amma kulini giri na pristayeri, giri ku pəra ka zhar laku, ka vu tə mji hang ku sha kamnyar surthlipər giri. Giri ku ɓəli alkawal tə I hara ka kəkar giri Lawi.

⁹ Kamnyar ngəni antə I ata vu ka shanga mji rutə giri, ka giri ndzi kula səli akəma mji, təng tə giri aɗi kələngkər ali wa, tsuwa giri ku ncantə zumzumkur akwa surthlipər giri.”

Mji Ku Ndzi Kula Jirkur

¹⁰ Aɗi shanga mburu ni baba' mburu duku wa ya? Aɗi Hyel duku an həntə mburu wa ya? Kamnyar mə tə mburu aɗi akwa ndzi ka jirkur aka nvwa mburu wa ri, har tə mburu akwa ɓəli alkawalər kəkayeri ar mburu ni?

¹¹ Mjir Yahuda ku ndzi kula jirkur, tsuwa mda akwa hara sur cika akwa Israila ka akwa Urushalima. Kamnyar mjir Yahuda ku tsi səliyir vəi ndzəndzi na ɓɗakkarkara ar MTHLAKU, natə tsa hira, ka kəl mwala na ana nu hyelər mji na aɓəla.

¹² Ka MTHLAKU thlaɓəla kəlara mdə na ku hara su ngəni akwa nca mjir Israila, wala tsa an wa ri, ka kəlara mdə na aghəlari, wala ma tsa an ku səntə saɗaka aka MTHLAKU na ka Duna ta Shang.

¹³ Nggədza su damwa tə giri akwa jaktə harari ma. Giri akwa hartə kəra bagaɗiyir hamta saɗakar MTHLAKU ka shimwi, ka jaɓtuwa har ka nggyinggya, kamnyar tə tsa aɗi akwa damitədzi ka sur hamta ar giri kəra wa, wala dlu saɗaka akwa tsiya giri ka kucali wa.

¹⁴ Giri akwa yu su abbər, “Man hara tə tsa aɗi akwa dluwari wa ri?” Kamnyar MTHLAKU surni an seɗa ar alkawal tə gə kəta akwa daɓwa giri ka mwalangkiri tə gə kəla akwa sakar dakwikurər nga, natə ga akwa səm mdəkurərni ni, wala tə tsa an mdər ndzəndziyir nga ka mwala ngyikar nga.

¹⁵ Hyel aɗi namtə giri dza duku ka mambəl duku ka tsa wa ya? Man tə Hyel akwa barari ri? Tsa akwa bara ka maɗa' mburu ndzi mjir thlivər Hyel. Antə kuji ka giri ngkahə hangkala giri, ta mdə laga akwa nca giri asə səm mdəkur mwalankiɗa tə tsa kəla akwa sakar dakwikurərni.

¹⁶ “Kamnyar arna, I ku nggəlar ndəka ka mwala”, ndə MTHLAKU na Hyelər Israila. “I ku nggəlar su ngəni apatə I nggəlar mwavərkur. Antə tar ka giri ngkahə hangkala giri, ta giri asəm mdəkur mwankir giri.”

Vir Shariya Ku Hara Kudzəha.

¹⁷ Giri ku ghərantə MTHLAKU ka ndərayeri ar giri. Amma giri akwa pəla abbər, “Akwa laku madi tə yeru ghərantə ni nə ri?” Atar pəla abbər, “Kəlara mdər hara ɗimikur an ɓɗaku ata nca MTHLAKU, tsuwa tsa ana nggatə msərakurər ɗa.” Giri akwa yu su abbər, “Hyel na ana hara shariyar jirkur ni ama ri?”