Luka 9 - KAKAƊU NA ƁƊAKKARKARA

Yesu Ku Thlentə Mjir thlipa Na Kumnya Suɗa

¹ Antə Yesu kəgatə mjirthlipərni na kumnya suɗə ni ata vəi duku, ka hamta ala ɗa duna ka kuthlikur ar kədləɓəla shatanayeri, ka tsuwa ka da kuri shilkayeri.

² An tsa thlentə ɗa ka da mwari kara ngkər labar ar kuthlikurər Hyel, ka tsuwa ka da mbantə mji na nggawa nggawa.

³ Antə tsa pəla ala ɗa, “Giri aɗiya kəl su kamnyar lənggur giri wa, wala zwal, wala thləvu, wala susəma, wala kwaba, wala ləptu damwa wa.

⁴ Kəlara sakatə giri ku ləkwa kəi laga, ka giri ndzi tsu akwa kəi ndaga, tar ma sakatə giri ata zhar di nda.

⁵ Tsuwa ma mji na aɗi dlu giri wa, ma sakatə giri akwa zhar vəi nda, ka giri ɓumta bərbər na ata səla giri, ka ndzi seɗa ata kəra ɗa.”

⁶ Antə da ku təra ka mwari akwa shanga kauyayeri, ata ngkər labar na msəra, da akwa mbantə mji akwa kəlara vəi madi.

Hirudus Ku Ndəndatədzi Ata Kəra Yesu

⁷ Sakatə Kuthli Hirudus nggata ata kəra shanga suayeri na akwa hara ni, antə tsa ndatədzi. Kamnyar mji laga akwa pəla abbər Yahwana tə mdə nthləmta kərari ni an thlata akwa mtəmta,

⁸ amma mji laga pəla Iliya an wutədzi ka damwa. Tsuwa mji laga akwa pəla pal akwa nca naɓiyayeri na waci an thlatə ka mpika.

⁹ Antə Hirudus pəla, “I ku nthləmta kəra Yahwana diya. Ka ngəni wa tsu ri, tə I akwa nggatə suayeri ngəni ata kərari ni?” Antə tsa ku bara ka tsa wutə Yesu.

Yesu Ku Ndlantə Mji Dəpu Ntəfu

¹⁰ Sakatə aposəlayeri ku ngka, antə da jikata aka Yesu su tə da hara. Antə tsa fatə ɗa ka mwari ka da akwa di laga ka thləmari Bethsaida.

¹¹ Sakatə dlamar mji ku nggata, antə da nutə ni. Antə tsa ku dlu ɗa ka ngkər ala ɗa su ata kəra kuthlikurər Hyel, ka mbantə mji na akwa tur mbantədzi.

¹² Sakatə pci abaka təri, antə mjirthlipərni na kumnya suɗə ni si adzə ni ka pəla alari, “Kuji gə salamtə mji ni ka da təra ləkwa kauyayeri kəga hildiyayeri na kalaktə mburu ni, kamnyar ka da wutə susəma ka vəi fəli, kamnyar azi ni mburu ku hara ciju ta kuta di.”

¹³ Amma Yesu pəla ala ɗa, “Na giri ala ɗa su tə ka da səm bu.” Antə da pəla, “Shanga su na akəla yeru aɗi təramta kər buradi ntəfu ka kəlfa suɗə wa. Tar ma yeru an ata mwari ra mastə susəma aka shanga mji ngəni.”

¹⁴ Kamnyar mji shili na anda ni ku mwanta apa dəpu ntəfu. Antə Yesu pəla aka mjirthlipərni, “Pəla giri aka mji ni ka da ndzəndzi zara zara ntəfkumari ntəfkumari.”

¹⁵ Antə mjirthlipərni ku hara apani, tə shanga ɗa ku ndzəndzi.

¹⁶ Antə Yesu kətə kər buradi na ntəfu ka kəlfa suɗə ni, ka haptə ncari amta, ka usar Hyel, antə tsa ɓəgəlwa buradi ni, ka hamta aka mjirthlipərni ka da ndəkəmta aka mji.

¹⁷ Antə shanga ɗa ku səma ka ndli. Antə mjirthlipərni tsaptə na ɓushirəmtadzi ata di, har ka nghyantə thlambəl kumnya suɗa.

Bitrəs Pəla Yesu An Almasihu Ni

¹⁸ Vir laga sakatə Yesu akwa hara adduwa shini, antə mjirthlipərni ku si adzə ni, antə tsa yu ɗa abbər, “Mji ana pəla I an wa ri?”

¹⁹ Antə da shinau alari ka pəla, “Mji laga ana pəla abbər ga an Yahwana na mdər hara baptizma. Mji laga ana pəla, ga an Iliya, mji laga tsuwa akwa pəla pal akwa nca naɓiyayeri na waci an thlatə ka mpika.”

²⁰ Antə tsa pəla ala ɗa, “Amma ar giri, giri ana pəla I an wa ri?” Antə Bitrəs shinau ka pəla, “Ga an Kristi ar Hyel.”

Yesu Ku Ngkər Bwani Ka Mta Na Ata Wutə Ni

²¹ Antə Yesu tsaktə ɗa ka duna abbər da aɗiya pəla su ngəni aka wama wa.

²² Antə tsa pəla, “Dwali ka Ɓzər Mdə ɗar bwaniyir suayeri hang, ka mji na ol'ola, ka pristayeri na ol'ola, ka maləmayeri ar thlipə tsawur Musa, sə nggəlar ni, har ka da tsi ni, ka mdə thlentə ni akwa vir na makərkur.”

²³ Antə tsa pəla aka shanga ɗa abbər, “Kəlara mdə na ata bara nu ra, tar ka tsa nggəlar kərni, ka tsa kətə udzəm kadləkadla arni tədək viri, ka tsa nu ra.

²⁴ Kamnyar kəlara mdə na akwa bara mbantə mpikari, mpikari ata sha. Amma kəlara mdə na akwa shamta mpikari kamnyar na, tsa ata mbantə mpikari.

²⁵ Kamnyar man ampaniyari ri, ma mda ata ndzi mthlakər shanga duniya ni, amma tsa ata ni ka mpikari?

²⁶ Kamnyar kəlara mdə na ata səli kamnyar na, ka kamnyar ndərərna, antə Ɓzər ata sə səli kamnyar ni tsuwa sakatə tsa ata sə si ka səliyirni kəga səliyir Tədda ka ar mjirthlentərhyel na ɓɗakkarkara.

²⁷ I akwa pəla ala giri jirkur, mji laga aɗi athləthlata azi na aɗi ata mtə kambəla da wutə kuthlikurər Hyel wa.”

Palidzər Kəma Yesu

²⁸ Abaka aghəla vir ncisu ka pəla gari ngəni, antə Yesu kətə Bitrəs, ka Yahwana, ka Yakub, tə da mwari ata kəra gar kamnyar hara adduwa.

²⁹ Sakatə tsa akwa hara adduwa ni, antə kəmari palidzi, tə ləptərni tsuwa akwa mbəlmbəla shalak mwapu.

³⁰ Təkəma təng nggədza mji suɗa si akwa gari ka tsa. Mji ngəni suɗə ni an Musa ka Iliya,

³¹ na si akwa səli na ola ka gari ka Yesu ata kəra laku tə tsa ata nghyaɓəla nufiyir Hyel atar mtərni ahar Urushalima.

³² Amma Bitrəs ka mji na adzə ni antə da akwa heni, sakatə da ku thlata antə da ku wutə səliyir Yesu ka mji suɗa athləthlata adzə ni.

³³ Amma sakatə mji nayeri ni akwa təra kazhar Yesu, antə Bitrəs pəla aka Yesu, “Mdərkəi, ku hara ɓɗaku tə mburu azi ni. Ndzi ka yeru namtə tentayeri makər, pal kamnyar nga, pal kamnyar Musa, ka palari tsuwa kamnyar Iliya.” Tsa aɗi səndə su tə tsa akwa pəlari wa.

³⁴ Sakatə tsa tsu akwa gari ni, təng təkəma dlamba laga səghəi ka hartə ɗa akwa ləmbəku, antə mjir thlipə ni ku thlivəra.

³⁵ Təkəma təng kuraku laga səɓəla akwa dlamba ni akwa pəla, “Ngəni an Ɓzərna natə I ku carɓəla. Psi gir thləm alari!”

³⁶ Sakatə kurakə ni ku kuri, təng da wutə Yesu tsu shini. Amma mjirthlipərni ku dləɓa ata kər, da aɗi pəla aka wama su tə da wuta ata saka nda wa.

Yesu Ku Mbantə Ɓzər Laga Na Ka Shatan Akwa Dzari

³⁷ Səɓəla ɗəpari Yesu ka mjirthlipərni na makər ni ku səghəi kazhar kəra gar ni, antə dlamar mji mwari adzə ni.

³⁸ Antə mdə laga akwa nca dlamar mji ni haptə kuraku ka duna, ka pəla, “Maləm, I akwa kiɗə nga ka gə wulha ali ɓzərna ni, kamnyar tsan ɓzər duku akəli.

³⁹ Shatan laga andər ngkəi ni, ka vu ni akwa hara kuraku kula suari aɗi. Tsa ana tsa ni, ka dzari ləkwa ɓathla, har ka mnyari mbwa. Shatan ni aɗi ana zhar ni wa tar ma tsa ku dəkəi ni katagu.

⁴⁰ I ku kiɗə mjirthlipər nga abbər ka da kədləɓəla ni, amma da aɗi mzhi wa.”

⁴¹ Antə Yesu pəla, “Giri na mjir zaman ngəni, giri hilhilari, kula hamta jiri. Kəi fəi adzə giri apa madə ri? Har ka vədza aka saka madi antə I ata ləkəma ka mbwi ɗəffi ka giri ri? Səntə ɓzər ngə ni azi.”

⁴² Wala sakatə ɓzər ni akwa si, tar tə shatan ni ngka ni ata di, tə dzari ləkwa kədza. Amma Yesu ku mpa aka shatan ni, ka mbantə ɓzər ni, ka jaktə hamta ni aka baba'ni.

⁴³ Antə shanga mji ku ndatədzi ata kəra dunar Hyel na olta shang.

Yesu Ku Jaktə Gari Ata Kəra Mtərni

⁴⁴ “Giri aɗiya fwari su tə I akwa pəla ala giri ni wa. Mda ata hamta Ɓzər Mda aka mji.”

⁴⁵ Amma da aɗi nggaɓəla karapur gari ngəni wa, kamnyar ku ɗuwamtadzi ala ɗa, antə da aɗi mzhi nggaɓəlari wa. Tsuwa da akwa thlivər yu ni ata kəra gari ngəni.

Wan Olta Shang Ri?

⁴⁶ Antə beɗi ku thlata akwa daɓwa mjirthlipərni ni abbər, wan olta shang akwa nca ɗa ri.

⁴⁷ Yesu ku kurtə səndə su na akwa ɗəffa ɗa, antə tsa kətə ɓzəngkyar laga raka, ka vu ni tə tsa thləthlata athlimbəlari.

⁴⁸ Antə tsa pəla ala ɗa, “Kəlara mdə na ku dlu ɓzəngkyar na raka apa ngəni akwa thləmi, tsa ku dlu ra. Tsuwa kəlara mdə na ku dlu ra, tsa ku dlu mdə na ku thlentə ra. Kamnyar mdə na raka ta shang akwa nca giri, an olta shang.”

Mdə Na Aɗi Dawar Giri Wa Tsa Pazhir giri

⁴⁹ Antə Yahwana shinau ka pəla, “Mthlaku, yeru ku wutə mdə laga ata kədləɓəla shatanayeri akwa thləma ga, antə yeru ku pəla alari ka tsa zhari, kamnyar tsa aɗi akwa nca yeru wa.”

⁵⁰ Amma Yesu pəla alari, “Giri aɗiya ngkatə ni wa, kamnyar kəlara mdə na aɗi nggəlar giri wa, tsa ar giri.”

Mjir Samariya Ku Nggəlar Ta Dlu Yesu

⁵¹ Sakatə virayeri ku ntsəhədzi tə mda ata sə dlu Yesu amtazi, antə tsa vu akwa ɗəffari ka duna abbər ka tsa mwari ahar Urushalima.

⁵² Antə tsa ku thlentə mjir thlenta akəmari, tə da ku mwari akwa di laga akwa tsəɗiyir Samariya kamnyar ka da ɗəmhə shanga su alari.

⁵³ Amma mji na anda aɗi hir dlu ni wa, kamnyar tə tsa ku thlentə kəmari abwar Urushalima.

⁵⁴ Sakatə mjirthlipərni, Yakub ka Yahwana ku wuta apani, antə da pəla, “Mthlaku, ga hir ka yeru tsawa ka u'u səghəi akwar amtazi ka mbamta ɗa ya?”

⁵⁵ Amma Yesu ku shinardzi ka mpa ala ɗa.

⁵⁶ Antə Yesu ka mjirthlipərni ku təra mwari akwa di damwa.

Mjir Pəla Abbər Da Ata Nu Yesu

⁵⁷ Sakatə da akwa ləkəma ka mwar ɗa akwa laku, antə mdə laga pəla aka Yesu, “I ata nu nga akwa kəlara vəi tə ga ata mwari akwa.”

⁵⁸ Antə Yesu pəla alari, “Pwaghayeri ka kur ɗa, ɗikayeri tsuwa ka mbwar ɗa, amma Ɓzər Mda aɗi ka vəi tə ka tsa pəpəi ata wa.”

⁵⁹ Antə tsa pəla aka mdə laga, “Ka gə nu ra.” Amma mdə ni pəla, “Mthlaku, ndzi kəi ra harəmta baba'na katagu.”

⁶⁰ Amma Yesu pəla alari, “Zhar ka mji na mtəmta harəmta mdər ɗa na mtəmtari. Amma ar nga, mwari, ka gə psəmnya kuthlikurər Hyel.”

⁶¹ Antə mdə laga pəla, “I ata nu nga, Mthlaku, amma ndzi kəi mwari ka yeru salamtədzi kəga mjir kutakəyirna katagu.”

⁶² Amma Yesu pəla alari, “Kəlara mdə na ku baɗitə tsuhwa ka garma, ma tsa akwa jaktə wul bwahilari, tsa aɗi ata mzhi ləkwa kuthlikurər Hyel wa.”