Luka 4 - KAKAƊU NA ƁƊAKKARKARA

Shatan Ku Ngkərtə Yesu

¹ Antə Yesu ku thlata akwa Jodan nghyinghyari ka Mambəl na Ɓɗakkarkara. Antə Mambəl ni ku mwantə ni akwa mtaku,

² akwa vəi tə Shatan ngkərtə ni mnyar vir nfwarkumari, tsa aɗi səm su akwa kuta virayeri ndagə wa. Sakatə virayeri nda ku kuri, antə tsa nggatə mi.

³ Antə Shatan ni pəla alari, “Ma ga an Ɓzər Hyel, ka gə tsawa aka pela ngəni ka tsa ndzi buradi.”

⁴ Amma Yesu shinau alari ka pəla, “Mdə ku rəbuta akwa kakaɗər Hyel abbər, ‘Aɗi ka susəma shini antə mda ata ndzi ka mpikə wa.’ ”

⁵ Antə Shatan ni mwantə ni ata vəi laga amta, kara ncanta alari shanga kuthlikurayeri ar duniya akwa məcikər nca pal.

⁶ Antə Shatan ni pəla alari, “I ata hamta ala gə shanga kuthlikur nayeri ni kəga səliyir ɗa, kamnyar mdə ku hamta ɗa ali. Antə kəlara mdə tə I hir I ata hamta alari.

⁷ Antə ma ga ata vəngkər səli ali, na nayeri ni shang ata ndzi ala ga.”

⁸ Antə Yesu pəla alari, “Mdə ku rəbuta akwa kakaɗu abbər, ‘Ka gə vəngkər səli aka Mthlaku na Hyel ar nga, tsa duku shini, antə ka gə hara mafakur alari.’ ”

⁹ Antə Shatan ni mwantə ni ahar Urushalima, kara vətə ni ata kəra jikwara mbwar vəngkər səli aka Hyel, ka pəla alari, “Ma ga an Ɓzər Hyel, psəghəi kər nga ata vəi ngəni.

¹⁰ Kamnyar mdə ku rəbuta akwa kakaɗu abbər, “ ‘Hyel ata tsawa aka mjirthlentərni ka da ɓəlatə nga.’

¹¹ Ka tsiya ɗa antə da ata kathli nga, kamnyar ta pela asə tsa səla ga.”

¹² Amma Yesu shinau alari ka pəla, “Mdə ku pəla akwa kakaɗu, ‘Ga aɗiya ngkərtə Mthlaku na Hyel ar ngə wa.’ ”

¹³ Sakatə Shatan ni ku kuri ngkərtə Yesu akwa shanga su, antə tsa təra kazhar ni mnyar saka laga raka.

Yesu Ku Baɗitə Kəthlərərni Ahar Galili

¹⁴ Antə Yesu ku ngka akwa tsəɗi Galili, tsuwa dunar Mambəl na Ɓɗakkarkara adzə ni. Antə labarərni ku titiləmtadzi akwa shanga tsəɗi ndaga.

¹⁵ Antə tsa ku thlipa akwa mbwayeri ar vəngkər səli ar mjir Yahuda, tə tsa ku wutə səli akəla shanga mji.

Mji Ku Nggəlar Yesu Ahar Nazareth

¹⁶ Antə Yesu ku mwari ahar Nazareth, akwa vəi tə tsa kəla akwa. Antə tsa ləkwa mbwar vəngkər səli Vir Ghərəmtaghəra apatə tsa tsəli kəgari. Antə tsa thlata ka thləthlatə kamnyar ka tsa karata.

¹⁷ Antə mdə ku hamta alari kakaɗər naɓi Ishaya. Antə tsa ku kəlar kakaɗə ni ka wutə vəi natə mdə ku rəbuta abbər,

¹⁸ “Mambələr Mthlaku aɗi ata kəri, kamnyar tsa ku carɓəla ra abbər kəi ngkər labar na msəra aka mjir bwani. Tsa ku thlentə ra kəi pəla labar ar msərantədzi aka mji na mbwimbwiyari, ka wutər su tsuwa aka mji na mdlyang, tsuwa kəi msərantə mji natə mdə ku ntsari ɗa.

¹⁹ Kəi pəla tsuwa aka shanga mji abbər, saka ku hara tə Mthlaku ata mbantə mjirni.”

²⁰ Antə Yesu ku pərtə kakaɗə ni ka jaktə hamta aka mdər wul kutambwar vəngkər səli ni, kara ndzəndzi. Antə shanga mji na akwa mbwar vəngkər səli ni ku ɗəməngkər nca ɗa alari,

²¹ antə tsa baɗitə pəla ala ɗa, “Ashina antə labar Hyel ngəni rəbutə rəbutari ni ku nghyantədzi, akwa thləma giri.”

²² Antə shanga ɗa ku gari na ɓɗaku ata kərari. Da akwa ndatədzi ata kəra ndərayeri na msəra msəra na səɓəla akwa mnyari, har tə da pəla, “Aɗi ngəni aɗi ɓzər Yusuf pwa?”

²³ Antə tsa pəla ala ɗa, “I ku sənda abbər giri ata tsa ali karapu ngəni, abbər, ‘Ga na mdər nu kuzəku kara mbantə kəra ga.’ Tsuwa giri ata pəla ali, ‘Suayeri tə yeru nggata abbər ga ku hara ahar Kafarnahum, hara ala yeru azi akwa diyir ngə ni tsu ja.’ ”

²⁴ An tsa pəla, “I akwa pəla ala giri jirkur, naɓi aɗi natə mjir diyirni ana mbərsa ka tsa wa.”

²⁵ “Amma I akwa pəla giri jirkur, akwa zamanər Iliya, mwanki na kughung aɗi hang akwa Israila. Akwa saka ndaga antə vəi na amtazi hartədzi mnyar məva makər ka thliya ngkwa yimi aɗi tər wa. Antə mi na mwavər ku hara ata kəra shanga tsəɗi.

²⁶ Amma mda aɗi thlentə Iliya aka wala pal akwa nca mwanki kughung na akwa Israila wa, amma mdə thlentə ni aka mwala kughung laga na ahar Zarefath akwa tsəɗi Sidon.

²⁷ Tsuwa mjir shilkər kəsəm dza aɗi hang akwa Israila akwa sakar naɓi Elisha, amma wala pal akwa nca ɗa aɗi na wutə mbantədzi wa, tar Naaman shini daci na mdər Siriya.”

²⁸ Sakatə mji na akwa mbwar vəngkər səli ni nggatə gari ngəni, antə ɗəffa ɗa ku mbwi ka duna.

²⁹ Antə da thlatə ka kədləɓəla Yesu akwa kuta di, tə da mwantə ni ata mnya gar na ar diyir ɗa kamnyar ka da psəghəi ni ka ncirkərari akwa gar ni,

³⁰ amma tsa ləɓəla akwa nca dlamar mji ni ka təra ni.

Mdə Laga Na Ka Shatan Akwa Dzari

³¹ Antə Yesu ku mwari ahar Kafarnahum, di laga na akwa tsəɗi Galili. Sakatə Vir Ghərəmtaghəra ku si, antə tsa ləkwa mbwar vəngkər səli, ka baɗitə thlipa aka mji.

³² Antə da ku ndatədzi ata kəra thlipərni, kamnyar tsa akwa thlipa ala ɗa ka kuthlikur.

³³ Tsuwa mdə laga aɗi na ka mambəl na ɗimi ar Shatan akwa dzari, akwa mbwar vəngkər səli ni. Antə tsa hara kuraku ka duna ka pəla,

³⁴ “Kara Mara! Man tə ga akwa bara harari ka yeru ri, Yesu, gə na mdər Nazareth? Gə si kamnyar ka gə kurəmta yeru ya? I asəndə nga, ga an Mdə na Ɓɗakkarkara ar Hyel.”

³⁵ Amma Yesu ku mpa alari ka pəla, “Hartə mnya ga! Səɓəla kazhar ni!” Antə Shatan ni haptə ni mdə ni ka ndzəh ni ata di akəma ɗa shang. Antə tsa səɓəla, kula tsa dəkəi mdə ni.

³⁶ Antə shanga mji ku ndatədzi, ka pəla aka nvwa ɗa abbər, “Nggədza jili surthlipə laga bilən ja mara! Tsa akwa thlipə ni ka kuthlikur ka duna, akwa tsawa aka mambəlayeri na ɗimi ɗimi, ka da səɓəla!”

³⁷ Antə su tə tsa hara ni ku titiləmtadzi akwa kəlara bwa akwa tsəɗi nda.

Yesu Ku Mbantə Mji Hang

³⁸ Antə Yesu ku səɓəla akwa mbwar vəngkər səli ni, ka təra mwari ahar Siman. Tsuwa ata saka nda mama' mwalar Siman apəpəi nggawa ka dzəkdzəku. Antə da kiɗə Yesu abbər ka tsa mbantə mwala ni.

³⁹ Antə Yesu mwari ka thləthlata ata kərari, ka mpa aka dzəkdzəku ni. Antə dzəkdzəku ni ku kuri adzə mwala ni, tə tsa ku thlatə ka namta ala ɗa susəma.

⁴⁰ Sakatə pci akwa təri, antə mji səntə shanga mji na ka jili shilkayeri na zumzum aka Yesu. Antə tsa vəngkər tsiyari ata kəra waskəi akwa nca ɗa ka mbantə ɗa.

⁴¹ Antə shatanayeri ni səɓəla akwa dza mji hang, akwa hara kuraku abbər, “Ga an Ɓzər Hyel!” Amma tsa ku mpa ala ɗa, tsuwa tsa aɗi hir na laku ala ɗa ka da gari wa, kamnyar da ku sənda abbər tsa an Kristi.

Yesu Ku Ngkər Labar Akwa Mbwayeri Ar Vəngkər Səli

⁴² Sakatə vir ku kuri, antə Yesu ləɓəla akwa kuta di ka mwari akwa vəi laga na kula mda. Antə mji ləkwa pakə ni, har tə da wutə ni. Antə da bara ngkatə ni ta tsa amwari akwa vəi damwa kazhar ɗa,

⁴³ amma tsa pəla ala ɗa, “Tar kəi ngkər labar na msəra ar kuthlikurər Hyel akwa kauyayeri damwa tsuwa, kamnyar an su tə mdə thlentə ra kamnyari.”

⁴⁴ Antə tsa ləkəma ka ngkər labar akwa mbwayeri ar vəngkər səli na akwa Yahudiya.